جيىرماسىنشى عاسىردىڭ ساياسي كەڭىستىگىندە ونىڭ قولتاڭباسى ايقىن كورىنەدى. بەيساياسي بىلىگى, سوزگە ۇستالىعى ءھام ويعا سۇلەيلىگى سامارقاۋ اقىلىڭدى اشىتىپ, تولعاۋى توقسان كوڭىلىڭدى تولقىتاتىنى تاعى راس. سۇستى قاباعىمەن-اق ءىستى تىڭدىراتىن سارابدال ساياساتكەردىڭ انتەك ادەتىن الەم ءالى قانشا ۋاقىت جىرلار ەكەن.
بۇعان دەيىن چەرچيللدىڭ قاباعىنا قاراپ, وي قورىتقانىمىز بار. قاتۋلى قايراتكەردىڭ شىلىمىن قولىنان تارتىپ الىپ, سۋرەتكە تارتقان فوتوگراف يۋسۋف كارشتىڭ ەرلىگى ەل ەسىندە. تانىمال جۋرنالداردىڭ مۇقاباسىنان تۇسپەي, ونىڭ اتاقتى تۋىندىسىنا اينالعان-تۇعىن. ەندى قاراڭىزشى, Sotheby’s دۇكەنىندە ۋينستون چەرچيللدىڭ سۇيىكتى ۆيسكيى بەينەلەنگەن «قۇمىرالار مەن بوتەلكەلەر» كارتيناسى ساتىلىمعا شىعىپتى. سۋرەتشىلىك قىرىمەن دە كوزگە تۇسكەن بريتاندىق كوشباسشىنىڭ تۋىندىسى ءتاپ-ءتاۋىر دۇنيە ءھام وزىندىك تاعدىرى بار. ءتىپتى سول سالاداعى بەلگىلى ونەر مايتالماندارىنىڭ جوعارى باعاسىنا يە بولعانىمەن قىمبات.
جالپى, ساياساتكەر ومىرىندە ەكى نارسەگە اسا قۇمار بولعان. ونىڭ ءبىرى – كەسكىندەمە ونەرى بولسا, ەكىنشىسى – ىشىمدىك. ءاربىر كۇنىنىڭ القيسساسىن سودا قوسىلعان ۆيسكيمەن باستايتىنىن اقپارات وكىلدەرى كۇنى بۇگىنگە دەيىن كۇلكى قىلادى-مىس. چەرچيللدىڭ ءوزى ونى سۇيىكتى ادەتى ەسەبىندە ەسكە الىپ, كوزى تىرىسىندە ميىعىنان كۇلگەن دە قويعان. بۇل كارتينانىڭ بۇرىنعى كارتينادان وزگەشەلىگى سول, ونىڭ ەڭ جاقسى كورگەن ىشىمدىگى Johnnie Walker جازىلعان. برەندتىڭ ەرەكشە قارا جانە التىن دياگونالدى جاپسىرماسى وسى ناتيۋرمورتتا ايقىن كورىنەدى.
چەرچيلل 1890 جىلى ءۇندىستاننىڭ سولتۇستىك-باتىس شەكاراسىندا قىزمەت ەتىپ جۇرگەن كەزىندە ۆيسكيدىڭ العاش رەت ءدامىن تاتىپ كورەدى. «سۋ ىشۋگە جارامادى. ال ونى وڭەشتەن وتكىزۋ ءۇشىن ازداپ ۆيسكي قوسۋعا تۋرا كەلدى. ىنتالى كۇش-جىگەردىڭ ناتيجەسىندە ونى ءسۇيۋدى ۇيرەندىم», دەپ تولعانادى كەيىنىرەك ءوزى. ەكىنشى دۇنيەجۇزىلىك سوعىستىڭ باستالۋىمەن ۆيسكي ونىڭ كۇندەلىكتى ءومىرىنىڭ اجىراماس بولىگىنە اينالادى.
استىق تاپشىلىعى شوتلانديادا سپيرت زاۋىتتارىنىڭ جابىلۋىنا اكەلگەندە, ىسكە ءوزى ارالاسىپ, كاسىپتىڭ جاندانۋىنا جول اشادى. 1945 جىلى مامىردا پرەمەر-مينيستر بۇل قارەكەتىن بىلاي ءتۇسىندىردى: «قانداي دا ءبىر جاعداي بولسىن, ەشقاشان ۆيسكي ءۇشىن ارپانى ازايتۋعا بولمايدى. بۇل باعا جەتپەس ەكسپورت. ەكسپورتقا بايلانىستى باسقا دا قيىندىقتى ەسكەرە وتىرىپ, ۇلىبريتانياعا عانا ءتان بۇل ارتىقشىلىقتى ەسكەرمەگەنىمىز اعاتتىق بولادى. تابىس كوزىنە اينالعان بۇل ەلەمەنتتى ساقتاماۋ ابەستىك», دەيدى حالىقتى سابىرعا شاقىرىپ.
