قازاقستان • 28 شىلدە، 2021

QazVac قىرعىزستانعا جەتكىزىلدى

72 رەت كورسەتىلدى

مەملەكەت باسشىسى قاسىم-جومارت توقاەۆتىڭ قىرعىز ەلىنىڭ پرەزيدەنتى سادىر جاپاروۆپەن كەلىسسوزدەرىنىڭ ناتيجەسى بويىنشا بەرگەن تاپسىرماسىنا وراي، قازاقستان ۇكىمەتى كورشى قىرعىز ەلىنە گۋمانيتارلىق كومەك كورسەتتى، دەپ حابارلايدى Egemen.kz.

جامبىل وبلىسى، قورداي اۋدانى، گۆاردەيسكي قالاشىعىنان QazVac ۆاكتسيناسىنىڭ 25000 دوزاسى كورشى مەملەكەتكە جىبەرىلدى. قازاق ەلىنىڭ اتىنان ىزگىلىك كومەك رەتىندە باۋىرلاس مەملەكەتكە دەپ دايىندالعان وتاندىق ۆاكتسينا قورداي اۋدانىندا ورنالاسقان بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ عيماراتىنان ارنايى كولىككە تيەلىپ، اۋدان ورتالىعى قورداي اۋىلى ارقىلى بىشكەك قالاسىنا جونەلتىلدى. سونىمەن قاتار، قازاقستاننىڭ اتىنان قىرعىز ەلىنە وتاندىق ۆاكتسينا جونىندە ماعۇمات بەرۋ ءۇشىن بىرقاتار عالىمدار مەن ماماندار دا اتتاندى.

QazVac ۆاكتسيناسى بۇل كۇندە ەلىمىزدە عانا ەمەس، بىرقاتار مەملەكەتتەردە دە سۇرانىسقا يە بولىپ وتىرعان وتاندىق ساپالى ءونىم. جاھاندى شارپىعان كوروناۆيرۋس ىندەتىنە قارسى ۆاكتسينا ەڭ ءبىرىنشى ادام ءومىرىن اراشالاپ قالۋدىڭ توتە ءارى ءتيىمدى جولى بولىپ وتىر. بۇل ورايدا، ماماندار دا وتاندىق ۆاكتسينانىڭ تيىمدىلىگى مەن اتالعان ينستيتۋتتىڭ الداعى جوسپارلارى جونىندە اڭگىمەلەدى. «QazVac ۆاكتسيناسى ءبىلىم جانە عىلىمي مينيسترلىگى قارجىلاندىرعان عىلىمي-تەحنيكالىق باعدارلاما اياسىندا ازىرلەنىپ، وندىرىلگەن. وتاندىق ۆاكتسينانىڭ ازىرلەنۋ تەحنولوگياسى ءبىزدىڭ عالىمداردىڭ اسا قاجىرلىلىقپەن ەڭبەك ەتۋى جانە وزىق عىلىمي تاجىريبەلەرىن قولدانۋ ارقىلى جۇزەگە اسىرىلدى. QazVac ۆاكتسيناسى ەلىمىزدىڭ دەنساۋلىق ساقتاۋ مينيسترلىگىنىڭ ساراپتاماسى مەن باقىلاۋىنان تولىق وتكەن. بۇگىنگى كۇنى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنان سك-فارماتسيا قويمالارىنا QazVac ۆاكتسيناسىنىڭ 300 مىڭعا جۋىق دوزالارى جونەلتىلگەن. كوروناۆيرۋستىق ينفەكتسيادان جاقىن ۋاقىتتا قۇتىلۋعا جانە پاندەميالىق جاعدايدان بۇرىنعى تۇرمىس-تىرشىلىك جاعدايىنا تەزىرەك قايتۋعا تەك قانا ۆاكتسينا قولدانۋ مەن سانيتارلىق-گيگيەنالىق تالاپتاردى تولىق ساقتاۋ ارقىلى عانا جەتەمىز»، دەيدى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا. سونىمەن قاتار، مەملەكەتتىڭ قولداۋىمەن سالىنىپ جاتقان جوعارى تەحنولوگيالى زاۋىت قىركۇيەك ايىندا QazVac ۆاكتسيناسىنىڭ وندىرىستىك سەريالارىن شىعاراتىن بولادى. سونداي-اق، وتاندىق QazVac ۆاكتسيناسىن ءوندىرۋ جۇمىستارى بۇگىندە ۇكىمەت قاداعالاۋىندا تۇر ەكەن.

