ايماقتار • 01 تامىز، 2021

ىزگىلىك ۇيالاعان ساندىقتاۋ

61 رەت كورسەتىلدى

جالپاق ەلگە جامان ىندەت شەڭگەلىن سالعالى ادامداردىڭ ءبىر-بىرىنە دەگەن قامقورلىعى كۇشەيىپ كەلەدى. ىزگى نيەت ىندەتتىڭ جۇگىن جەڭىلدەتىپ، سەنىمدى ارتتىرىپ، ەرتەڭگى كۇنگە دەگەن ءۇمىت وتىن لاۋلاتىپ تۇر.

كوپ كوڭىلىن دەمدەيتىن كوپ-كورىم جاناشىرلىق تۋرالى قۇ­لاقتانعان قاۋىم وزدەرى دە قاراپ وتىرماي، قولدا بارى­مەن ءبولىسىپ، ءبىرىن-ءبىرى قي­ىن شاقتا قولتىعىنان دەمەپ، بىر­لىكتىڭ ءتىنىن بەكەمدەي تۇس­كەن. اۋدانداعى بارلىق اۋىلدىق وكرۋگ­تە جاعدايعا تۇسى­نىس­تىكپەن قاراپ، كوپبالالى وت­باسىلار مەن جالعىزىلىكتى جان­دارعا دەمەۋ بولۋدا. اتىمتاي جومارتتاردىڭ اق نيەتىنەن تۋىن­داعان جۇرەك تەبىرەنتەر قام­قورلىقتىڭ شاپاعاتىنا بولەن­گەندەر وزدەرىنىڭ ەشۋاقىتتا يىقتارىنا تۇسكەن قيىندىقتى جالعىز كوتەرمەيتىنىن سەزىنىپ، ەڭسەسىن تىكتەي تۇسكەن. نەگىزىندە ءبىرىن-ءبىرى قولداپ، كوپ بولىپ جۇ­مىلىپ جاتقان جۇمىستى ءار­بىر اۋىلدىق وكرۋگتەگى جاستارمەن جۇمىس ىستەيتىن ماماندار ۇيىم­داستىرىپ وتىر. ولار اۋدا­ن تۇرعىندارىنا مىڭداعان بەتپەردە تاراتتى، ازىق-ت ۇلىك سە­بەتتەرىن تارتۋ ەتتى. ىندەتتەن قا­لاي قورعانۋعا بولاتىنىن ءتۇسىن­دىردى. بۇل جۇمىس ءالى دە جالعاسىپ جاتىر.

ساندىقتاۋلىق ەرىكتىلەر قا­ۋىپتىڭ قانشالىقتى زور ەكەنىن جەتەلەرىنە جەتكىزە وتىرىپ، ساق­تىق شارالارىن بۇلجىتپاي ورىن­داۋدىڭ قاجەت ەكەنىن قاپەرگە سالاتىن مىڭداعان اقپاراتتىق پاراقشا تاراتقان. ۆاكتسينا الۋدىڭ قانشالىقتى ماڭىزدى ەكەنىن ەل ىشىندە تاپتىشتەپ تۇ­سىندىرۋدە.

وتكەن جىلى اۋداندا جان جا­دىراتار جاقسىلىق ىستەر ۆو­لونتەر جىلىنا بايلانىستى ۇي­ىم­داستىرىلعان مارافونمەن باستالدى. ونداعى باستى ماق­سات – ەرىكتى بولۋ اركىمنىڭ قولىنان كە­لەتىنىن ايتا وتىرىپ، جال­پاق جۇرتتى جاقسى ىستەرگە جۇ­مىل­دىرۋ. جىل بويى قولى اشىق، پە­يىلى كەڭ ەرىكتىلەر ءاربىر اۋىلدىق وكرۋگتەگى تۇرعىنداردىڭ حال-احۋا­لىن كوزدەرىنەن تاسا ەتكەن جوق. الدىمەن قامقورلىقتى قا­جەت ەتەتىن وتباسىلاردىڭ ءتىزىمى جا­سال­دى. بۇل تىزىمگە قاريالار، مۇم­كىندىگى شەكتەۋلى ادامدار  ەنگىزىلدى.

