بەي-بەرەكەت تاراتىلعان جەر ماسەلەسى تياناقتالدى

ءبىر كەزدەرى الماتى وبلىسى مەن الماتى قالاسى ماڭىنداعى جەر تەلىمدەرىنىڭ زاڭسىز ۇلەستىرىلگەنى انىقتالىپ, وسىعان وراي ەلباسى ءتيىستى مەكەمەلەرگە ەرەكشە تاپسىرما بەرگەن بولاتىن. بۇل ماسەلە بويىنشا ۇكىمەت باسشىسى وكىمىمەن قۇرىلعان – قۇرامىنا باس پروكۋراتۋرا, قارجى پوليتسياسى جانە اتقارۋشى بيلىك ورگاندارى وكىلدەرى كىرگەن جۇمىس كوميسسياسى كەشەندى تەكسەرىستەر جۇرگىزىپ, ءبىرشاما زاڭسىزدىقتارعا جول بەرىلگەنى انىقتالعان بولاتىن. ال وسى وزەكتى ماسەلەنىڭ بۇگىنگى تاڭداعى جاعدايىن تيا­ناقتاۋ ماقساتىندا الماتى قالاسى جانە الماتى وبلىسى وڭىرارالىق جەر ينسپەك­تسياسىندا جەر رەسۋرس­تارىن باسقارۋ اگەنتتىگىنىڭ توراعاسى ومىرزاق ءوزى­بەكوۆتىڭ قاتىسۋىمەن كەڭەيتىلگەن كەڭەس بولىپ ءوتتى. باسقوسۋدا قالا ماڭىنداعى جەر تەلىمدەرىن زاڭسىز يەلەنۋدىڭ ءمان-جايى, قالا ىرگەسىندەگى اۋىل­شارۋا­شىلىق ماقساتقا ارنالعان جەرلەردى وزگە قۇرى­لىستارعا پايدالانۋ جونىندە جانە مەملەكەت باسشىسىنىڭ ارنايى “الماتى وبلىسى مەن الماتى قالاسى اۋماعىنداعى ەرەكشە قورعاۋعا الىنعان تابيعاتى اسەم اۋداندارىن پايدالانۋدى رەتتەۋ تۋرالى” جەكە تاپسىرماسىنىڭ ورىندالۋ بارىسى جونىندە تالقىلاۋ بولىپ, جاۋاپتى مەكەمە باسشىلارى ەسەپ بەردى. الماتى قالاسى جانە وبلىسى وڭىرارالىق جەر ينسپەكتسياسىنىڭ باستىعى ابدىعالي بەگمانوۆتىڭ ايتۋى بويىنشا, جەردى زاڭسىز باسىپ الۋعا كوبىنە الماتى قالاسىنداعى جاڭادان قۇرىلعان الاتاۋ اۋدانىندا جول بەرىلگەن. تەكسەرۋ بارىسىندا 2008 جىلى زاڭعا قايشى ارەكەت جاساعان 313 جەكە تۇلعا اكىمشىلىك جازاعا تارتىلىپ, ولارعا 4,8 ملن. تەڭگە كولەمىندە ايىپپۇل سالىندى. اۋدانداعى قۇزىرلى مەكەمەلەردەن جانە جەر ينسپەكتسياسىنىڭ وكىلدەرىنەن قۇرىلعان كوميسسيا مۇشەلەرى زاڭسىز قورشاۋعا الىن­عان جەر تەلىمدەرىن جانە بوي كوتەرگەن تۇرعىن ۇيلەردى ەسەپكە العاندا ءوز بەتىمەن زاڭسىز سالىنعان 4523 قۇرىلىس نىساندارى انىقتالعان. سونداي-اق انىقتاۋ كەزىندە جەر تەلىمدەرىنە جەرگىلىكتى اتقارۋشى بيلىكتىڭ جالعان شەشىمدەرىن قولدان جاساۋ ارقىلى قاراپايىم حالىقتىڭ سەنىمىنە كىرىپ پايدا تاۋىپ جۇرگەن الاياقتار دا بەلگىلى بولىپ, ولاردىڭ ۇستىنەن قىلمىستىق ءىس قوزعالعان. 