«28 شىلدەدە پاۆلودار قالاسىنىڭ № 2 سوتىنىڭ ۇكىمىمەن پاۆلودار وبلىسى ساۋلەت باسقارماسىنىڭ بۇرىنعى باسشىسى كاكامبەتوۆ مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرا وتىرىپ, ءۇش جىل مەرزىمگە باس بوستاندىعىنان ايىرۋ تۇرىندە جازا تاعايىندالدى.
باسقارما باسشىسىنىڭ مىندەتىن اتقارۋشى شابانوۆ مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرا وتىرىپ, 2 جىل 6 اي مەرزىمگە باس بوستاندىعىنان ايىرىلدى.
سونداي-اق باسقارمانىڭ اكىمشىلىك ءبولىمىنىڭ باسشىسى بالتاباەۆا مەن اكىمشىلىك ءبولىمىنىڭ باس مامانى-باس بۋحگالتەرى ماشراپوۆا 2 جىل 6 اي مەرزىمگە سوتتالىپ, ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلدى», دەدى بيعايداروۆ بريفينگتە.
كاكامبەتوۆ, شابانوۆ, بالتاباەۆا جانە ماشراپوۆا جالعان ءىسساپار شىعىستارى مەن مەملەكەتتىك ساتىپ الۋ بويىنشا تاۋارلاردى قابىلداۋ اكتىلەرىن رەسىمدەۋ ارقىلى جالپى سوماسى 11,1 ميلليون تەڭگە بيۋدجەت قاراجاتىن جىمقىردى دەگەن كۇدىككە ىلىنگەن بولاتىن.
