‒ ءزۇلفيا بۇگىنگى جەتىستىگىڭە كوڭىلىڭ تولا ما؟
‒ جەتىستىگىمە شۇكىرشىلىك ەتەمىن. 2014 جىلعى الەم چەمپيوناتىنان كەيىن مەندە ايتارلىقتاي جاقسى ناتيجە بولعان جوق. ەڭ باستىسى, جاقسى ەموتسيالاردى سەزىنەتىن كەز كەلدى. راسىندا, قۋانىشتىمىن.
‒ سەرپە كوتەرۋدە ءۇشىنشى مۇمكىندىگىڭىزدى نەگە پايدالانبادىڭىز؟
‒ سەبەبى ءبارىبىر قۋىپ جەتە المايتىن ەدىم. جاتتىعۋ جيىندارىندا 130 كيلونى الاڭسىز كوتەرىپ ءجۇردىم. بىراق ول كەزدەگى سالماعىم 57 كيلو ەدى. وليمپيادادا 2-3 كيلوداي سالماق قۋعاننان كەيىن ناتيجە دە تومەندەيتىنى بەلگىلى. سوندىقتان تاۋەكەلگە بارعان جوقپىن. ونىڭ ۇستىنە ول سالماقتىڭ ماڭىزى دا جوق ەدى.
‒ ال جۇلقا كوتەرۋدە تاپسىرعان سالماعىڭىزدى باسىڭىزدان ءۇش رەت اسىرساڭىز دا تورەشىلەر ءبىر عانا مۇمكىندىگىڭىزدى ەسەپكە الدى. مۇنى نەمەن تۇسىندىرەسىز؟
‒ اۋىر اتلەتيكادا ءسال عانا ارتىق قيمىل جاساساڭ, سالماقتى ەسەپكە المايدى. تورەشىلەردىڭ ەسەپكە الماۋىنا قولىمدى تىك ۇستاماعانىم, تەپە-تەڭدىكتى ساقتاماعانىم سەبەپ بولدى.
‒ پاندەميا ءسىزدىڭ جاتتىعۋىڭىزعا قانشالىقتى اسەر ەتتى؟
‒ ءوزىڭىز كورگەندەي بارلىعى جاقسى ءوتتى. پاندەميا دايىندىعىمىزعا ايتارلىقتاي اسەر ەتكەن جوق.
‒ ەلگە دەگەن سالەمىڭىز...
‒ بارشاڭىزعا العىس بىلدىرەمىن. ۇنەمى جانىمنان تابىلاتىن كۇيەۋىم مەن باپكەرلەرىمە راحمەت. باپكەرلەرىم ۆيكتور ني, باقىت احمەتوۆتەرگە العىسىم شەكسىز. جانكۇيەرلەرگە دە ەرەكشە ريزاشىلىعىمدى بىلدىرەمىن.
‒ پاريج وليمپياداسىنا قاتىساسىز با؟
‒ قازىر ازداپ دەمالۋ كەرەك. سوندا بارلىعى بەلگىلى بولادى. نەگىزى, 2024 جىلى مەن 30-دان اسىپ كەتەدى ەكەنمىن. ال ول جاستا تەمىر كوتەرۋ قيىن بولادى. سول سەبەپتى 2024 جىلى وليمپياداعا قاتىسپايتىن سياقتىمىن.
