ايماقتار • 02 تامىز، 2021

كاسىپكەردەن پارا العان شەنەۋنىك قۇرىقتالدى

2284 رەت كورسەتىلدى

بۇل ماسەلەگە باياعىدا نۇكتە قويىلۋى كەرەك ەدى. گلۋبوكوە اۋدانىنداعى «پريرتىشە 1» جشس باسشىسى ۆيكتور لەونتەۆ كاسىبىن دوڭگەلەتۋدەگى كەدەرگىلەردىڭ بارىن ايتىپ، ءتيىستى ورىندارعا ءبىر ەمەس، بىرنەشە رەت شاعىمدانعان. ەندى مىنە، گلۋبوكوە اۋدانى اكىمىنىڭ ورىنباسارى پارا الدى دەگەن كۇدىكپەن قۇرىقتالدى، دەپ حابارلايدى Egemen.kz inbusiness.kz سايتىنا سىلتەمە جاساپ.

رەسمي پورتالدارداعى مالىمەتتەرگە كوز جۇگىرتسەك، سوت كابينەتىندە وسى ءىس بويىنشا باستى سوت تالقىلاۋىن 12 شىلدەگە تاعايىنداۋ تۋرالى 2021 جىلعى 29 ماۋسىمداعى قاۋلى جاريالانعان. ول جەردە ءىستى توقتاتا تۇرۋ جانە توقتاتۋ ءۇشىن ەشقانداي نەگىز جوق دەلىنگەن. كۇدىكتىنى كۇزەتپەن ۇستاۋ تۇرىندەگى بۇلتارتپاۋ شاراسى وزگەرىسسىز قالدى.

ال اۋدان اكىمىنىڭ ورىنباسارى 24 ساۋىردە «پريرتىشە 1» جشس باسشىسى ۆيكتور لەونتەۆتىڭ وتىنىشىنەن كەيىن ۇستالعان كورىنەدى. ول لاۋازىمدى تۇلعالاردىڭ ورىندالعان جۇمىستار اكتىسىنە كەدەرگىسىز قول قويعانى ءۇشىن اقشا قاراجاتىن بوپسالاۋ دەرەگىنە جانە قۇنى 56 ميلليون تەڭگە بولاتىن اۋداندىق ماڭىزى بار اۆتوجولداردى قىسقى جانە جازعى كۇتىپ-ۇستاۋ بويىنشا كورسەتىلەتىن قىزمەتتەرگە تەندەر وتكىزۋ بارىسىندا ونىڭ كاسىپورنى بىلىكتىلىك تالاپتارىنا سايكەس كەلمەۋىن العا تارتا وتىرىپ، زاڭسىز جارامسىز دەپ تانىلعانىنا شاعىمداندى. شىن مانىندە، كاسىپورىن 15 جىلدان اسا ۋاقىت اۋدان جولدارىنا قىزمەت كورسەتىپ كەلگەن ەكەن.

«كومپانيا بۇعان دەيىن مەملەكەت مەنشىگىندە بولىپ، جول جوندەۋمەن اينالىسقان. 2019 جىلى عانا جەكەشەلەندىرىلىپ، تىڭ كۇشپەن جۇمىسقا كىرىسكەن. الايدا، جەكەشەلەندىرۋ شارتىنىڭ نەگىزىندە كاسىپورىن 5 جىل ىشىندە ماقساتىن وزگەرتە المايدى. ونىڭ ماقساتى، اۋداندىق ماڭىزى بار جولداردى كۇتىپ ۇستاۋ ەدى. ياعني، كومپانيا بۇل جۇمىستاردان باسقا جۇمىستاردى ورىنداي المايدى»، دەيدى كومپانيا جەتەكشىسى ۆيكتور لەونتەۆ.

ونىڭ ايتۋىنشا، قازىرگى ۋاقىتتا 23 ادام جۇمىسسىز قالعان. اشپاعان ەسىگى، بارماعان جەرى قالماعان سوڭ ۆيكتور لەونتەۆ پرەزيدەنتكە جۇگىنۋگە ءماجبۇر بولعان. مەملەكەت باسشىسى كاسىپكەردىڭ شاعىمىن باس پروكۋراتۋراعا تەكسەرۋدى تاپسىرعان. ناتيجەسى مىنە، پارا الدى دەگەن كۇدىكپەن اۋدان اكىمىنىڭ ورىنباسارى ۇستالدى.

«حالىق ۇنىنە قۇلاق اساتىن مەملەكەت» تۇجىرىمداماسى وسىلاي جۇزەگە اسسا كەرەك-ءتى. تىپتەن، مەملەكەت باسشىسىنا جەتكىزبەي-اق وبلىس دەڭگەيىندە شەشىلەتىن ماسەلە ەدى. ونى قويدىق، قول استىنداعى قىزمەتكەر كۇدىككە ىلىنسە، باسشىلارى شە، زاڭ الدىندا جاۋاپ بەرمەي مە؟

سوڭعى جاڭالىقتار

ۇقساس جاڭالىقتار