شانحاي ىنتىماقتاستىق ۇيىمى شەڭبەرىندەگى ەكى جاقتى جانە كوپ جاقتى اسكەري جانە اسكەري-تەحنيكالىق ىنتىماقتاستىق وڭىردەگى, اسىرەسە اۋعانستان مەن يراكتاعى اقش پەن ناتو اسكەري ميسسيالارىنىڭ اياقتالۋىنا بايلانىستى قاۋىپ-قاتەرلەر سانىنىڭ ارتۋىن ەسكەرە وتىرىپ, ەرەكشە ماڭىزعا يە بولىپ وتىر.
قازاقستاننىڭ قورعانىس ءمينيسترى بۇگىنگى كۇنى وڭىرلىك قانا ەمەس, جالپىالەمدىك اۋقىمدا دا ءرولى ايتارلىقتاي ارتىپ كەلە جاتقان شانحاي ىنتىماقتاستىق ۇيىمىنىڭ كوپتاراپتى بىرلەستىك رەتىندە ماڭىزدى ەكەنىن اتاپ ءوتتى.
نۇرلان ەرمەكباەۆ قىتايلىق ارىپتەسىنە COVID-19 پاندەمياسىنا قارسى ارەكەت ەتۋ شەڭبەرىندە بەلسەندى جانە ناتيجەلى ىنتىماقتاستىعى ءۇشىن ريزاشىلىعىن ءبىلدىردى. ونىڭ ايتۋىنشا, ءوزارا كومەك ەلدەگى ەپيدەميولوگيالىق جاعدايدى تۇراقتاندىرۋعا ىقپال ەتەدى.
قورعانىس ۆەدومستۆولارىنىڭ باسشىلارى قازاقستان مەن قىتاي قارۋلى كۇشتەرى اراسىنداعى ىنتىماقتاستىقتىڭ بۇگىنگى كۇنى جوعارى دەڭگەيدە ەكەنىن, سونداي-اق ونى ودان ءارى دامىتۋعا الەۋەتتىڭ بار ەكەنىن اتاپ ءوتتى.
گەنەرال-لەيتەنانت نۇرلان ەرمەكباەۆ قىتايلىق ارىپتەسىن قازاقستانعا ساپارمەن كەلۋگە شاقىردى.
سونىمەن قاتار, شانحاي ىنتىماقتاستىق ۇيىمىنىڭ قورعانىس مينيسترلەرى كەڭەسى بارىسىندا بەلارۋس, قىرعىزستان, پاكىستان, تاجىكستان مەن وزبەكستان قورعانىس ۆەدومستۆولارىنىڭ باسشىلارىمەن كەلىسسوزدەر جۇرگىزدى. تاراپتار اسكەري دايىندىق پەن اسكەري ءبىلىم بەرۋ, سونداي-اق قارۋلى كۇشتەر قىزمەتىنىڭ باسقا دا وزەكتى باعىتتارى بويىنشا بەلسەندى ءوزارا ءىس-قيمىلدى اتاپ ءوتتى.
