الەم • 05 تامىز، 2021

قىرعىزستاندا ەكس-پرەمەر-مينيستر قاماۋعا الىندى

44 رەت كورسەتىلدى

پەرۆوماي اۋداندىق سوتى تەمير ساريەۆكە قاتىستى بۇلتارتپاۋ شاراسىن تاڭدادى، دەپ حابارلايدى Egemen.kz 24.kg سايتىنا سىلتەمە جاساپ.

ساريەۆ سوت شەشىمىمەن ەكى ايعا، ياعني 30 قىركۇيەككە دەيىن مەملەكەتتىك ۇقك تەرگەۋ يزولياتورىنا قامالدى. ول «قۇمتور» التىن كەنىشىن يگەرۋ جوباسىن جۇزەگە اسىرۋ كەزىندە سىبايلاس جەمقورلىق ءىسى بويىنشا ۇستالدى.

ء«بىز سوت شەشىمىمەن كەلىسپەيمىز. تاعىلعان ايىپتاۋلار ويعا قونىمسىز. ەش دالەلى جوق جانە قىرعىز رەسپۋبليكاسىنىڭ قىلمىستىق ءىس جۇرگىزۋ كودەكسىنىڭ نورمالارىنا سايكەس كەلمەيدى. ءبىز بۇل شەشىمگە جوعارى ورگاندارعا شاعىمدانامىز»، دەدى ادۆوكات تيمۋر سۇلتانوۆ.

ايتا كەتەيىك، ەكى ايعا پارلامەنتتىڭ بۇرىنعى جانە قازىرگى دەپۋتاتتارى ءتوروباي زۇلپۋكاروۆ پەن يسحاك پيرماتوۆ تا ۇقك تەرگەۋ يزولياتورىنا قامالدى. بۇرىنعى پرەمەر-مينيستر ومۋربەك بابانوۆ، پارلامەنتتىڭ بۇرىنعى سپيكەرى اسىلبەك جەەنبەكوۆ جانە پرەمەر-ءمينيستردىڭ ءبىرىنشى ورىنباسارى تايىربەك سارپاشەۆ سوت شەشىمىمەن قاماۋعا الىندى. ال 3 تامىزدا ەكس-پرەمەر تەمير ساريەۆ ۇستالدى. ولاردىڭ جاقتاستارى بۇل تۇتقىنداۋلاردىڭ ساياسي استارى بار دەپ سانايدى.

بۇعان دەيىن بىشكەكتىڭ پەرۆوماي اۋداندىق سوتى تەرگەۋمەن ىنتىماقتاستىقتا بولعانى ءۇشىن دەپۋتات تالانت ۇزاقباەۆ، المازبەك بااتىربەكوۆ پەن يسحاك پيرماتوۆتى قاماۋدان بوساتتى. ومۋربەك بابانوۆقا قاتىستى دا بۇلتارتپاۋ شاراسى وزگەرتىلدى. ول ەمدەلۋ ءۇشىن شەتەلگە ۇشادى.

بۇرىنعى پرەزيدەنت اسقار اقاەۆ تا بىشكەككە كەلدى، ول دا «قۇمتور» ءىسى بويىنشا تەرگەۋمەن ىنتىماقتاسۋعا كەلىستى.

سوڭعى جاڭالىقتار

ۇقساس جاڭالىقتار