«اتا-انالارعا ەرتەڭ قۇجات قابىلداۋدىڭ سوڭعى كۇنى ەكەندىگىنە نازار اۋدارۋدى سۇرايمىز. بۇل مەرزىم بولاشاق وقۋشىلاردىڭ اتا-انالارى مەكتەپتى الدىن الا انىقتاپ, قاجەت قۇجاتتاردى ۋاقىتىلى تاپسىرىپ, بالالاردى وقۋ قۇرالدارىمەن قامتاماسىز ەتۋى ءۇشىن بەرىلدى» دەپ ەسكەرتەدى ءبىلىم جانە عىلىم مينيسترلىگى.
ال مەكتەپ اكىمشىلىگى سىنىپتاردى الدىن الا جيناقتاۋ, وقۋلىقتاردىڭ قاجەتتى كولەمىن ساتىپ الۋ, مۇعالىمدەر اراسىندا ساعاتتاردى ءبولۋ جانە سىنىپتار سانىنا بايلانىستى پەداگوگتەر قۇرامىن انىقتاۋ جۇمىستارىن اتقارادى. وسىعان بايلانىستى مينيسترلىك وتىنىشتەردى ۋاقىتىلى بەرۋدىڭ ماڭىزىن ەسكە سالادى.
«قۇجات قابىلداۋ 4 ايعا سوزىلدى. بۇل اتا-انالارعا دا, مەكتەپ اكىمشىلىكتەرىنە دە وقۋ پروتسەسىنە دايىندىقتى الدىن الا ويلاستىرۋعا مۇمكىندىك بەردى. سونداي-اق, 10 تامىزدان كەيىن مەكتەپتەردە دايىندىق توبى جۇمىسىن باستايدى, وعان اتا-انالاردىڭ قالاۋى بويىنشا مەكتەپكە دەيىنگى مەكەمەلەرگە بارماعان نەمەسە مەكتەپالدى دايارلىقتان وتپەگەن بالالار بارا الادى», دەپ اتاپ ءوتتى قر بعم مەكتەپكە دەيىنگى جانە ورتا ءبىلىم كوميتەتى توراعاسىنىڭ ورىنباسارى جومارت قارامباەۆ.
ەسكە سالا كەتسەك, ءوتىنىش قابىلداۋ ەgov.kz ەلەكتروندىق ۇكىمەت پورتالى ارقىلى ەلەكتروندىق فورماتتا جۇرگىزىلەدى.
مەكتەپكە قابىلدانۋ ءۇشىن كەلەسى قۇجاتتاردى ۇسىنۋ قاجەت: بالانىڭ دەنساۋلىق جاعدايى تۋرالى قۇجاتتار (بالانىڭ دەنساۋلىق پاسپورتى №026/ۋ-3, №063/ۋ نىسانى بويىنشا مەديتسينالىق انىقتاما); بالانىڭ 3ح4 سم كولەمىندەگى تسيفرلىق فوتوسۋرەتى.
ءوتىنىش 1 جۇمىس كۇنى ىشىندە قارالادى.
«قىزىل» ايماققا ەنگەن وڭىرلەردە تۇراتىن اتا-انالار مەديتسينالىق انىقتامانى وقۋ جىلىنىڭ باستالۋىنا دەيىن الا الادى.