ناركەز ناتيۋرمورت 1930 جىلى اۆتوردىڭ كەنتتەگى ۇيىندە جازىلدى. كەنەپ بەتىندەگى Johnnie Walker مەن Black Label بوتەلكەسى كوزگە وتتاي باسىلادى. كۇمىس تاباق ۇستىندەگى شاراپ قۇياتىن شىنىلار ادەمى ۇيلەسىم تاپقانداي. تۇستەر مەن زاتتاردى ويناتا وتىرىپ ۇيلەستىرۋ ءھام جارىققا ءار بەرۋ ونىڭ دوسى جانە بەينەلەۋ ونەردەگى تالىمگەرى ۋيليام نيكولسوننىڭ اسەرىنەن تۋعان دۇنيە بولسا كەرەك. سۋرەتشى مەن ساياساتكەر تابيعات اياسىندا پەيزاجداردى بىرگە جازعان, ال قولايسىز اۋا رايىندا ولار ناتيۋرمورتتارمەن جۇمىس ىستەگەن. قىزىعى سول, سونداي ساتتەردە ساياساتكەر قىزمەتكەرلەرىنە شىعارماسىنا ارقاۋ بولار زاتتاردى ىزدەۋدى تاپسىرادى ەكەن. بۇل ەرىككەندىك بولىپ كورىنۋى مۇمكىن, دەسە دە چەرچيلل قولىنا قىلقالام العاندا دۇنيەدەن جىراق ءومىر سۇرگەندەي.
قاراڭىزشى, قۇمىرالار مەن شىنىلارعا شاعىلىسقان ساۋلەلەر اينەككە ورنەك سالعانداي. بۇل ناتيۋرمورتتا 1937 جىلى جازىلعان شەبەر نيكولسوننىڭ پاتشا كوللەكتسياسىنا ەنگەن «التىن شەڭبەر» تۋىندىسىنداعى دەتالدارى بار. چەرچيلل ءوزىنىڭ ناتيۋرمورتىن كورنەكتى تۇلعا, كاسىپكەر ءھام ديپلومات اۆەرەلل گارريمانعا سىيلايدى. ول 1940 جىلدارى رۋزۆەلتتىڭ باسشىلىعىمەن ەۋروپاداعى ارنايى ەلشى قىزمەتىن اتقارعان ەدى. جۇمىس بارىسىندا تالاي مارتە چەرچيللمەن ديدارلاسىپ, دوسىنا دا اينالعان. سودان سوڭ 1943 جىلدىڭ قازان ايىندا كەڭەس وداعىنا ەلشى بولىپ تاعايىندالادى. كەيىن 1975 جىلى الگى گارريمان «چەرچيلل مەن ستالين كەزىندەگى ارنايى وكىل. 1941-1946 جج.» اتتى مەمۋار جازادى.
ايتپاقشى, امەريكالىق ديپلومات ۇلىبريتانيا پرەمەر-ءمينيسترىنىڭ جالعىز ۇلى راندالفتىڭ ايەلى پامەلامەن وڭاشادا ءتىل تابىسقان كورىنەدى. بۇل قارىم-قاتىناستان ساياساتكەر بەيحابار بولعان سىڭايلى. ءسويتىپ كەلىنى 1971 جىلى گارريمانعا تۇرمىسقا شىعىپ, ونىڭ ءۇشىنشى ايەلى بولادى. مۇنى نەگە ايتىپ وتىر دەيسىز عوي, 1986 جىلى اۆەرەلل قايتىس بولعاننان كەيىن سىيلىققا كەلگەن ناتيۋرمورت پامەلانىڭ ءومىرىنىڭ سوڭىنا دەيىن بىرگە بولادى. 1997 جىلى كارتينانى امەريكالىق كاسىپكەر يرا ليپمان ساتىپ الىپتى. ول قايتىس بولعاننان كەيىن, اتاقتى شىعارما قايتادان ساتىلىمعا قويىلىپ وتىر.
ەندى چەرچيللدىڭ ناتيۋرمورتىنىڭ قۇنى 250 مىڭ فۋنت ستەرلينگ, ياكي 280 مىڭ ەۋرو تۇرادى. ءبىزدىڭ تەڭگەگە شاقساق, ءبىر وبلىستىڭ جىلدىق بيۋدجەتىنەن كوپ. سوندىقتان دامەلەنبەي-اق قويالىق. چەرچيللدىڭ تالانتىن تۇككە تۇرعىسىز دەپ تانىعاندار دا بار. كەزىندە «نيۋ-يورك تايمس» گازەتى اتالعان ناتيۋرمورتقا «بوتەلكەلەر» دەپ ات قويىپ, سىنعا العان بولاتىن. ايتسە دە ونى وقىرمان قۇلاعىنا دا قىستىرعان جوق. سىرباز ساياساتكەردىڭ كارتينالارى اۋكتسيوندا بەدەلىن تۇسىرگەن ەمەس. وعان مىسال قىزى مەري سۋمەسكە تيەسىلى «چارتەللدەگى التىن بالىقتار توعانى» پەيزاجى. 2014 جىلى ول Sotheby’s-تە 1,8 ميلليون فۋنتقا ساتىلدى.