ال، بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى باس ديرەكتورىنىڭ ورىنباسارى ەرعالي ءابدىرايىموۆ وتاندىق ۆاكتسينا ءساۋىر ايىنان باستاپ قولدانىستا ەكەنىن، ونىڭ ساپاسىنىڭ جوعارى ەكەنىن ايتتى. «QazVac ۆاكتسيناسى بۇگىنگى تاڭدا جاقسى كورسەتكىشتەرگە يە بولىپ وتىر. اتالعان ۆاكتسينا وتە قىسقا مەرزىمدە ءبىزدىڭ عالىمداردىڭ ەرلىگىنىڭ ارقاسىندا جاسالدى. ۆاكتسينا بۇگىندە ءۇش فازالىق سىناقتان وتكەن. ءبىرىنشى فازاسىندا 44 ادام، ەكىنشى فازاسىندا 200 ادام جانە ءۇشىنشى فازاسىندا 3000 ادام ءوتتى. ءۇشىنشى فازاداعى سىناقتار الماتى جانە تاراز قالالارىندا ۇيىمداستىرىلدى. وتاندىق ۆاكتسينامىز دۇنيەجۇزىلىك دەنساۋلىق ساقتاۋ ۇيىمىنىڭ دا تىزىمىنە ەنىپ، وزگە ەلدەردىڭ دە سۇرانىسىنا يە بولۋدا»، دەيدى ول. بۇگىندە وتاندىق ۆاكتسينانى دايىنداۋ بارىسىندا كوپتەگەن عالىمداردىڭ ەڭبەگىن كورۋگە بولادى. اۋەلى ادام ءومىرىن قۇتقارىپ قالۋدى ماقسات ەتكەن ماماندار كۇنى-ءتۇنى ەڭبەك ەتۋدە. بۇل رەتتە بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى تەحنولوگيالار جانە بيوپرەپاراتتاردى زەرتتەۋ زەرتحاناسىنىڭ زەرتحانا مەڭگەرۋشىسى اينۇر نۇرپەيىسوۆا QazVac ۆاكتسيناسى ادامدارعا سىناق جۇرگىزبەستەن بۇرىن لابوروتوريالىق جانۋارلاردا كلينيكاعا دەيىنگى سىناقتان وتكىزىلگەنىن جەتكىزدى. ونىڭ ىشىندە اتجالماندار، اق تىشقاندار، تەڭىز شوشقاسى جانە ادامعا اعزاسى ۇقساس مايمىلدار بار ەكەن. ۆاكتسينانىڭ قاۋىپسىزدىگى دالەلدەنگەننەن كەيىن عانا ادامدارعا سالىنا باستاعان. بۇل كۇندە بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتىندا 200-دەن استام عالىمدار جۇمىس ىستەيدى. ولار وتاندىق ءوندىرىستى دامىتۋعا ۇلەس قوسىپ كەلەدى. عالىمدار الداعى ۋاقىتتاردا دا وزگە ەلدەرگە قاجەتتى كومەكتى كورسەتۋگە بولاتىنىن، ول ءۇشىن مەملەكەتتىڭ قولداۋى بار ەكەنىن دە اتاپ ءوتتى.

 

جامبىل وبلىسى،

قورداي اۋدانى

سوڭعى جاڭالىقتار

ۇكىمەت شيكى مۇناي باعاسىن بەكىتتى

ەكونوميكا • بۇگىن، 22:48

ۇقساس جاڭالىقتار