وبلىس شارۋاشىلىقتارىنىڭ جالپى ءشوپ قاجەتتىلىگى 850 مىڭ توننا, سونىڭ ىشىندە 492 مىڭ توننا اۋىل تۇرعىندارىنىڭ قوراداعى مالىنا قاجەت. بيىلعى مامىر اياعىنان باستالىپ, ماۋسىمنىڭ اياعىنا دەيىن سوزىلعان ىستىق دالانىڭ ءشوبىن ءبىرشاما كۇيدىرىپ جىبەرگەن. بىراق شىلدەدەن باستاپ جاۋعان جاۋىن كوكورايدى قايتا ءوسىرىپ, قازىر سۇيىقتاۋ بولعانىمەن ءشوبى بەلۋاردان كەلەتىن جەرلەر بار. سوندىقتان شارۋا قازىر ءشوپ جيناۋ ناۋقانىن قىزۋ جۇرگىزۋدە. اۋىل شارۋاشىلىعى باسقارماسى اگرونوميا ءبولىمىنىڭ باستىعى باقتيار بەكجاننىڭ ايتۋىنا قاراعاندا, بيىل وبلىستىڭ شوپتەن قىسىلماسى انىق.
شوپتەن باسقا بۇگىنگى تاڭدا 76,7 مىڭ توننا پىشەندەمە ءۇيىلىپ الىندى. بۇل جوسپاردىڭ – 39,6%-ى. ال تامىزدىڭ ەكىنشى جارتىسىنان باستاپ اگروقۇرىلىمدار جۇگەرى شابۋعا كىرىسىپ, سۇرلەم دايىنداپ الادى. ونىڭ شىعىمىنا دا سوڭعى جاۋىندار جاقسى اسەر ەتىپ, ءونىم جىلداعىدان كەمىرەك بولسا دا, از بولماسى انىق.
بيىل اۋىلدىق اكىمدىكتەر ارنايى شابىندىقتار مەن ايرىقشا قورعالاتىن تابيعي اۋماقتاردان دا ءشوپ شابۋدى ۇيىمداستىردى. بۇل ءۇشىن اۋىل تۇرعىندارى اراسىنان تەحنيكاسى بارلارىنان ارنايى بريگادالار جاساقتالدى. بۇل بريگادالار ورمان قورىنداعى قۋىستار مەن زاپاستاعى قورلاردان دا ءشوپ شابۋدا.
سونىمەن قاتار جەردى پايدالانۋ قۇقىقتارىن جالعا العانى ءۇشىن كوپتەگەن اگروقۇرىلىم حالىققا پايدىڭ ەسەبىنە تىركەمەمەن ءشوپ اكەلىپ بەرۋدە. اسىرەسە زەينەتكەرلەر مەن از قامتىلعان وتباسىلارىنا وسىنداي كومەكتەر جاسالىپ جاتىر. سونداي-اق اۋداندىق اكىمدىكتەر ارنايى جارمەڭكەلەر ۇيىمداستىرىپ, وندا قالا مەن اۋدان ورتالىعىنىڭ تۇرعىندارى ءۇشىن بەلگىلەنگەن باعاعا جەمشوپ ساتۋدا. وسى كۇنگە دەيىن 29 جارمەڭكە بولىپ, وعان 250 اگروقۇرىلىم قاتىستى. بۇل جۇمىستار جىلدىڭ اياعىنا دەيىن جالعاسادى.
اگروقۇرىلىمدارمەن جەم-شوپكە بايلانىستى جاسالعان ءبىر جۇمىس سابانعا بايلانىستى. شەتەلدىك كومباينداردىڭ ءبارى ونى ۇساقتاپ تاستاپ, قاراتوپىراقپەن ارالاستىرىپ جىبەرەتىن. بيىلعى قۋاڭشىلىقتى ەسكەرىپ وبلىس باسشىلارى اگروقۇرىلىمدارمەن ساباندى ساقتاۋعا كەلىستى. ەرتەڭگى كۇنى ۇلكەن وراق باستالعاندا ساباندى دا ءۇيىپ الۋ نەمەسە ونى قۋاڭشىلىقتان جاپا شەگىپ جاتقان ايماقتارعا جونەلتۋ كوزدەلىپ وتىر.
ال ماڭعىستاۋلىق باۋىرلارعا دەگەن جەمشوپ كومەگى ماردىمدى دەپ ايتا المايمىز. وسى كۇنگە دەيىن ول جاققا ءبىر ۆاگون كەبەك قانا جونەلتىلگەن ەكەن. ونىڭ ءوزىنىڭ قانداي اۋىلدارعا بارعانى بەلگىسىز, تەك ماڭعىستاۋلىق اعايىن قابىلداپ الىپتى. الداعى ۋاقىتتا بۇل شارۋاعا جىتىلىك كەرەك ەكەنى كورىنىپ تۇر.
سولتۇستىك قازاقستان وبلىسى