2009 جىلى جەر تەلىمدەرىن تەكسەرۋ قورى­تىن­دىسىندا اتالعان اۋدان بويىنشا 4237 اكىمشىلىك ءىس قوزعالىپ, زاڭعا قايشى ارەكەت جاساعاندارعا 79,9 ملن. تەڭگە ايىپپۇل سالىنعان. وڭىرارالىق جەر ينس­پەكتسياسى مەن جەرگىلىكتى اتقارۋشى بيلىك وكىل­دەرىنىڭ بىرلەسكەن تەكسەرۋلەرى 2010 جىلى دا ناتيجەلى اياقتا­لىپ, ءبىرىنشى توقساندا زاڭدى بەلىنەن باسقان 87 جەكە تۇلعا ۇستىنەن اكىمشىلىك ءىس قوزعالىپ, ولاردان 6,1 ملن. تەڭگە ايىپپۇل وندىرىلگەن. مۇنداي ءىس-شارالار ءتۇر­كىسىب اۋدانىنداعى “باقاي” شاعىن اۋدانىندا دا جۇزە­گە اسىرىلىپ, بۇگىنگى كۇنى 317 اكىمشىلىك قۇقىق بۇزۋشىلىق انىقتالعان. سونىمەن قاتار, وڭىرارالىق جەر ينسپەكتسياسىنىڭ باسشىسى اسىرەسە 2005-2008 جىلدارى جەر تەلىمدەرىنىڭ بەي-بەرەكەت ساۋداعا سالىنعانىن تىلگە تيەك ەتتى. قولدانىستاعى جەر زاڭناماسى تالاپتارىن ساقتاماۋ سالدارىنان جەرگىلىكتى اتقارۋشى ورگاندار مەدەۋ, ىلە الاتاۋى ۇلتتىق پاركى ەرەكشە قورعالاتىن ايماق­تارىندا جانە الماتى قالاسىنىڭ توڭىرەگىندە ورنالاس­قان بىرنەشە جەر تەلىمدەرىن زاڭداردى بۇزا وتىرىپ, زاڭدى تۇلعالار مەن جەكە ازاماتتارعا قۇرىلىس نىسان­دارىن سالۋ ءۇشىن بەرىپ جىبەرگەن. وسىعان وراي بىلتىر­عى شىلدە ايىندا قولدانىستاعى زاڭدارعا ونداي زاڭ بۇزۋشىلىقتى بولدىرماۋ ماقساتىندا ءبىرشاما وزگەرىس­تەر دە ەنگىزىلدى. بۇگىنگى كۇنى الماتى قالاسىنىڭ ماڭىن­دا ورنالاسقان جەرلەردىڭ تابىس ەتىلۋىن رەتكە كەلتىرۋ, ولاردىڭ پايدالانىلۋىن جەر زاڭناماسى تالاپتارىنا سايكەستەندىرۋ ماقساتىندا قالا قۇرىلى­سىن جوسپارلاۋدىڭ كەشەندى جوباسى دايىندالىپ, ۇكىمەتتىڭ بەكىتۋىنە جىبەرىلگەندىگى باياندالدى. بەي-بەرەكەت تاراتىلعان جەر ماسەلەسى تياناق­تال­عان باسقوسۋدا جەر رەسۋرستارىن باسقارۋ اگەنتتى­گىنىڭ توراعاسى ومىرزاق وزىبەكوۆ كەڭەستە ءسوز بولعان ماسەلە­لەردى قورىتىندىلاپ, جەر ماسەلەسى ەلباسىنىڭ نازارىندا ەكەن­دىگىن, سوندىقتان الداعى ۋاقىتتا بۇل كۇردەلى ماسەلە­لەر بويىنشا جان-جاقتى جۇمىستار جۇرگىزىلەتىنىن ايتتى. دانيار بەرىك ۇلى.  الماتى.