TOKYO2020 • 05 تامىز، 2021

گرەك-ريم كۇرەسىنەن قۇرامانىڭ باس باپكەرى وليمپيادانى قورىتىندىلادى

19 رەت كورسەتىلدى

توكيوداعى وليمپيادا ويىندارىندا گرەك-ريم كۇرەسى شەبەرلەرىنىڭ باسەكەسى اياقتالدى. اتالعان سىن قازاقستان كومانداسى ءۇشىن ءساتتى وتكەن جوق. كوماندا ساپىنان سىنعا تۇسكەن ءۇش سپورتشى دا ءبىرىنشى اينالىمدا ۇتىلدى.

باس باپكەر باقتيار بايسەيىتوۆ كوماندانىڭ ناتيجەسىن ساراپتاپ، ساتسىزدىكتىڭ باستى سەبەپتەرىن جانە الداعى جوسپارلارىن ايتتى. 

«كوماندانىڭ وليمپياداداعى ناتيجەسىنە قانداي باعا بەرۋگە بولادى؟ ارينە، كورسەتكىش وتە تومەن. ءبىز قاتەلىكتەرمەن ناقتى جۇمىس ىستەيمىز، ويتكەنى، كوماندانىڭ كەمشىلىگى كوپ بولدى. ءبىز ءبىر نارسەنى تۇسىندىك. سپورتشىلارعا فيزيكالىق تۇرعىدان عانا ەمەس، پسيحولوگيالىق جاعىنان دا كوپ قولداۋ قاجەت ەكەن. باپكەرلەر تاپسىرماسىن ورىنداي الماعان مەيرامبەك ايناعۇلوۆ تۋرالى ايتالىق. ول كىلەمگە شىعاردا كوزىندە وت بولعان جوق. سوندىقتان، قانداي دا ءبىر ناتيجە شىعارا المادى. ءبىز ءاربىر ءساتتى تالقىلاپ، ستراتەگيامىزدى فەدەراتسيا جانە ۇوك-پەن بىرلەسىپ دايىندايمىز.

جادىراەۆ تۋرالى ايتار بولسام، ول ءبارىن جاقسى باستادى. كۇشى دە، بابى دا جاقسى بولعان. ەل نامىسىن قورعاۋعا تولىق دايىن ەدى. بىراق ەكىنشى كەزەڭدە قاتە جىبەرە باستادى. ءبىز ايتقان كەڭەستەردى مۇلدە ەستىگەن جوق. بەلدەسۋدىڭ بىتۋىنە سوڭعى سەكۋندتار قالىپ، جاپوندىق ءوز جەڭىلىسىن مويىنداي باستاعاندا قارسىلاسقا ۇپاي بەرىپ قويدى. دەمەۋ دە، باسقالارى دا مۇنى ءالى تۇسىنە الار ەمەس. ءبىز دە سول بەلدەسۋدە كەيىن ءوز وزىمىزگە كەلە المادىق.

نۇرسۇلتان تۇرسىنوۆقا كەلەر بوسلام، مەن چەللەندج ارقىلى تالاپ ەتكەن ەكى ۇپايدى العاندا، جەڭەتىن ەدىك. سول بەلدەسۋدەن ءوتىپ كەتكەندە، ول جارتىلاي فينالعا دەيىن جەتۋشى ەدى. ونىڭ ءادىسىن باعالامادى، چەللەندج سۇراسام دا، بىزگە ۇپاي بەرگەن جوق. نۇرسۇلتاندا دا ءبارى جاقسى بولدى. بىراق تورەشىلەر شەشىم كۇمان تۋدىرادى. بۇل سپورت بولعان سوڭ، جەڭىستىڭ دە، جەڭىلىستىڭ دە قاتار جۇرەتىنى بار. 

ءبىز بۇل ويىنعا ۇزاق دايىندالدىق. جاتتىعۋ جاقسى ءوتتى، دەر كەزىندە ۇشىپ كەلىپ، كليماتقا بەيىمدەلدىك. بىزگە دايىندالۋ ءۇشىن ەشتەڭە دە كەدەرگى بولعان جوق. جىگىتتەر دە بابىنا ەندى. ارينە، مەن ولاردان جاقسى ناتيجە كۇتتىم. بىراق، بولارى بولدى. دەسە دە، قورىتىندى ەسەپ ءدال وسىلاي بولادى دەپ ويلاعان جوقپىن. وسى ورايدا، ءبىزدىڭ ۋاقىتىلى جاتتىعۋ جيىنىن وتكىزۋىمىگە سەپتىگىن تيگىزىپ، قولداۋ كورسەتكەن قازاقستان ۇلتتىق وليمپيادالىق كوميتەتىنە العىسىمدى ايتقىم كەلەدى. فەدەراتسيا وكىلدەرى داۋلەت تۇرلىحانوۆ پەن اناتولي ۆولوحاعا دا كوپ راحمەت! سەرىك جۇماشەۆ، گريگوري كامىشەنكو، گەورگي تسۋرتسۋميادان قۇرالعان باپكەرلەر كەڭەسىنە العىسىم زور. 

جەدەل جۇمىس ىستەيتىن كوماندا جەتەكشىسى ابىلايحان قىلىشباەۆقا، ماسساجشى الىشەر كەنجەباەۆ پەن دارىگەر ازامات نۇرماتوۆتىڭ دا ەڭبەگى وراسان. ولاردىڭ بارلىعى وسىنداي قيىن زاماندا ءبىزدىڭ وليمپياداعا الاڭسىز دايىندالۋىمىزعا ۇلەسىن قوستى. 

ەندى العا جاڭا ماقساتتار قويامىز. قىركۇيەك ايىندا الەم چەمپيوناتى كۇتىپ تۇر. ەلگە ورالعان سوڭ تاعى دا قاتەلىكتەرمەن جۇمىس ىستەپ، كوماندانى الەم بىرىنشىلىگىنە دايىندايمىز. العا باسۋ كەرەك. ەل نامىسىن قورعاۋ ءۇشىن قايتادان جاڭا كۇشپەن كەلەمىز.  ارينە، كوماندامەن بىرگە ليتسەنزيا يەلەنىپ، ۇزدىكتەر اراسىندا سىنعا تۇسكەنىمىزگە قۋانىشتىمىن. وكىنەتىن تۇستارىم دا كوپ. بىراق ءدال قازىر ەشتەڭە وزگەرتە المايمىز. جىگىتتەرمەن بىرگە جانكۇيەرلەردى الداعى جارىستاردا قۋانتۋعا تىرىسامىز. 

قازىرگى ناتيجەنى ايتا كەلە، ەشكىمدى دە كىنالاعىم كەلمەيدى. بۇل جەردە جۇيە كىنالى. بىزدە تاجىريبەسى از جاستار كوپ. سولاردى ىسكە قوساتىن ۋاقىت كەلدى. ەندى جاستاردى باقىلايمىز. ولاردى جاتتىعۋ جيىنىنا بۇرىنعىداي ءجيى شاقىراتىن بولامىز. كوروناۆيرۋسقا بايلانىستى ءبىز ءبارىنىڭ باسىن قوسىپ، جاتتىعۋ وتكىزە المادىق. وسى ولقىلىقتى رەتتەۋ قاجەت. جاستار تاجىريبەلى سپورتشىلارعا باسەلەستىك تانىتۋى ءۇشىن جۇمىس ىستەيمىز. بىزگە تالاناتتى جاستاردى تابۋ كەرەك. 2016 جىلى جاستار اراسىنداعى الەمدىك سىندا تەمىرلان شادۋكاەۆ قانا جۇلدە الدى. سودان بەرى تىنىشتىق، توپتى بۇزىپ-جارىپ كەلە جاتقان جاس جوقتىڭ قاسى. ازيادا ءوزىن جاقسى كورسەتكەن سۇلتان اسەت ۇلى بار. سول سەكىلدى جاستاردى قاتارعا قوسۋىمىز كەرەك. ءبارى الدا. ءبىز ەڭسەمىزدى تۇسىرمەي، ودان ءارى دامۋ ءۇشىن كۇش سالامىز. بۇل وليمپيادا ءساتسىز بولسا دا، ءبىزدى جاڭا جەتىستىكتەر، جاڭا جارىستار كۇتىپ تۇر. سول سىندارعا دايىندالامىز»، - دەيدى باس باپكەر.

سوڭعى جاڭالىقتار

ۇقساس جاڭالىقتار