دەپارتامەنت ماماندارىنىڭ دەرەگىنشە, 2014-2015 وقۋ جىلىنىڭ باسىندا ءبىرىنشى سىنىپقا باراتىن وقۋشىلاردىڭ بولجانىپ وتىرعان كونتينگەنتى ناقتى ايتقاندا 277 575 بالانى قۇرايدى. ال وتكەن جىلى مەكتەپكە العاش بارعان بالالاردىڭ سانى 270 مىڭنان اسقان. دەپارتامەنت ۇسىنعان ستاتيستيكاعا سۇيەنسەك, رەسپۋبليكادا 7649 مەكتەپ بار, ونىڭ 7307-ءى – جالپى ءبىلىم بەرەتىن كۇندىزگى مەكتەپ. مەكتەپتەردىڭ ۇشتەن ەكىسى – 3796 مەكتەپ قازاق تىلىندە, 1349-ى ورىس تىلىندە وقىتادى. مينيسترلىك ماماندارىنىڭ مالىمەتىنشە, 2014 جىلدىڭ 1 قىركۇيەگىندە ەلىمىزدە 68 جاڭا مەكتەپ اشىلادى. شىعىس قازاقستان وبلىسىندا –18, وڭتۇستىك قازاقستان وبلىسىندا – 17, استانا قالاسى مەن قىزىلوردا وبلىسىندا التى, اتىراۋ وبلىسىندا توعىز مەكتەپ پايدالانۋعا بەرىلەدى.
مەكتەپ فورماسىنا قاتىستى ءتيىستى ۆەدومستۆو ماماندارى ء«بىلىم تۋرالى» زاڭعا سايكەس, وقۋشىلار ءبىلىم مەكەمەسى بەكىتكەن مەكتەپ فورماسىن ساقتاۋعا مىندەتتى ەكەنىن ايتادى. مينيسترلىكتىڭ مونيتورينگىنە قاراعاندا, 2012-2013 وقۋ جىلىندا مەكتەپ فورماسىن 4,5 مىڭ مەكتەپتەگى 1,6 ملن-نان استام وقۋشى (61%) كيگەن. وتكەن وقۋ جىلىندا بۇل كورسەتكىش 72 پايىزدى, ياعني 5,4 مىڭ مەكتەپتەگى 1,8 ملن وقۋشىنى قۇراعان. كيىمنىڭ سانى مەن ۇلگىسىنە قاراي مەكتەپ فورماسىنىڭ ورتاشا قۇنى - 4,5 مىڭنان 13,5 مىڭ تەڭگە ارالىعىندا.
ال مەكتەپ فورماسىن ەنگىزۋ ءبىلىم مەكەمەسىنىڭ قۇزىرىندا جانە ول مەكەمەنىڭ جارعىسىندا مىندەتتى تۇردە كورسەتىلۋى ءتيىس. مەكتەپ فورماسىن ەنگىزۋ تۋرالى شەشىمدى مەكتەپ كەڭەسى مەن اتا-انالار جانە قامقورشىلار كەڭەسى جالپىمەكتەپتىك اتا-انالار جينالىسىندا كوپشىلىك داۋىس بويىنشا قابىلدايدى. كيىم ۇلگىسى ءار مەكتەپتىڭ قالاۋىنا قاراي تاڭدالادى. از قامتىلعان جانە كوپبالالى وتباسى بالالارى مەكتەپ فورماسىمەن جالپىعا مىندەتتى وقۋ قورى قاراجاتى مەن دەمەۋشىلىك قولداۋ ەسەبىنەن قامتىلادى. مينيسترلىك دەرەگى بويىنشا, بىرنەشە جىل قاتارىنان جۇرگىزىلگەن ساۋالناما ناتيجەسىنە وراي اتا-انالاردىڭ 80 پايىزى مەكتەپ فورماسى بولعانىن قولدايدى.
