وبلىستىڭ پوليتسيا دەپارتامەنتىنىڭ ءباسپاسوز قىزمەتىنىڭ حابارلاۋىنشا, وڭىردە جول اپاتىنان ەكى ادام كوز جۇمعان.
«3 تامىز كۇنى ساعات 23:45-تە «ومبى-مايقاپشاعاي» تاسجولىنىڭ 380-ءشى شاقىرىمىندا, چەرنوياركا اۋىلىنىڭ ماڭىندا 32 جاستاعى Nissan Patrol-دىڭ جۇرگىزۋشىسى «ۋازبەن» سوقتىعىسقان.
25 جاستاعى «ۋازدىڭ» جۇرگىزۋشىسى اۋىر جاراقاتتان سول جەردە كوز جۇمدى», دەپ مالىمدەدى پاۆلودار وبلىسى پوليتسيا دەپارتامەنتى باستىعىنىڭ ءبىرنىشى ورىنباسارى جاسقايرات قايىروۆ. دەنساۋلىق ساقتاۋ باسقارماسىنىڭ ءباسپاسوز قىزمەتى قايتىس بولعان ەر ادامنىڭ چەرنورەتسك دارىگەرلىك امبۋلاتورياسىنىڭ دارىگەرى ەكەنىن راستادى. ول اقسۋ قالاسىندا ناۋقاستى اۋرۋحاناعا جاتقىزعاننان كەيىن قايتىپ كەلە جاتقان. پوليتسيا ەكىنشى قايعىلى وقيعا جايلى دا مالىمدەدى.
6 تامىز كۇنى ساعات 23:15-تە سول جولدىڭ 561-ءشى شاقىرىمىندا, شارباقتى اۋىلىنىڭ ماڭىندا Nissan X-Trail-ءدىڭ 68 جاستاعى جۇرگىزۋشىسى جاياۋ جۇرگىنشىنى قاعىپ كەتكەن. 31 جاستاعى ايەل تاكسي توقتاتۋ ءۇشىن جولدىڭ كولىك جۇرەتىن بولىگىنە جۇگىرىپ شىققان. ول دا وقيعا ورنىندا كوز جۇمدى. ەكى جاعدايدا دا سوت-مەديتسينالىق ساراپتاما تاعايىندالدى, كولىكتەر ارنايى ايىپپۇل تۇراعىنا قويىلدى.
پوليتسەيلەردىڭ ايتۋىنشا, وسى جىلدىڭ باسىنان بەرى پاۆلودار وبلىسىندا 278 جول-كولىك وقيعاسى بولعان, سالدارىنان 20 ادام قايتىس بولىپ, تاعى 410 ادام ءتۇرلى جاراقات العان.
