قىسقاسى, قازاق سپورتشىلارىنا ءجوندى جۇلدە بۇيىرماي, توكيو وليمپياداسى ءتۇڭىلدىرىپ تۇر. قولانى قوڭىلتاقسىپ وتىرعان جايىمىز جوق, دەسە دە قانشا قولا بولسا دا, ونىڭ قۇنى التىن تۇگىل, كۇمىستىڭ شيرەگىنە كەلمەيتىنى بەلگىلى. تۇرىكمەنستان قۇراماسىنىڭ جالعىز كۇمىس مەدالمەن قازاقستاننان جەتى ساتى جوعارى ورنالاسقاندىعى – وسىنىڭ ايعاعى. «قۇم جيىلىپ تاس بولماس» دەمەكشى, قانشاما قولا جينالعانىمەن, ونىڭ التىنعا جەتپەيتىنى تاعى انىق. ەندەشە, بىزگە التىن مەدال اۋاداي قاجەت.
بۇرىن-سوڭدى قازاقستان قۇراماسى قاتىسقان وليمپيادالارىندا ەلدىڭ ءانۇرانىن اسقاقتاتا شىرقاتىپ كەلدى. اتلانتا, سيدنەي, لوندون, ريو وليمپيادالارىندا 3 التىن مەدالدىڭ ارقاسىندا ءانۇران ءۇش مارتەدەن شىرقالدى. تەك بەيجىڭ وليمپياداسىندا عانا 2 التىنعا يە بولدىق, 4 كۇمىس پەن 7 قولا مەدالدى ايتپاعاندا.
راس, توكيوداعى تۇڭىلدىرگەن ءساتتى بۇرىن دا ءبىر مارتە باستان كەشكەن ەدىك. افينا وليمپياداسىندا. 2004 جىلى. بۇل جاعداي ون التى جىلدان كەيىن قايتالانادى دەپ كىم ويلاعان؟! ابىروي بولعاندا, وليمپيادانىڭ سوڭعى جارىس كۇنى بوكسشى باقتيار ارتاەۆ جەڭىس تۇعىرىنا كوتەرىلىپ, ەلدىڭ ءانۇرانى افينادا دا شىرقالدى. ءسويتىپ قازاقستان 1 التىن, 4 كۇمىس, 3 قولا ەنشىلەپ, جالپى ەسەپتە 40-شى ورىن العان ەدى.
كۇن سايىن قازاقستاندىق وليمپياداشىلار قاتىساتىن جارىستاردى وليمپيادا قالاشىعىنىڭ ءباسپاسوز ورتالىعىندا كىرپىك قاقپاي قاداعالاپ, قازاق جانكۇيەرلەرىنەن ءسۇيىنشى سۇرايتىن ءساتتى تاعاتسىزدانا كۇتىپ وتىرامىز. قورجىندارىنا قۇندى مەدالدار ساۋىلداپ ءتۇسىپ جاتقان باسقا ەلدەردىڭ جۋرناليستەرىنە قىزىعا قارايمىز. ال ءبىزدىڭ سپورتشىلاردىڭ قارقىنى كوڭىل كونشىتپەيدى, ءۇمىت ۇزىلگەلى تۇر. ءسوزدىڭ قىسقاسى, وسى وليمپيادادا التىن الساق (بار تىلەۋىمىز دە وسى) تا, الماساق (ونىڭ بەتىن ارى قىلسىن) تا, ەل سپورتىنىڭ بارلىق سالاسىن سۇزگىدەن وتكىزىپ, ساپا مەن ساننىڭ اراجىگىن اجىراتاتىن, ساتسىزدىكتەردىڭ سىرىن اشاتىن ءبىر تەرەڭ تالداۋ جاسالۋى قاجەت دەپ ويلايمىز.
