سپورتتىق شەجىرەنىڭ سارعايعان بەتتەرىن پاراقتاساق, توكيوداعى دوداعا دەيىن جەكپە-جەك تۇرلەرى بويىنشا ەرلەر اراسىندا وليمپيادانىڭ ءتورت دۇركىن چەمپيونى اتانعان بىردە-ءبىر دارابوز جوق ەدى. ءتىپتى, وسى بەلەستى ءۇش رەتتەن باعىندىرعان سپورتشىلاردىڭ وزدەرى ساناۋلى عانا. ماسەلەن, گرەك-ريم كۇرەسىن سەرىك ەتكەن ساڭلاقتاردىڭ ۇشەۋى عانا سول دەڭگەيدەن كورىندى. ولار – شۆەتسيالىق كارل ۆەستەرگەن, رەسەيلىك الەكساندر كارەلين جانە كۋبالىق ميحاين لوپەس.
ەركىن كۇرەستەن ءۇش دۇركىن وليمپيادا چەمپيونى اتانعان مارقاسقالاردىڭ سانى – ەكەۋ. العاشقىسى – بەلورۋس الەكساندر مەدۆەد. ەكىنشىسى – رەسەيلىك بۋۆايسار سايتيەۆ.
عالامدىق دودادا ءۇش رەت توپ جارعان بالۋاندار اراسىندا يۆار يۋحانسسون سىندى تۇلعانىڭ ورنى ەرەكشە. ال دزيۋدوشىلار اراسىنان جوعارىداعىداي قۇرمەتكە بولەنگەن جالعىز عانا بالۋان بار. ول – تاداحيرو نومۋرا. جاپونيالىق 1996-2004 جىلدار ارالىعىندا الاۋى تۇتانعان وليمپيا ويىندارى بارىسىندا قارسى كەلگەندەردى قوعاداي جاپىردى.
ءۇش دۇركىن وليمپيادا چەمپيونى اتاعىن جەڭىپ العان تۇڭعىش بوكسشى لاسلو پاپپ ەكەنىن جانكۇيەرلەر جاقسى بىلەدى. اراعا شيرەك عاسىرعا جۋىق ۋاقىت سالىپ لاسلو پاپپتىڭ كورسەتكىشىن تەوفيلو ستيۆەنسون قايتالادى. اسا اۋىر سالماقتا ايقاسقان كۋبانىڭ «قارا قابىلانى» 1972 جىلى ميۋنحەندە وليمپيا ويىندارىنىڭ جەڭىمپازى اتانىپ قانا قويماي, ەڭ ۇزدىك بوكسشىعا تيەسىلى ۆەل باركەر كۋبوگىن دا ولجالادى. 1976 جىلى مونرەال جانە 1980 جىلى ماسكەۋدە دە ونىڭ مەرەيى ۇستەم بولدى. تابانى كۇرەكتەي 15 جىل بويى 91 كگ سالماق دارەجەسىنىڭ تىزگىنىن ەشكىمگە ۇستاتپاعان فەليكس ساۆون دا ءدال سونداي جاعدايدى باسىنان كەشتى.
ال جەكپە-جەك تۇرلەرىنە اۋىر اتلەتيكانى دا قوسۋعا بولادى. باتپان تەمىرمەن بەتپە-بەت شىعاتىن جىگىتتەر اراسىندا وليمپيادانىڭ ءۇش دۇركىن چەمپيونى اتانۋ باقىتى ءتورت ساڭلاققا بۇيىردى. العاش رەت بۇل بەلەستى تۇركيانىڭ تارلانبوزى نايم سۋلەيمانوعلى باعىندىردى. باستاپقى كەزەڭدەردە ول بولگاريانىڭ نامىسىن قورعادى. كەيىننەن انادولى ەلىنە اتتاندى. نايم 1988-1996 جىلدار ارالىعىندا سەۋل, بارسەلونا جانە اتلانتادا اتوي سالدى.
پيرروس ديماس پەن كاحي كاحياشۆيلي 1992-2000 جىلدار ارالىعىندا تورتكۇل دۇنيەنىڭ تەڭدەسسىزدەرى ەكەنىن تۇبەگەيلى مويىنداتتى.
وليمپ شىڭىن ءۇش مارتە باعىندىرعان ءتورتىنشى زىلتەمىرشى – حاليل مۋتلۋ. ول دا نايم سۋلەيمانوعلى سەكىلدى بولگاريانىڭ تۋماسى. بىراق ەرتەرەكتە اتا-اناسىمەن بىرگە تاريحي وتانىنا ورالدى.
توكيوداعى دودادا جوعارىداعى ناتيجەلەر جاڭاردى. ال سول ساڭلاق جايىندا ءبىز نە بىلەمىز؟
ميحاين لوپەس 1982 جىلدىڭ 20 تامىزىندا كۋبانىڭ پينار-دەل-ريو قالاسىندا دۇنيەگە كەلدى. بويى – 195 سانتيمەتر, سالماعى 130 كگ. العاش رەت ول 2004 جىلى افينا وليمپياداسىندا كوپشىلىك نازارىنا ىلىكتى. ەجەلگى ەللادا ەلىندە «قارا قابىلان» شيرەك فينالعا دەيىن جەتىپ, سول مەجەدە رەسەيلىك حاسان باروەۆتان جەڭىلدى. ارادا ءتورت جىل وتكەن سوڭ بەيجىڭدە ءدال سول باروەۆتان باسىم ءتۇسىپ, العاش رەت وليمپيا ويىندارىنىڭ جەڭىمپازى اتاندى. 2012 جىلى لوندون جانە 2016 جىلى ريو-دە-جانەيرودا دا ءدال سول كورسەتكىشىن قايتالاپ, الەمدەگى ەڭ اتاقتى بالۋانداردىڭ ساناتىنا ەركىن قوسىلدى. ايتۋلى جارىستاردىڭ فينالىندا ول ەستونيالىق حەيكي نابي مەن تۇركيالىق رىزا كاياالپتى قاپى قالدىردى.
