فوتوسۋرەتشىلەر ەرەكشە قورعالاتىن تابيعي اۋماقتا سيرەك كەزدەسەتىن اڭ-قۇستاردى, قىزىل كىتاپقا ەنگەن گۇل-شوپتەردى ءتۇسىرىپ, كورەرمەن نازارىنا ۇسىنعان. التايدىڭ قويىن-قولاتىن ءبىر ارالاپ شىعىپ, ءتۇز تاعىلارىن ءتۇسىرىپ الۋ وڭاي شارۋا ەمەس. كورمەگە قويىلعان ءجۇز شاقتى فوتو ون-جيىرما جىلدىڭ ەڭبەگى.
– كاتونقاراعاي ۇلتتىق تابيعي پاركى 2001 جىلى قۇرىلعان. قازاقستانداعى ەڭ ءىرى ەرەكشە قورعالاتىن تابيعي اۋماق. مۇندا كوككول سارقىراماسى, راحمان قاينارى, بەرەل قورعاندارى سىندى كورىكتى, تانىمدىق ورىندار بار. ساياباق اۋماعىندا قۇستاردىڭ 300-دەن استام ءتۇرى, وسىمدىكتەردىڭ مىڭ, جانۋارلار مەن بالىقتاردىڭ جۇزگە جۋىق ءتۇرى كەزدەسەدى. مىنە, بۇگىن سولاردىڭ سۋرەتتەرىن كورەرمەن نازارىنا ۇسىنىپ وتىرمىز, – دەدى كاتونقاراعاي مۇتپ باس ديرەكتورىنىڭ ورىنباسارى راۋشان قىرىقباەۆا.
كورمەگە قاتىسقان فوتوسۋرەتشىلەردىڭ ىشىنەن ۆ.ۆوروبەۆتىڭ تۇسىرگەن سۋرەتتەرى ەرەكشە كوز تارتتى. ول كوبىنەسە تاۋدىڭ بيىگىندە جۇرەتىن اڭ-قۇستاردى تۇسىرۋمەن اينالىسىپ كەلگەن. تاۋدىڭ بيىگى دەمەكشى, قۇز-جارتاستاردا جورتاتىن قار بارىسىنىڭ سۋرەتى دە كورەرمەن نازارىنا ۇسىنىلدى.
– كورمەنى ەمەس, التاي تاۋىن ارالاپ كەلگەندەي اسەردە بولدىم. ءبىز بىلمەيتىن, ءبىز كورمەگەن جەرلەر كوپ. بارىپ, تاۋىنا شىقسا شىركىن. دەسەك تە, كورمەدەگى فوتولار ەرەكشە اسەر بەرەدى ەكەن. كۇندەلىكتى سمارتفوننان كورىپ جۇرسەك تە, كورمەنىڭ ءجونى بولەك, – دەيدى ستۋدەنت ايىم بولات.
التايدى ارالاماساڭىز دا, كورمەنى كورىپ قايتۋعا ابدەن بولادى. ا.پۋشكين كىتاپحاناسى قىزمەتكەرلەرىنىڭ ايتۋىنشا, فوتوكورمە ءبىر اي بويى وسكەمەندىكتەر مەن قالا قوناقتارىن قۋانتادى.
شىعىس قازاقستان وبلىسى
