ايماقتار • 02 تامىز، 2021

قاسىم حانعا ارنالعان كونفەرەنتسيا وتەدى

38 رەت كورسەتىلدى

«سارايشىق» مەملەكەتتىك تاريحي-مادەني مۋزەي-قورىعى بيىلعى 27 قازاندا قازاق حاندىعىنىڭ اتاقتى بيلەۋشىسى قاسىم حان جانىبەك ۇلىنىڭ سارايشىقتا جەرلەنگەنىنە 500 جىل تولۋىنا وراي «قاسىم حان جانە سارايشىق: قازاق مەملەكەتتىلىگى تاريحىندا» تاقىرىبىندا رەسپۋبليكالىق عىلىمي-تاجىريبەلىك كونفەرەنتسيا وتكىزبەك، دەپ حابارلايدى Egemen.kz.

قازبەك قۇتتىمۇرات ۇلى

«سارايشىق» مەملەكەتتىك تاريحي-مادەني مۋزەي-قورىعى 2019 جىلى اتىراۋ قالاسىندا التىن وردانىڭ 750 جىلدىعىنا ارنالعان «جوشى ۇلىسى جانە سارايشىق: قازاق مەملەكەتتىلىگى باستاۋىندا» حالىقارالىق عىلىمي-تاجىريبەلىك كونفەرەنتسيا، 2020 جىلى نۇر-سۇلتان قالاسىندا قاسىم حاننىڭ تۋعانىنا 575 جىل تولۋىنا وراي «سارايشىق – ۇلى دالا مۇراتى: مەملەكەتتىلىك جانە تاريحي ساباقتاستىق» اتتى دوڭگەلەك ۇستەل ءماجىلىسىن ۇيىمداستىرعان بولاتىن. مىنە، وسى جيىنداردا باستاۋ العان قازاق مەملەكەتتىلىگى تاريحىنداعى وزەكتى ماسەلەلەردى ءارى قاراي زەردەلەۋ ماقساتىندا تاريحشىلاردىڭ باسىن قوسامىز. ەل پرەزيدەنتى قاسىم-جومارت توقاەۆ «تاۋەلسىزدىك بارىنەن قىمبات» ماقالاسىندا ۇلت تاريحىندا وشپەس ءىز قالدىرعان كورنەكتى تۇلعالاردىڭ ەڭبەگىن ناسيحاتتاۋ اسا ماڭىزدى جۇمىس ەكەنىن ەرەكشە اتاپ وتكەن بولاتىن»، دەيدى مۋزەي-قورىقتىڭ ديرەكتورى، تاريح عىلىمدارىنىڭ دوكتورى ابىلسەيىت مۇحتار.

ۇلت تاريحىندا قاسىم حان جانىبەك ۇلىنىڭ ورنى ەرەكشە. ول ءحVى عاسىردىڭ العاشقى شيرەگىندە قازاق حاندىعىنىڭ ىرگەسىن بەكىتكەن، كورشى ەلدەرمەن ديپلوماتيالىق قارىم-قاتىناس ورناتقان، قازاق مەملەكەتىن شەت ەلدەرگە مويىنداتقان تاريحي قايراتكەر. اتاقتى حان قاسىم 1445 جىلى دۇنيەگە كەلىپ، 1521 جىلى سارايشىقتا قايتىس بولدى. قاسىم جەڭىمپاز قولباسشى، ۇلكەن ۇلىستىڭ بەدەلدى سۇلتانى، كەيىننەن قازاق حانى، ەل اراسىندا «قاسىم حاننىڭ قاسقا جولى» اتالىپ كەتكەن زاڭدار جيناعىن دۇنيەگە اكەلگەن رەفورماتور بيلەۋشى. قاسىم جانىبەك ۇلى قازاق حاندىعىن بيلەگەن كەزەڭدە، جوشى ۇلىسىنىڭ، كەيىننەن نوعاي ورداسىنىڭ استاناسى بولعان سارايشىق قالاسى قازاق حاندىعىنىڭ استاناسىنا اينالدى. قازاقستان رەسپۋبليكاسى تاۋەلسىزدىگىنىڭ 30 جىلدىعىمەن تۇسپا-تۇس كەلىپ وتىرعان بۇل مەرەيلى داتا وتاندىق تاريحناماعا جاڭا دەرەكتەر قوسىپ، مەملەكەتتىكتىڭ ىرگەتاسىن بەكىتە تۇسەرى انىق.

كونفەرەنتسياعا تاريحشىلار، ارحەولوگتار، ەتنولوگتار، ەتنوارحەولوگتار، ولكەتانۋشىلار، گەوگرافتار، فيلولوگتار، تاريحي-مادەني مۇرالاردى قورعاۋ جونىندەگى ماماندار شاقىرىلعان.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز