قوعام • 02 تامىز، 2021

«قازاقستان شەتەلدىك باق كوزىمەن» حالىقارالىق بايقاۋىنىڭ جەڭىمپازدارى انىقتالدى

44 رەت كورسەتىلدى

بۇگىن قر سىرتقى ىستەر مينيسترلىگى جانە باس رەداكتورلار كلۋبى ەلىمىز تاۋەلسىزدىگىنىڭ 30 جىلدىعىنا ارنالعان «قازاقستان شەتەلدىك باق كوزىمەن» VI حالىقارالىق بايقاۋىنىڭ بەس جەڭىمپازىن انىقتادى، دەپ حابارلايدى Egemen.kz.

ۇيىمداستىرۋشى كوميتەتتىڭ قاراۋىنا 36 مەملەكەتتەگى اۆتورلاردان 60 ءوتىنىم كەلىپ ءتۇستى.

ءسىم مالىمەتىنشە، بايقاۋعا قاتىسۋشىلاردىڭ جۇمىستارى ەكونوميكا، ساياسات، حالىقارالىق قاتىناستار، مادەنيەت، تۋريزم، دەنساۋلىق ساقتاۋ، سپورت، قارۋسىزدانۋ، جاڭعىرمالى ەنەرگيا، ۇلى اباي جانە ءال-فارابي مۇرالارى سياقتى قازاقستانعا قاتىستى كەڭ اۋقىمدى تاقىرىپتارعا ارنالدى. ماتەريالار گازەتتەردە، جۋرنالداردا، ونلاين باق-تاردا، تەلەارنالاردا، پودكاستار مەن وزگە دە تانىمال بلوگ-پلاتفورمالاردا جاريالانعان.

جالپى العاندا، ۇيىمداستىرۋشىلاردىڭ پىكىرىنشە، بايقاۋعا شەتەلدىك جۋرناليستەردىڭ بەلسەندى قاتىسۋى شەتەلدىك باق-تىڭ قازاقستانعا دەگەن قىزىعۋشىلىعىنىڭ جوعارى ەكەندىگىن ايعاقتايدى.

كەلىپ تۇسكەن وتىنىمدەردى قاراۋ ناتيجەسىندە ادىلقازىلار القاسى كەلەسى جەڭىمپازداردى انىقتادى:

- تمد جانە بالتىق ەلدەرىنەن ۇمىتكەرلەردىڭ اراسىندا جۋرناليست نيكولاي جۋكوۆتىڭ (ليتۆا) «Kauno Diena» گازەتىندە جاريالانعان «قازاقستان ءبىر جىل ىشىندە بيلىكتىڭ ەۆوليۋتسيالىق ساباقتاستىعىنىڭ وزىندىك ۇلگىسىن كورسەتتى» اتتى ماقالاسى ۇزدىك دەپ تاڭدالدى.

- تسولمون بات-ەردەنەنىڭ (مونعوليا) «MNB Mongolian National Broadcaster» تەلەارناسىندا جارىق كورگەن «37 شاقىرىمداعى 37 جىلدىق جوسپارى بار كورشى» اتتى بەينەماتەريالى مەن ماقالاسى ازيا جانە تىنىق مۇحيت ايماعىنىڭ ەلدەرىنەن كەلىپ تۇسكەن وتىنىمدەردىڭ ىشىندە ۇزدىك دەپ تانىلدى.

- پاكىستاندىق اۆتور مەحمۋد ۋل حاسسان حاننىڭ «Islamabad Post» جانە «DNA News» باسىلىمدارىندا جارىق كورگەن قازاقستانداعى ساياسي جانە ەكونوميكالىق رەفورمالاردىڭ وزەكتى ماسەلەلەرىنە جانە اباي قۇنانباي ۇلىنىڭ رۋحاني مۇراسىنا ارنالعان ماقالالارى تاياۋ شىعىس جانە افريكا وڭىرىنەن كەلىپ تۇسكەن ۇزدىك ماتەريال بولىپ تانىلدى.

- وڭتۇستىك جانە سولتۇستىك امەريكادان كەلىپ تۇسكەن ۇسىنىستار اراسىنان ۇزدىك ماتەريال رەتىندە «كانادانىڭ بىرىككەن قاۋىمداستىقتارى» ۇەۇ مەن تەلەجۋرناليست ينگا كەرنەي-كەلنەر بىرلەسە دايىنداعان «قازاقستان كانادالىقتار كوزىمەن» اتتى بەينەماتەريال ىرىكتەلدى.

بۇعان دەيىن اتالىپ وتكەندەي، بايقاۋ جەڭىمپازدارى قازاقستانعا ساپارمەن كەلۋ مۇمكىندىگىنە يە بولادى.

ساپار اياسىندا ولار نۇر-سۇلتان، الماتى جانە تۇركىستان قالالارىنا، «بۋراباي» دەمالىس ايماعىنا بارىپ، ەلىمىزدىڭ تابيعي جانە مادەني نىساندارىن ارالايدى، بەلگىلى جۋرناليستەر، ديپلوماتتار جانە قوعام قايراتكەرلەرىمەن كەزدەسە الادى.

سوڭعى جاڭالىقتار

ەڭبەكپەن ەسەيگەن ەر

قازاقستان • كەشە

بەيتانىس ساعىنىش

الەم • كەشە

جالعىزدىق ارالى

كينو • كەشە

ەلوردادا قار جاۋادى

قازاقستان • كەشە

بۇگىن ماشينا جاساۋ كۇنى

قازاقستان • كەشە

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار