اتالعان يگىلىكتى ءىس ايماقتىڭ بەلسەندى ازاماتتارىنىڭ ۇسىنىسىمەن قولعا الىنعان. بۇل شاراعا ءوڭىردىڭ اۋداندارى دا ۇلەس قوسىپ وتىر. ت.رىسقۇلوۆ اۋدانى جاڭاتۇرمىس اۋىلىنىڭ تۇرعىندارى مەن ەرىكتىلەرى ارال قالاسىنا ءۇش ۆاگون ءشوپ جونەلتتى. اۋىل تۇرعىندارىنىڭ ارنايى باستاماسى مەن قولداۋى بۇدان كەيىن دە جالعاسادى.
جالپى, بۇگىندە مال باسىن ساقتاپ قالۋ ماڭىزدى بولىپ وتىر. وسى ورايدا اتالعان اۋداننىڭ اقىرتوبە جانە تەرەڭوزەك اۋىلىنىڭ تۇرعىندارى دا سىر ەلىنە مال ازىعىن جىبەرگەن بولاتىن. سول سياقتى تاراز, شۋ, لۋگوۆوي جانە جاڭاتاس تەمىر جول ستانسالارىنداعى ۆاگوندارعا وبلىسىمىزدىڭ بارلىق اۋدانىنان كەلگەن جوڭىشقا, پىشەن جانە تابيعي ءشوپ ارتىلىپ, سىر ەلىنە جول تارتتى.
«كوپ تۇكىرسە – كول» دەگەندەي, ءبىرى ۇيىنە جيناپ قويعان جوڭىشقاسىن, ءبىرى ورىپ الىپ قويعان ءشوبىن دە بەرۋدە. ءتىپتى قارجىلاي قولداۋ كورسەتكەن ازاماتتار دا بار ەكەن. ماسەلەن, بايزاق اۋدانى ىنتىماق اۋىلدىق وكرۋگىنە قاراستى «بىرلىك» شارۋا قوجالىعى دا بۇل ىسكە ءوز ۇلەستەرىن قوسىپ, 300 باۋ جوڭىشقا جىبەرىپتى. «سىن ساعاتتا بىرلىگىمىز سىنالادى, بىرگە بولساق – ىنتىماعىمىز ارتادى. ءبىزدىڭ ماقسات – ۋاقىت وزدىرماي, قۋاڭشىلىققا تاپ بولعان اعايىنعا ءشوپتى ەرتەرەك جەتكىزۋ», دەيدى «بىرلىك» شارۋا قوجالىعىنىڭ جەتەكشىسى رۇستەم اقىلبەكوۆ.
ال وبلىستىق اۋىل شارۋاشىلىعى باسقارماسىنىڭ باسشىسى قايرات امانوۆ ايماقتا قاجەتتى ءىرى ساباقتى مال ازىعى قورىنىڭ جەتكىلىكتى ەكەنىن اتاپ ءوتتى.
«بۇگىنگى تاڭدا وبلىسىمىزدا مال ازىعىن دايىنداۋ جۇمىستارى جالعاسىن تابۋدا. مال قىستاتۋ ناۋقانىن ويداعىداي وتكىزۋ ءۇشىن 1,7 ملن توننا پىشەن دايىنداۋ جوسپارلانعان. بۇگىندە 1,5 ملن توننا پىشەن, 58 مىڭ توننا پىشەندەمە دايىندالدى. الدا سۇرلەم دايىنداۋ ناۋقانى تۇر. جالپى, وبلىستا ءىرى ساباقتى مال ازىعىنىڭ قورى قاجەتتى مولشەردە جينالدى. ەندى, مىنە, ءوڭىر شارۋالارىنىڭ ۇسىنىسىمەن قۋاڭشىلىقتان زارداپ شەككەن قىزىلوردا وبلىسىنىڭ ارال قالاسىنا, سەكسەۋىل كەنتى مەن قامىستىباس اۋىلدىق وكرۋگىندەگى شارۋالارعا جەمشوپ جەتكىزىلەدى», دەيدى ول.
بيىلعى اپتاپ ىستىق, اۋا رايىنىڭ قولايسىزدىعى قاراپايىم حالىققا وڭاي ءتيىپ وتىرعان جوق. دەسە دە, قارا جەردىڭ قويناۋىنان بۇيىرعان ريزىقتى اركىم ءوزىنىڭ ادال ەڭبەگىمەن ارشىپ الۋدا. ال قولدا باردى جاقىنىمەن بولىسكەن قازاقتىڭ بۇل قاراپايىم قاعيداسى كوپشىلىككە ۇلگى بولاتىنى انىق. جامبىلدىقتار الداعى ۋاقىتتا دا قىزىلوردالىق اعايىنعا قاجەتتى كومەك كورسەتىلەتىندىگىن جەتكىزدى.
