تاياۋدا قاراعاندى وبلىسىنا جۇمىس ساپارىمەن كەلگەن ۇەم تابيعي مونوپوليالاردى رەتتەۋ كوميتەتىنىڭ توراعاسى اسان دارباەۆ وڭىردەگى گازداندىرۋ جونىندەگى جوبانى ىسكە اسىرۋ جۇمىستارىنىڭ بارىسىمەن تانىستى.
جالپى قازىرگى ۋاقىتتا قۇرىلىسى جۇرگىزىلىپ جاتقان «سارىارقا» ماگيسترالدى گاز قۇبىرىنان كوگىلدىر وتىندى قاراعاندى, جەزقازعان جانە تەمىرتاۋ قالالارىنداعى ءۇش مىڭعا جۋىق تۇتىنۋشى الادى. ال بۇل سالاداعى سوڭعى جاڭالىقتىڭ ءبىرى – سالىنعان گاز جەلىلەرى قىزمەت كورسەتەتىن كومپانيانىڭ سەنىمدى باسقارۋىنا وتەدى. ال بۇل شارۋا ىسكە اسقاننان كەيىن ءتاريفتى بەكىتۋگە ءوتىنىم بەرىلەدى.
جۇمىس ساپارى بارىسىندا تابيعي مونوپوليالاردى رەتتەۋ كوميتەتىنىڭ توراعاسى گاز تاراتۋ پۋنكتتەرىندە, سونداي-اق كوگىلدىر وتىن قازىردىڭ وزىندە جەكە ۇيلەرگە جەتكىزىلگەن وبلىس ورتالىعىنداعى ميحايلوۆكا شاعىن اۋدانىندا بولدى.
وسى اۋدانداعى زاپادنىي كوشەسىندە تۇراتىن زەينەتكەر امان ءابجانوۆ گازدىڭ كەلگەنىن اسىعا كۇتىپ جۇرگەنىن جەتكىزدى.
– ارينە, گاز بولعانى جاقسى. ءبىز وتباسىمىزبەن وسى ۇيدە 20 جىلعا جۋىق تۇرامىز, كومىرمەن جىلىتامىز. قىستا بەس-التى توننا كومىر ساتىپ الامىز. گاز تيىمدىرەك بولار ەدى. بىراق قازاندىقتى قويۋ ءۇشىن ءۇيدىڭ ىشىنە قۇبىر تارتۋ ايتارلىقتاي شىعىنداردى تالاپ ەتەدى. ءبىز مۇنى ءبولىپ-ءبولىپ تولەيمىز دەپ ۇمىتتەنەمىز, – دەيدى ول.
وبلىستىق ەنەرگەتيكا جانە تكش باسقارماسىنىڭ باسشىسى ۇلانتاي ۇسەنوۆتىڭ ايتۋىنشا, بۇگىندە قاراعاندى, تەمىرتاۋ جانە جەزقازعان قالالارىندا العاشقى ىسكە قوسۋ كەشەندەرى اياقتالىپتى. ءۇش قالاداعى ءۇش مىڭعا جۋىق ابونەنت ۇيلەرىنە گاز جەلىلەرى تارتىلعان. قازىرگى ۋاقىتتا ەكىنشى كەزەكتىڭ قۇرىلىس جۇمىستارى جۇرگىزىلۋدە.
الداعى ۋاقىتتا جەزقازعان مەن تەمىرتاۋداعى گاز جەلىلەرىن سەنىمگەرلىك باسقارۋعا قابىلداعان «قازترانسگاز ايماق» اق قىزمەت كورسەتۋ كومپانياسى جۇمىسقا كىرىسەدى. كوپ ۇزاماي قاراعاندىدا دا تاپسىرۋ ۇدەرىسى اياقتالادى. كومپانيانىڭ ابونەنتتىك ءبولىمى اشىلعان, گاز قوسقىسى كەلەتىندەر ول جەردە تەحنيكالىق شارتتاردى الا الادى.
تابيعي مونوپوليالاردى رەتتەۋ كوميتەتىنىڭ توراعاسى اسان دارباەۆ بۇگىنگە دەيىن كوپ شارۋانىڭ تىندىرىلعانىن اتاپ ءوتتى.
– تامىز ايىندا ءبىزدىڭ دەپارتامەنتكە ءتاريفتى بەكىتۋگە ءوتىنىم بەرىلەدى دەپ كۇتەمىز. الدىن الا كوپشىلىك تىڭداۋلار وتەدى. بارلىق تاراپتاردىڭ مۇددەلەرى ەسكەرىلەدى. قازان ايىنىڭ باسىنا دەيىن وبلىس بويىنشا گازدىڭ تۇپكىلىكتى قۇنى انىقتالادى دەپ ويلايمىن, – دەپ مالىمدەدى ول.
بۇگىنگە دەيىن ۇيلەرىن كومىرمەن جىلىتىپ كەلگەن ارقا توسىندەگى اعايىن ءۇشىن گاز باعاسىنىڭ قولجەتىمدى بولعانى – اسا ماڭىزدى ماسەلەنىڭ ءبىرى. بۇدان بولەك, كوگىلدىر وتىننىڭ كەلۋى وبلىستاعى ەكولوگيالىق احۋالدىڭ جاقسارۋىنا دا يگى سەپتىگەدى دەپ ۇمىتتەنەدى ءوڭىر تۇرعىندارى.
قاراعاندى وبلىسى
