TOKYO2020 • 01 تامىز، 2021

جەڭىلىستەن كوز اشپاي كەلەمىز...

518 رەت كورسەتىلدى

توكيو تورىنەن التىن مەدال، ءتىپتى كۇمىس مەدال قورجىنىمىزعا قاشان تۇسەدى دەپ جۇرگەندە حالقىنىڭ سانى 33 مىڭنان ءسال عانا اساتىن سان-مارينو ەلىنىڭ سپورتشىلارى 1 كۇمىس، 1 قولا مەدال جەڭىپ الدى. وليم­پياداعا بەس-اق سپورتشىسىمەن كەلگەن سانمارينولىقتار ءۇشىن بۇل – ۇلكەن جەتىستىك. ال 97 سپورتشىسىمەن كەلگەن ءبىزدىڭ قۇراما ءۇشىن ويلاناتىن ماسەلە. سەنگەن سپورتشىلارىمىز جارىستى ەرتە اياقتاپ جاتىر.

بۇگىن كۇرەس تۇرلەرىنەن باسەكە باستالدى. ايەلدەر اراسىندا 76 كيلوعا دەيىنگى سالماق دارەجەسىندە قازاقستان نامىسىن ەلميرا سىزدىقوۆا قورعاعان بولاتىن. وكىنىشكە قاراي، العاشقى بەلدەسۋدە ەلميرا قىرعىزستاندىق ايپەرى مەدەتقىزىنان 2:8 ەسەبىمەن ۇتىلدى. بۇل ءبىز ءۇشىن كۇتپەگەن جاعداي بولدى. سەبەبى ريو وليمپياداسىنىڭ قولا جۇلدەگەرى ەلميرا وليمپيادادا باستى فاۆوريتتەردىڭ ءبىرى ەدى.

وليمپيادادا ولجا سالادى دەگەن الەم چەمپيوناتىنىڭ قولا جۇلدەگەرى مەيرامبەك ايناعۇلوۆ تا قىرعىزستاندىق بالۋانعا ەش قارسىلىق كورسەتە المادى (0:8).

ەل ماقتاعان ەلەنا رىباكينانىڭ توكيوداعى سوڭعى ويىنىن كوردىك. تەننيسشى قىزعا سوڭعى ساتتە جانە سوڭعى سەتتە پسيحولوگيالىق دايىندىق جەتىسپەگەن سياقتى(ەسەپ – 6:1، 6:7، 4:6). قولا مەدال ءۇشىن وتكەن سايىستا ۋكراينالىق ەلينا سۆيتولينادان ەكىنشى سەتتە جەڭىلگەن سوڭ ءۇشىنشى سەتكە كۇشى جەتپەدى. بىراق سابىرلىلىعى ۇنادى. جەڭسە دە، جەڭىلسە دە سول قالپى. ناعىز كاسىبي سپورتشى. الەمدىك رەيتينگتە ۇزدىك جيىرمالىقتىڭ ىشىندە جۇرگەن قازاقستاندىق تەننيسشى كەلەسى وليمپيادادا توپ جارۋى ابدەن مۇمكىن. ال الدا ەلەنا US Open دوداسىنا قاتىسۋدى جوسپارلاپ وتىر.

«وتە اۋىر ماتچ. ەسەپتە تاعى دا الدا تۇر­دىم، كوپ جاعدايدا ويىندى ءساتتى اياقتاۋ قيىنعا سوقتى. فيزيكالىق جانە پسيحولوگيالىق تۇرعىدان قيىن بولدى. بۇگىن قولىمنان كەلگەنشە ءبارىن ىستەۋگە تىرىستىم، بىراق ساتتىلىك جەتىسپەدى. كورتقا شىعار الدىندا ازداپ اۋىرىپ قالدىم. جالپى العاندا، بۇل جاقسى ويىندارعا تولى كەرەمەت اپتا بولدى. مەن ءۇشىن ۇلكەن تاجىريبە بولعانى انىق. ارينە، جانكۇيەرلەر قاتىسپاعاندىقتان، كورتتاعى اتموسفەرا مۇلدە باسقا. پاريجدە وتەتىن كەلەسى وليمپياداعا قاتىسامىن دەگەن ويدامىن»، دەدى تەننيسشى.

