ەلوردالىق الەۋمەتتىك-مەديتسينالىق ساقتاندىرۋ قورىنىڭ مالىمەتىنە سۇيەنسەك, بيىل ءى جارتىجىلدىقتا 2,02 ملرد تەڭگە سوماسىنا (ونىڭ ىشىندە كۇندىزگى ستاتسيونارلاردا – 43 308, تاۋلىكتىك ستاتسيونارلاردا – 36 999) وڭالتۋ قىزمەتى كورسەتىلدى. سول سياقتى امبۋلاتوريالىق-ەمحانالىق دەڭگەيدە 274,6 ملن تەڭگە سوماعا 270 316 قىزمەت كورسەتىلدى.
«كورونوۆيرۋس ينفەكتسياسىمەن كۇرەس اياسىندا امبۋلاتوريالىق دەڭگەيدە ەرەسەكتەر مەن بالالارعا مەديتسينالىق كومەك كورسەتىلىپ جاتىر. ءبىزدىڭ اقپاراتتىق جۇيەدەگى دەرەكتەرگە ساي, 2021 جىلدىڭ 6 ايىندا 104,07 ملن تەڭگە سوماسىنا 26 226 رەتسەپت بويىنشا 19 472 پاتسيەنت انتيباكتەريالدىق, ىستىق تۇسىرەتىن پرەپاراتتارمەن جانە انتيكواگۋليانتتارمەن قامتاماسىز ەتىلدى. ونىڭ ىشىندە COVID-19 ينفەكتسياسى بويىنشا 88,48 ملن تەڭگە سوماسىنا 14 117 رەتسەپتىمەن 9 851 پاتسيەنت دارىمەن قامتىلدى. سونداي-اق, COVID-19-دىڭ جەڭىل تۇرىمەن اۋىرعان ناۋقاستار پتر-تەست ناتيجەسىنە قاراماستان, ەمدەۋشى دارىگەرىنىڭ تاعايىنداۋى بويىنشا ىستىق تۇسىرەتىن دارىلەر مەن انتيكواگۋليانتتاردى ءوزى تىركەلگەن ەمحانادان الا الادى», دەدى نۇرلىبەك قابدىقاپاروۆ ZOOM پلاتفورماسىندا وتكەن ءباسپاسوز ءماسليحاتىندا.
فيليال باسشىسى ۆيرۋستىق ىندەتتەن جازىلعان سوڭ پاتسيەنتكە قانداي وڭالتۋ كومەگىنىڭ كورسەتىلەتىنى تۋرالى ايتىپ بەردى.
«ەلوردا تۇرعىندارى كوروناۆيرۋس جانە پنەۆمونيا كەزىندە مەديتسينالىق كومەكتى مەديتسينالىق ساقتاندىرۋ جۇيەسىندەگى مارتەبەسىنە قاراماستان تەگىن الادى. ءبىزدىڭ قور نۇر-سۇلتان قالاسى بويىنشا وڭالتۋ قىزمەتتەرىن كورسەتەتىن 45 مەديتسينا ۇيىمىمەن كەلىسىمشارت جاساعان. ونىڭ ىشىندە 20 جەكەمەنشىك, 22 مەملەكەتتىك جانە 3 رەسپۋبليكالىق مەديتسينا ۇيىمى بار. سونىمەن قاتار, كوروناۆيرۋسپەن نەمەسە ورتاشا, اۋىر جانە اسا اۋىر دەڭگەيدەگى پنەۆمونيامەن اۋىرعان پاتسيەنتتەر مەديتسينالىق ساقتاندىرۋ قورىنىڭ قاراجاتى ەسەبىنەن وڭالتۋدان وتە الادى. ازاماتتار ۇيىندە ەمدەلدى مە, الدە اۋرۋحانادا ەمدەلدى مە, وعان قارامايدى. مەديتسينالىق وڭالتۋعا جولداما رەابيليتولوگ ماماننىڭ كەڭەسىمەن اۋرۋحانانىڭ نەمەسە ەمحانانىڭ مۋلتيديستسيپلينارلىق كومانداسىنىڭ قورىتىندىسى بويىنشا بەرىلەدى», دەپ ءتۇسىندىردى نۇرلىبەك قابدىقاپاروۆ.
