75 كيلوعا دەيىنگى سالماقتا جۇدىرىقتاسقان ءابىلحان امانقۇل وزبەكستاندىق فانات قاحرومونوۆپەن كەزدەسكەن بولاتىن. تارتىستى جەكپە-جەكتىڭ ءبىرىنشى راۋندىندا تورەشىلەر جەڭىستى وزبەك بوكسشىسىنا بەردى. تاعى دا كەشەگى ستسەناري قايتالانا ما دەپ الاڭدادىق. الايدا ەكىنشى راۋندتا تەز ەسىن جيعان ءابىلحان قارسىلاسىن نوكداۋنعا جىبەرىپ, باسىمدىقتى كۇشەيتە ءتۇستى. ءۇشىنشى كەزەڭدە دە قارسىلاسىنا بىرنەشە سوققى دارىتقانىنىڭ ناتيجەسىندە, تورەشىلەر جەڭىستى ءبىراۋىزدان امانقۇلعا بەردى. ەندى شيرەك فينالدا ءابىلحان برازيليانىڭ وكىلى ەبەرت كونسەيسان سوۋزامەن قولعاپ تۇيىستىرەدى. كەزدەسۋ 1 تامىزعا جوسپارلانعان.
«بۇل مەنىڭ وليمپياداداعى ءبىرىنشى كەزدەسۋىم بولعاندىقتان قيىن سوقتى. جالپى, وليمپيادادا جەكپە-جەك وڭاي بولمايدى. جەڭىسكە جەتكەنىمە قۋانىشتىمىن. شيرەك فينالداعى قارسىلاسىممەن بۇعان دەيىن كەزدەسپەگەنبىز. قارسىلاسىمنىڭ قانداي ەكەنىن رينگ كورسەتەدى. ارينە, قۇراماداعى جىگىتتەردىڭ جەڭىلىسى كوڭىل كۇيىمىزگە كادىمگىدەي اسەر ەتتى. نە دەگەنمەن, ولار مىقتى سپورتشىلار عوي. ءبىز – ءبىر كوماندامىز. مۇندايدا بوساڭسۋ دۇرىس ەمەس دەپ ويلايمىن. ءبىز نە ءۇشىن كەلگەنىمىزدى بىلەمىز. وليمپيادا بالا كەزدەن ارمانىمىزعا اينالعان. ءبىرىنشى ورىندا ەلدىڭ نامىسىن ابىرويمەن قورعاۋ ماڭىزدى», دەدى ءابىلحان.
91 كيلودان جوعارى سالماقتا رينگكە شىققان قامشىبەك قوڭقاباەۆ مىسىر ەلىنىڭ وكىلى ەسري مۇستافامەن كەزدەسىپ, ايقىن باسىمدىقپەن ۇتتى.
قامشىبەكتىڭ شيرەك فينالداعى قارسىلاسى رەسەيلىك يۆان ۆەرياسوۆ بولماق. ەگەر دە امانقۇل مەن قوڭقاباەۆ جەڭىسكە جەتسە, جارتىلاي فينالعا جولداما الادى.
قازاقستاندىق ساداقشى يلفات ابدۋللين 1/16 اينالىمدا نيدەرلاندىق ستيۆ ۆيدجلەرمەن كەزدەسىپ, 6:4 ەسەبىمەن جەڭىسكە جەتتى. ازىرگە يلفات ءابدۋلليننىڭ 1/16 اينالىمداعى قارسىلاسى انىقتالعان جوق.
توكيو وليمپياداسىنىڭ جارتىلاي فينالىنا دەيىن جەتكەن تەننيسشى ەلەنا رىباكينا الەمدىك رەيتينگتە 12-ورىندا تۇرعان شۆەيتساريالىق بەليندا بەنچيچپەن كەزدەسكەن-ءدى. تارتىستى كەزدەسۋ 2 ساعات 44 مينۋتقا سوزىلىپ, بەنچيچ 7:6, 4:6, 6:3 ەسەبىمەن جەڭىسكە جەتتى. شىنىندا قازاقستاندىقتار رىباكينانىڭ جەڭىسىنە سەنىمدى ەدى. بەيسەنبىنىڭ باستى سايىسى تەننيس بولىپ, ەل-جۇرت ەلەناعا قاراپ ەلەڭدەگەن-ءدى... ەندى ەلەنا رىباكينا وليمپيادانىڭ قولا جۇلدەسىنە تالاسادى.
بۇل كۇنى سۋ دوبىنان قازاقستان ەرلەر قۇراماسى توكيو وليمپياداسىندا كەزەكتى رەت جەڭىلدى. ەل قۇراماسى توپتىق سىننىڭ كەزەكتى كەزدەسۋىندە يسپانيا قۇراماسىنا قارسى وينادى. ەكى قۇراما اراسىنداعى كەزدەسۋ 16:4 (3-0, 6-0, 11-2, 11-4) ەسەبىمەن يسپانيالىقتاردىڭ پايداسىنا شەشىلدى. ويىن بارىسىندا قازاقستان قۇراماسىنان دۋشان ماركوۆيچ, سرجان ۆۋكسانوۆيچ (2) جانە ميحايل رۋداي كوزگە ءتۇستى. ەندى ۇلتتىق قۇراما جىگىتتەرى 31 شىلدەدە چەرنوگوريا كومانداسىمەن كەزدەسەدى.
توكيو وليمپياداسىندا اكادەميالىق ەسۋدەن جارتىلاي فينال اياقتالدى. قازاقستان ساپىنان اتالعان سانات بويىنشا جارىس جولىنا ۆلاديسلاۆ ياكوۆلەۆ شىقتى. ناتيجەسىندە, وتانداسىمىز ءوز توبىندا بەسىنشى بولىپ مارەگە جەتتى. 30 شىلدە كۇنى قازاقستاندىق سپورتشى D فينالىنا قاتىسادى. D توبىنا قاتىسۋشىلار ءوزارا 19-24 ورىنداردى ساراپقا سالادى.
كەشە وليمپيادا قالاشىعىنا وليمپيادا چەمپيونى ولگا رىپاكوۆا باستاعان قازاقستاندىق سپورتشىلاردىڭ ەكىنشى لەگى ورنالاستى. جەڭىل اتلەتيكا, ەركىن كۇرەس, ايەلدەر كۇرەسى, كوركەم گيمناستيكا, اشىق سۋدا ءجۇزۋ مەن بەسسايىستان سىنعا تۇسەتىن سپورتشىلار ەل نامىسىن ويداعىداي قورعايدى دەگەن سەنىم بار. ەندەشە قوماقتى جۇلدەنىڭ دە اۋىلى الىس بولماۋى كەرەك.
