...سپورتشىلارىمىز بۇل كۇنى جەڭىسكە باستار جولدى تاپپاي, بارلىعى شەتىنەن جەڭىلىسكە ۇشىرادى. ءتورتىنشى كۇننىڭ جارىسىن 67 كيلودان جوعارى سالماق دارەجەسىندە سىنعا تۇسكەن تاەكۆوندوشى جانسەل دەنيز باستاپ شىقتى. ونىڭ العاشقى قادامى ءساتتى بولعان-دى. وزىمەن دەڭگەيلەس وزبەك سپورتشىسى سۆەتلانا وسيپوۆامەن جەكپە-جەك وتكىزگەن جانسەل 10:9 ەسەبىمەن جەڭىسكە جەتتى. الايدا جانسەلدىڭ شاماسى كەلەسى كەزدەسۋىندە ءۇش دۇركىن الەم چەمپيونى ۇلىبريتانيا وكىلى بيانكا ۋالدەنگە جەتپەدى. ەسەپ ‒ 7:17.
ال ەرلەر اراسىندا 80 كيلودان جوعارى سالماقتا جارىسقا شىققان رۋسلان جاپاروۆ تا دودانى ءساتتى باستاپ ەدى. ول العاشقى اينالىمدا گەرمانيا سپورتشىسى, 2017 جىلعى الەم چەمپيونى الەكساندر باحماندى 11:7 ەسەبىمەن ۇتىپ, مەدال الاتىن فاۆوريتتەر قاتارىنا كىردى. كوپ ۇزاماي ەكىنشى كەزدەسۋىندە وڭتۇستىك كورەيا وكىلى, الەمدىك رەيتينگتە ەكىنشى تۇرعان كيو دون يننان 2:10 ەسەبىمەن ويسىراي جەڭىلدى.
دزيۋدودان 81 كيلودا سايىسقا تۇسكەن ديدار حامزا وليمپيادانى ەكىنشى اينالىمنان باستاعان. الايدا جۇلدەدەن ءۇمىتتى ءۇشىنشى سپورتشىمىز دا بۇل كۇنى سىلبىر كۇرەستى. ديداردىڭ قارسىلاسى الەم چەمپيونى سايد موللاي ەدى. ازۋلى موڭعوليالىق دزيۋدوشى ۇرىمتال ساتتە جەرلەسىمىزدى «يپپونعا» تازا ءتۇسىردى.
اشەيىندە قۇرالايدى كوزگە اتقان مەرگەندەردىڭ ۇرپاعىمىز دەپ ماقتانعاندا الدىمىزعا جان سالمايمىز عوي. ال نىسانانى كوزدەۋگە كەلگەندە بارلىعى باسقاشا بولادى. ساداق اتۋدان قازاقستاندىق دەنيس گانكين توكيو وليمپياداسىندا ويداعىداي ونەر كورسەتە المادى. دەنيس ءبىرىنشى كەزەڭدە مىسىر سپورتشىسى يۋسۋف تولبادان 6:4 ەسەبىمەن باسىم تۇسكەنىمەن, ەكىنشى اينالىمدا يتاليالىق ماۋرو نەسپوليدەن 2:6 ەسەبىمەن جەڭىلدى.
سۋ دوبىنان قاتارىنان ەكىنشى كەزدەسۋدە جەڭىلىس تاپقان قازاقستان قۇراماسى ەندى جەڭىلەتىن بولسا قول جۇكتەرىن جيناي بەرۋىنە بولادى. ولار ەكىنشى كەزدەسۋدە سەربيادان 19:5 ەسەبىمەن ويسىراي جەڭىلدى.
سوڭعى كەزدە بوكستى تالان-تاراجعا سالعان ايبا-نىڭ حالىقارالىق وليمپيادالىق كوميتەتتىڭ الدىندا بەدەلى قالماعانى بەلگىلى. ءتىپتى بوكستى وليمپيادالىق سپورت تۇرىنەن الىپ تاستاۋ توڭىرەگىندە اڭگىمە قوزعالعان-دى. بىراق اۋپىرىمدەپ ءجۇرىپ ءتورت جىلدا ءبىر كەلەتىن دودادا قالعان بوكسقا بۇل جولى ايبا-نىڭ ەمەس, حوك-تىڭ تورەشىلەرى قازىلىق ەتەدى. سول سەبەپتى بارلىق جاۋاپكەرشىلىكتى ءوز مويىندارىنا العان حوك «توكيو وليمپياداسىندا بوكس ءادىل وتەدى» دەگەن بولاتىن. ونىڭ ۇستىنە بۇعان دەيىن رينگكە كوتەرىلگەن ءۇش بوكسشىمىز دا جارىستى ءساتتى باستادى. ودان قالسا بوكستان الەمدىك دەرجاۆالاردىڭ قاتارىندامىز دەگەن سەنىم دە بار بويىمىزدا. الايدا Kokugikan ارەناسىنا كەلگەندە سەنىمىمىز كۇل-تالقان بولدى.