جوعارىداعى تابىسىنان بولەك, لوپەستىڭ بەس دۇركىن الەم چەمپيونى, سول جارىستىڭ ءۇش دۇركىن كۇمىس جۇلدەگەرى, بەس دۇركىن پانامەريكا ويىندارىنىڭ جەڭىمپازى جانە توعىز دۇركىن پانامەريكا چەمپيونى دەگەن اتاقتارى تاعى بار. كەزىندە ونىڭ بايراقتى باسەكەلەردەگى باستى قارسىلاسى حاسان باروەۆ بولسا, سوڭعى جىلدارداعى جارىستاردىڭ شەشۋشى تۇسىندا رىزا كاياالپپەن جولى ءجيى قيىسۋدا. رەسمي جارىستاردا ولار التى رەت كۇش سىناستى. تۇركيانىڭ تارلانبوزى لوپەستى 2011 جانە 2015 جىلدارداعى دۇنيەجۇزىلىك دودانىڭ فينالىندا ۇتسا, قالعان التى ايقاستا بوستاندىق ارالى وكىلىنىڭ اسىعى الشىسىنان ءتۇستى.
بوستاندىق ارالىندا ەڭبەكتەگەن بالادان, ەڭكەيگەن قارتقا دەيىن ميحايندى ءپىر تۇتادى. بارشا جۇرت ونى ەرەكشە قۇرمەتتەپ, ايرىقشا قاستەرلەيدى. قازىرگى كەزدە لوپەستىڭ سۋرەتى كۋباداعى ءاربىر كەڭسە مەن ءاربىر شاڭىراقتىڭ تورىندە ءىلۋلى تۇر. ءبىر عانا مىسال, وليمپيا ويىندارىنىڭ ءدۇبىرى ەستىلگەن سايىن «اشىلۋ سالتاناتىندا مەملەكەتتىك تۋدى ۇستاپ شىعۋدى كىمگە سەنىپ تاپسىرساق ەكەن؟» دەگەن ماسەلە تۋىنداعان كەزدە ءتۇرلى دەڭگەيدەگى باسشىلار مەن باپكەرلەردەن باستاپ, سپورتشىلاردىڭ بارلىعى دا ءبىراۋىزدان لوپەستىڭ ەسىمىن اتاۋدا. وسى جايتتان-اق ءوز ەلىندە ايتۋلى سپورتشىنىڭ بەدەلى قانشالىقتى زور ەكەنىن اڭعارۋعا بولادى. داڭقى جەر جارعان بالۋان كۋبانىڭ تۋىن 2008 جىلى بەيجىڭ, 2012 جىلى لوندون جانە 2016 جىلى ريو-دە-جانەيرو وليمپيادالارىنىڭ اشىلۋ سالتاناتىندا ۇستاپ شىقتى.
توكيو وليمپياداسىندا ميحاين لوپەستىڭ قارقىنىنا ەشكىم شىداي المادى. باستاپقى باسەكەلەردە رۋمىنيالىق الين-الەكسۋك-چۋراريۋ (9:0) مەن يراندىق امين مىرزازادەنىڭ (8:0) تاس-تالقانىن شىعارعان ول جارتىلاي فينالدا ءوزىنىڭ باستى قارسىلاسى رىزا كاياالپقا (2:0) ەش مۇمكىندىك بەرمەدى. وزىنە قاجەتتى ەكى ۇپايدى قورجىنعا سالدى دا, ايقاس اياقتالعانعا دەيىن تىرەسىپ ءجۇرىپ الدى. سونىڭ ءوزى جەڭىسكە جەتۋ ءۇشىن جەتكىلىكتى بولدى. فينالدا كۋبانىڭ الىبى گرۋزيالىق ياكوب كادجايانى (5:0) قاپى قالدىردى. وسىلايشا, لوپەس جەكپە-جەك تۇرلەرىنەن ءتورت دۇركىن وليمپيادا چەمپيونى اتانعان العاشقى سپورتشى رەتىندە ءوز ەسىمىن تاريحقا التىن ارىپتەرمەن جازدى. ەندى بۇل ناتيجەنى قايتالاۋ كىم-كىمگە بولسا دا اسا قيىن بولادى. ءبىر كەرەمەتى, توكيو تورىندە ميحاين قارسىلاستارىنا سوقىر ۇپاي ۇستاتپادى. ءتورت باسەكەنىڭ قورىتىندىسى بويىنشا 24:0 ەسەبى تىركەلدى. مىنە, بوستاندىق ارالىنىڭ باعىنا تۋعان ميحاين لوپەستىڭ بولمىسى وسىنداي!