قامقورلىق اياسىندا، اسىرەسە مەديتسينالىق باعىتتاعى شارۋالار پىسىقتالىپ، كەم-كەتىگى تولتىرىلىپ، قاتەرلى ىندەتپەن كۇرەسەتىن قاۋقار نىقتالا ءتۇستى. بۇل شارۋانىڭ بارلىعى ەل بىر­لىگىنە ارنالىپ وتىرعانىن ەك­پىن ءتۇسىرىپ ايتا كەتكەن ءلازىم. تۋعان توپىراقتىڭ مەرەيى دە ۇمىت قالعان جوق. ماسەلەن، ەرىك­تىلەر قاتەرلى ىندەت بۋىپ تۇر­عان كەزدە دە اۋىل-ايماقتى ابات­تان­­دىرىپ، سانيتارلىق تازا­لىق­­تى ءمىنسىز ەتۋدى قولعا الدى. «تۋ­عان جەر» باعدارلاماسى بو­يىن­شا اۋدانداعى ىسكەر جاندار اۋىل-ايماقتىڭ احۋالىنا جا­ناشىرلىقپەن قاراپ، دەمەۋ­شىلىك كومەك كورسەتە باستادى.

ءسوزىمىز جالاڭ بولماۋى ءۇشىن «بايدالى» سەرىكتەستىگىنىڭ باس­­شىسى مارات ءورازاليننىڭ اتقارىپ وتىرعان قىرۋار شارۋا­سى تۋرالى ايتا كەتكەنىمىز ورىندى. وتكەن جىلى سەرىكتەستىك جۇمىسشىسى يۆان پوپەرچاكتىڭ وتباسىنا كولەمى 190 شارشى مەتردى قۇرايتىن بەس بولمەلى ءۇي سالىپ بەردى. ادەمى شاتىرمەن كومكەرىلىپ، كوزتارتارلىقتاي ەتىپ قاپتالعان ەڭسەلى ءۇي الىستان مەنمۇندالايدى. شارۋاشىلىق ەسەبىنەن مەشىت، ناۋبايحانا سالىپ، جىلۋ قازاندىعىن ىسكە قوسىپ، فەلدشەرلىك-اكۋشەرلىك پۋنكتتى جابدىقتاپ، مەكتەپ وقۋ­شىلارىنىڭ بارلىق جاعدايىن جاساۋدا. بىلتىر «ديپلوممەن – اۋىلعا!» باعدارلاماسى ارقىلى كەلگەن 7 مۇعالىمدى قۇرقىلتايدىڭ ۇياسىنداي جىپ-جىلى، جايلى باس­پانامەن قامتاماسىز ەتىپتى. كا­دىمگى ەكى قاباتتى، ەڭسەلى ءۇي. ورتالىقتاندىرىلعان جىلۋ ار­قىلى جىلىتىلادى. فەلد­شەر­لىك-اكۋشەرلىك پۋنكتتى دە قام­قورلىعىنا العان. سەرىكتەستىك سىيعا تارتقان اپپاراتتار – مەديتسينا سالاسىنداعى ەڭ سوڭعى ۇلگىدەگى قۇرالدار. ءتىپتى اۋىل تۇ­گىل، اۋدان ورتالىعىنان دا تابىلا بەرمەۋى ابدەن مۇمكىن. تاياۋدا اناليز جاسايتىن امەريكالىق اپپاراتۋرالاردى 13 ملن تەڭگەگە الىپ بەرگەن.

– فاپ اۋىلدىق وكرۋگتەگى ۆە­سەلوە، جىلاندى، باراقپاي، نو­ۆوسەلوۆكا اۋىلدارىنىڭ تۇر­عىن­دارىنا، شامامەن العاندا 1،5 مىڭ ادامعا قىزمەت كورسەتەدى. سەرىكتەستىك اپەرگەن ەحوكگ اپپاراتىن ورناتىپ الدىق. الماتى مەن نۇر-سۇلتان قالالارىنان بىلىكتى ماماندار كەلىپ، قالاي جۇمىس ىستەيتىنىن كورسەتىپ بەردى. گەموتولوگيالىق اناليزاتور، بيو­حيميالىق اپپارات ارقىلى بار­لىق تالداۋدى جاساي الامىز. اۋىل تۇرعىندارى اناليز ءۇشىن اۋدان نەمەسە وبلىس ورتالىعىنا بارمايتىن بولدى، – دەيدى دارى­گەر، مەديتسينا عىلىمدارىنىڭ كانديداتى جىبەك ورازالينا.

وتكەن جىلى سەرىكتەستىك سۋ جاڭا جەدەل جاردەم كولىگىن سىيعا تارتقان. اۋىل تۇرعىندارىنىڭ باسى اۋىرىپ، بالتىرى سىزداي قالسا، اۋدان، وبلىسقا جەتكىزۋگە قاجەتتى جانار-جاعارماي سەرىك­تەس­تىكتىڭ موينىندا. بيىل كەڭ­شار­دىڭ بۇرىنعى كەڭسەسىن ساتىپ العان. ەندى وعان تولىعىمەن جون­دەۋ جۇمىسىن جۇرگىزىپ، اۋىلداعى ەمدەۋ مەكەمەسىنە بەرمەكشى. سول كەزدە ستانتسيونار دا جۇمىس ىس­تەي­تىن بولادى. ول عيماراتقا ۋچاس­­كەلىك ينسپەكتور، پوشتا ور­نا­لاسپاق.

اۋىل مەكتەبىندەگى 124 وقۋشى سەرىكتەستىك ەسەبىنەن ىستىق تا­ماقپەن قامتاماسىز ەتىلگەن. اس­­پازى دا سەرىكتەستىك ەسەبىنەن جا­­لاقى الادى. وقۋشىلارعا قا­جەت­تى سپورتتىق قۇرال-جاب­دىق­­­تار تۇگەل. حوككەي كوماندا­سىن جۇتىندىرىپ كيىندىرىپ قوي­­عان. ەكى جىل بۇرىن شاعىن فۋت­بولعا ارنالعان ساپالى، جا­ساندى جامىلعىسى بار سپورت الاڭىن سالىپ بەرىپتى. «مەكتەپ­كە جول» اكتسياسى اياسىندا 1-سى­نىپقا باراتىن بارلىق بالا­ وقۋ قۇرالدارىمەن، الەۋ­مەت­تىك جا­عىنان از قامتىلعان وت­با­سى­لار­دىڭ بالالارى مەن مۇم­كىن­دىگى شەكتەۋلى وقۋشىلار تولىق كي­ىم-كەشەكپەن قامتاماسىز ەتى­لەدى.

«ساندىقتاۋ استىق» سەرىك­تەستىگىنىڭ باسشىسى اتلان دو­كاەۆ بىرلىك اۋىلدىق وكرۋگىنىڭ تۇر­عىن­دارىنا ارقايسىسى ەلۋ كيلو بولاتىن 241 قاپ ۇندى تە­گىن تاراتىپ بەرگەن. بالكاشين اۋىلدىق وكرۋگىنە 256، جامبىل اۋىلدىق وكرۋگىنە 30 قاپ ۇندى سىيعا تارتقان. «سحپ 1 ماي» سەرىك­تەستىگىنىڭ باسشىسى ماگو­مەد-سالي ابۋەۆ زەينەتكەرلەر مەن مۇمكىندىگى شەكتەۋلى ادامدارعا ەلۋ كيلولىق 100 قاپ ۇن جەتكىزىپ بەرىپ، قامقورلىق كورسەتىپ وتىر. «سۆوبودنوە» جانە «ماكسيموۆسكوە» سەرىكتەس­تىك­­تەرىنىڭ باسشىلارى اكەلى-با­لالى الەكساندر زاكۋسيلوۆتەر زەينەتكەرلەرگە، اۋعان سوعىسىنىڭ ار­داگەرلەرىنە ۇزىن-ىرعاسى ال­پىسقا تاياۋ ادامعا تەگىن ۇن تاراتىپ، وسىمدىك مايىن ۇلەستىرگەن. ماكسيموۆكا اۋىلىنىڭ بۇرىنعى تۇرعىنى نيكولاي مەششەرياكوۆ زەي­نەتكەرلەرگە ازىق-ت ۇلىك سەبەت­تەرىن سىيلاعان.

مىنە، وسىلايشا ادامدار ءبىر-بىرىنە قايىرىمدىلىق جاساپ، قاناتتاندىرۋدا. بۇرىنعىنىڭ «ەلدە بولسا ەرنىڭە تيەدى» دەيتىن ءسوزى راس-اۋ شىركىن. ەل ىشىندەگى بەرەكەنىڭ بەسىگىن تەربەتىپ، ايالاپ تۇرعان دا جومارت جۇرەكتى جان­داردىڭ جۇمىلا اتقارىپ وتىرعان شارۋاسى.

 

اقمولا وبلىسى،

ساندىقتاۋ اۋدانى

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • 24 قىركۇيەك، 2021

قىتاي مەن قازاقستان جۇك تاسىمالى ارتقان

ەكونوميكا • 24 قىركۇيەك، 2021

ۇقساس جاڭالىقتار