69 كيلودا سالماقتا سىنعا تۇسكەن ابىلايحان ءجۇسىپوۆ جارىسقا ەكىنشى بولىپ شىقتى. ونىڭ الدىندا لوندون وليمپياداسىنىڭ چەمپيونى, كۋبالىق رونيەل يگلەسياس سوتولونگو جاپون بوكسشىسى وكازاكامەن جۇدىرىقتاسىپ, ازەر دەگەندە 3:2 ەسەبىمەن جەڭدى. وسىعان قاراپ ءبىزدىڭ ابىلايحان رونيەل يگلەسياستى كەلەسى كەزدەسۋدە سابايدى عوي دەپ, جەرلەسىمىزدى شيرەك فينالعا الدىن الا شىعارىپ تا قويعان ەدىك. سەنگەن ابىلايحانىمىز دجونسون دەلانتەمەن بولعان كەزدەسۋدە سىلبىر بوكستاستى. نەگە ەكەنى بەلگىسىز سوققىلارى ءدوپ تيگەنىمەن, ونىڭ سوققىسىن قارسىلاسى شىبىن قۇرلى كورمەيدى. كەزدەسۋدە 1:4 ەسەبى تىركەلدى. اقش وكىلىنىڭ پايداسىنا.
ءتورت وليمپيادادا قازاق بوكسشىلارى اتوي سالىپ, «قازاقتىڭ سالماعى» اتانىپ كەتكەن 69 كيلوعا دەگەن «يەلىگىمىزدەن» توكيو تورىندە ايىرىلۋعا تۋرا كەلدى. ول ەندى كىمگە بۇيىرار ەكەن؟
ۆاسيلي لەۆيتتىڭ جۇدىرىقتاسۋى ءتىپتى ماسقارا بولدى. توكيودا التىن الادى-اۋ دەگەن ۆاسيانىڭ ءداۋىرى ريودا-اق ءوتىپ كەتكەن ەكەن. وليمپيادانىڭ كۇمىس جۇلدەگەرى لەۆيت يسپانيا نامىسىن قورعايتىن كۋبالىق ەممانۋەل رەيەسكە قارسى شىقتى. كەزدەسۋدىڭ ەكىنشى راۋندىندا جەكپە-جەك مەرزىمىنەن بۇرىن اياقتالدى. بىرنەشە اۋىر سوققىنى وتكىزىپ العان لەۆيت الاڭدا سۇلاپ ءتۇستى.
تەننيستەن قازاقستان كومانداسىنىڭ مۇشەسى ميحايل كۋكۋشكين توكيوداعى جورىعىن اياقتادى. ول ەكىنشى اينالىمدا اتر رەيتينگىندە 66-ورىندا تۇرعان بەلارۋس سپورتشىسى يليا يۆاشكودان 1:2 ەسەبىمەن جەڭىلىس تاپتى. ەكەۋارا 2 ساعات 25 مينۋتقا سوزىلعان ماتچتا 6:7, 6:3, 6:3 ەسەبى تىركەلدى.
ەسەسىنە وليمپيادادا تەننيسشىلەر اراسىندا جالعىز ءوزى قالعان ەلەنا رىباكينا مەن جۇزۋدەن ەل ماقتانىشى دميتري بالاندين ءۇمىت شوعىن ۇرلەي ءتۇستى. رىباكينا ءۇشىنشى اينالىمدا حورۆاتيالىق دوننا ۆەكيچپەن 1 ساعات 41 مينۋتقا سوزىلعان كەزدەسۋدە 7:6, 6:4 ەسەبىمەن جەڭىسكە جەتتى.
«بۇگىن وتە قيىن كەزدەسۋ بولدى. جاڭبىرعا بايلانىستى ماتچ كەيىنگە شەگەرىلىپ, كورتقا شىعاتىن كەزەگىمدى ۇزاق كۇتتىم. قازىرگى ويىنىما كوڭىلىم تولمايدى. سەبەبى كەزدەسۋ باستالعاندا كوپتەگەن قاتەلىككە جول بەردىم. دەسە دە, بۇگىن جەڭىسكە جەتىپ, كەلەسى اينالىمعا وتكەنىمە وتە قۋانىشتىمىن. كەلەسى قارسىلاسىم – يسپانيالىق گاربينە مۋگۋرۋسا. ول جاقسى تەننيسشى جانە ماعان ونىڭ ويىنى تانىس, بىرگە ويناپ كوردىك. سوندىقتان الدا مەنى نە كۇتىپ تۇرعانىن جاقسى بىلەمىن», دەدى ەلەنا رىباكينا.
سەيسەنبى كۇنگى جارىستا سوڭعى بولىپ 200 مەترگە براسس ادىسىمەن جۇزۋدەن ىرىكتەۋ ءتۋرنيرى ءوتتى. ريو وليمپياداسىنىڭ چەمپيونى دميتري بالاندين ءوز توبىندا ءتورتىنشى ناتيجە تىركەدى. ال جالپى ەسەپتە جەتىنشى ورىنمەن وليمپيادانىڭ جارتىلاي فينالىنا جولداما الدى.