سپورتتىق گيمناستيكادان ەركىن جاتتىعۋدا بەسىنشى ورىن العان ميلاد كاريميدىڭ جۇلدە الۋعا مۇمكىندىگى بار ەدى. جاتتىعۋ كەزىندە ول ءۇش رەت قاتەلەستى. ميلاد ورىنداعان جات­تى­عۋدىڭ قيىندىق كوەففيتسيەنتى – 6،400 ۇپاي. ال قولا مەدال العان قىتاي سپورتشىسى Cياو جوتەننىڭ قيىندىق كوەففيتسيەنتى – 6،200 ۇپاي. بىراق ميلاد قيىندىق كوەففيتسەنتى جوعارى بولسا دا، جاتتىعۋىندا قاتە جىبەردى. ال قىتاي سپورتشىسى از كوەففيتسيەنتتى تازا ورىنداپ، مەدال الىپ كەتتى. ميلاد 22 جاس­تا. جاراقاتتان امان بولسا، پاريج وليم­پيا­داسىندا جۇلدە الاتىن بىردەن-ءبىر ۇمىتكەر بولاتىنى انىق.

شيرەك فينالعا دەيىن جەتكەن ءتورت بوكس­شىمىزدىڭ ەكەۋى كەشە جارتىلاي فينالدىق ايقاسقا شىقتى. 75 كيلوداعى ءابىلحان امانقۇل برازيليالىق ەبەرت كونسەيسان سوۋزامەن كەزدەسكەن بولاتىن. وكىنىشكە قاراي، ءابىلحان وليمپيادانىڭ مەدالىنە قول جەتكىزە العان جوق. تارتىستى وتكەن باسەكەدە برازيليالىق بوكسشى 3:2 ەسەبىمەن باسىم ءتۇسىپ، جارتىلاي فينالعا ءوتتى. ال اسا اۋىر سالماقتا قامشىبەك قوڭقاباەۆ رەسەيلىك يۆان ۆەرياسوۆپەن كەزدەسىپ، جەرلەسىمىز 5:0 ەسەبىمەن جەڭىسكە جەتتى. جارتىلاي فينالدا قامشىبەك قوڭقاباەۆ امەريكالىق ريچارد توررەسپەن كەزدەسەدى.

ايتا كەتەيىك، بۇرناعى كۇنى ساكەن بيبو­سىنوۆ (52 كگ) پەن زاكىر سافيۋللين (63 كگ) شيرەك فينالعا جولداما الدى.

اكادەميالىق ەسۋدەن توكيو وليمپيا­داسىنا قاتىسقان جالعىز قازاقستاندىق سپورت­شى ۆلاديسلاۆ ياكوۆلەۆ جازعى ويىنداردى 19-ورىنمەن اياقتادى. سونداي-اق سا­داق اتۋدان ەرلەر اراسىندا جەكەلەي سىن­نىڭ 1/8 فينالىندا يلفات ابدۋللين قىتاي­لىق لي دجۋا لۋنگە 5:6 ەسەبىمەن جول بەردى. قازاقستاندىق جەڭىل اتلەت ميحايل ليتۆين توكيو وليمپياداسىندا 400 مەتر قاشىق­تىققا جۇگىرۋدەن جارتىلاي فينالعا شىعا المادى. ميحايل ليتۆين ءوزىنىڭ توبىندا 47:15 ناتيجەسىمەن 7-ورىن الدى. سۋ دوبىنان قازاقستان قۇراماسى توكيو وليمپيا ويىندا­رىندا چەرنوگوريا قۇراماسىنا قارسى ويىن وتكىزىپ، 12:19 ەسەبىمەن ۇتىلدى. ايتا كەتەر­لىگى، سۋ دوبىنان قازاقستان قۇراماسى وسىعان دەيىن حورۆاتيا (7:23)، سەربيا (5:19) جانە يسپاني (4 :16) قۇرامالارىنا جول بەردى.

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

ەكونوميكا • 24 قىركۇيەك، 2021

ۇقساس جاڭالىقتار