بۇگىنگى تاڭدا ەلوردادا ينفەكتسيالىق ستاتسيونارلاردا
2 940 ناۋقاس ەم قابىلداپ جاتىر. ينفەكتسيالىق توسەكتىك ورىن جۇكتەمەسى 83%-دى قۇرايدى. جانساقتاۋ بولىمىندە 240-تان اسا ادام جاتىر, ونىڭ 49-ى ءوجج اپپاراتىندا جاتىر. ال جانساقتاۋ بولىمىندەگى توسەكتىك ورىن جۇكتەمەسى – 84%. كۇنىنە 200-دەن اسا ادام اۋرۋحاناعا ءتۇسىپ جاتىر.
قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆتىڭ ايتۋىنشا, جانساقتاۋ بولىمىنە كۆي-عا قارسى ۆاكتسينا الماعان پاتسيەنتتەر ءتۇسىپ جاتىر. ستاتسيونارعا جەتكىزىلگەننەن كەيىن ولاردىڭ دەنساۋلىعى ەكى-ءۇش كۇندە وتە اۋىر كۇيگە دەيىن ناشارلايدى.
«بىزدەگى جانساقتاۋ بولىمىندەگى توسەكتىك ورىندار تولۋعا شاق تۇر. كوروناۆيرۋس ينفەكتسياسىنا قارسى ەكپە الماعان, اۋىر كۇيدە جاتقان 248 پاتسيەنت بار. ونىڭ ىشىندە 77 ادام وتە اۋىر حالدە جاتىر. ناۋقاستاردىڭ باسى-قاسىندا جۇرگەندىكتەن, بۇل كورسەتكىش قاتتى الاڭداتىپ وتىر. ءبىز وتكەن جىلعى ەڭ اۋىر كۇيگە جەتەيىن دەپ قالدىق», دەيدى باسقارما باسشىسى.
ول اۋىر كۇيدە جاتقاندار اراسىندا قارت كىسىلەر عانا ەمەس 35 جاستاعى ناۋقاستار دا بار ەكەنىن اتاپ ءوتتى.
«ۆيرۋس جاڭا شتامدارعا مۋتاتسيالانىپ وتىرادى, ارقايسىسى جاستار اراسىندا ءجيى جۇعا باستايدى. قازىر جاستار دا, ءتىپتى بالالار دا اۋرۋدىڭ اۋىر كۇيىنە ۇشىراي باستادى. ەكى-ءۇش كۇن ىشىندە پاتسيەنتتەردىڭ دەنساۋلىعى ناشارلاعانى سونشالىق, جاساندى تىنىس الۋ اپپاراتىنسىز ءومىر سۇرە المايتىن كۇيگە جەتەدى. جانساقتاۋ بولىمىندە بارلىق پاتسيەنتتىڭ مۇنداي جاعدايعا ءتۇسۋىنىڭ سەبەبى – ۆاكتسينالانباعان. بىراق ولار مۇنى كەش ءتۇسىندى», دەدى ت.مۇراتوۆ.
وسىدان ەكى كۇن بۇرىن COVID-19-بەن كۇرەستىڭ الدىڭعى شەبىندە جۇرگەن ەلوردالىق دارىگەرلەر باق ارقىلى اۋرۋحاناداعى جاعدايدى كورسەتكەن ەدى. كادرلاردىڭ بىرىندە ارەڭ دەم الىپ جاتقان ەر ادامنىڭ كەۋدەسى كورسەتىلگەن. پاتسيەنتتىڭ وزدىگىنەن دەم الا الماي, ارنايى اپپاراتقا قوسىلعانىن كورۋگە بولادى.
ناۋقاستاردىڭ ءبىرى – زەينەتكەر ءمادينا سىزدىقوۆا اۋرۋحانادا جۇبايىمەن بىرگە جاتقانىن, قازىر ەكۋىنىڭ دە جاعدايى ەداۋىر جاقسارىپ قالعانىن ايتتى. «جۇبايىم ەكەۋمىز قاۋىپسىزدىك شارالارىن ساقتاپ جۇرگەندە ءبارى جاقسى بولاتىن. كوپشىلىككە كوروناۆيرۋسپەن اۋىرعان ادام رەتىندە بۇل اۋرۋعا ءجۇردىم-باردىم قاراۋعا بولمايتىنىن ەسكەرتكىم كەلەدى. بۇل ۆيرۋس وتە قاۋىپتى. قورقاتىنداي-اق قاۋىپتى», دەيدى ول.
بۇل رەتتە ينفەكتسيالىق ستاتسيونارعا قايتا بەيىمدەلگەن كوپبەيىندى قالالىق بالالار اۋرۋحاناسىنىڭ ينفەكتسيونيست دارىگەرى اينۇر وماروۆا قالا تۇرعىندارىنا ۇندەۋ جولدادى. «جاعدايدىڭ اۋىر ەكەنىن الدىڭعى شەپتە كۇرەسىپ جۇرگەن بىزدەن ەستىگەندەرىڭىزدى قالايمىن. اۋىر ناۋقاستار كوپ, رەانيماتسيالىق توسەكتىڭ بىرەۋى دە بوس ەمەس. ىندەت جۇقتىرعان بالالار كوپ. ءوز دەنساۋلىعىڭدى, وزگەلەردىڭ دەنساۋلىعىن قورعاۋدىڭ جولى – سانيتارلىق نورمالاردى ساقتاۋ جانە ۆاكتسينا سالدىرۋ. ۆاكتسينا عانا اۋرۋدىڭ اۋىر كۇيىنەن جانە ءوجج اپپاراتىنا كىرىپتار بولۋدان قورعايدى», دەيدى دارىگەر.
