TOKYO2020 • 24 شىلدە، 2021

بوستاندىق ارالىنىڭ باعىنا تۋعان بالۋان

1130 رەت كورسەتىلدى

تالاي جىلدان بەرى تورتكۇل دۇنيە جۇرتشىلىعىن تەڭدەسسىز ونەرىمەن تامساندىرىپ جۇرگەن تۇلعالاردىڭ بارلىعىن دا توكيودا الاۋى تۇتانعان XXXII جازعى وليمپيا ويىندارىندا باس قوستى. مىنە، سونداي سۇيەگى اسىل، رۋحى بيىك، شەبەرلىك دەڭگەيى شارىقتاۋ شەگىنە جەتىپ، اتاق-داڭقى الىسقا تاراعان ازاماتتاردىڭ ءبىرى – «كۋبانىڭ قارا نارى» اتانعان گرەك-ريم كۇرەسىنىڭ حاس شەبەرى ميحاين لوپەس. جاپونيانىڭ باس شاھارىندا وتەتىن جارىستا جەر جاھان جانكۇيەرلەرىنىڭ نازارى ءداپ وسى اپايتوسكە اۋاتىنى ءسوزسىز. ونىڭ وزىندىك سەبەبى دە بار.        

سپورتتىق شەجىرەنىڭ سارعايعان بەتتەرىن پاراقتاساق، جەكپە-جەك تۇرلەرى بويىنشا ەرلەر اراسىندا وليمپيادانىڭ ءتورت دۇركىن چەمپيونى اتانعان بىردە-ءبىر دارابوزدىڭ جوق ەكەنىن اڭعارۋ قيىن ەمەس. تىپتەن، وسى بەلەستى ءۇش رەتتەن باعىندىرعان سپورتشىلاردىڭ وزدەرى ساناۋلى عانا. ماسەلەن، گرەك-ريم كۇرەسىن سەرىك ەتكەن ساڭلاقتاردىڭ ۇشەۋ عانا سول دەڭگەيدەن كورىندى. ولار – شۆەتسيالىق كارل ۆەستەرگەن، رەسەيلىك الەكساندر كارەلين جانە كۋبالىق ميحاين لوپەس.

كارل ۆەستەرگەن 1920 جىلى انتۆەرپەن، 1924 جىلى پاريج جانە 1932 جىلى لوس-اندجەلەستەگى دودالاردا الدىنا جان سالمادى. ول ءار وليمپيا ويىندارىندا ءتۇرلى سالماق دارەجەسىندە (75 كيلو، 82،5 كيلو، +87 كيلو) ونەر كورسەتتى. العاش رەت باس جۇلدەنى ۆەستەرگەن جالىنداپ تۇرعان 25 جاسىندا ولجالاسا، سوڭعى رەت 37 جاسىندا جەڭىمپاز اتاندى. 1928 جىلى سكانديناۆيانىڭ ساڭلاعى امستەردامدا دا ايقاستى. جارىستىڭ باستى ءفاۆوريتى سانالعان شۆەد بالۋانى تۇساۋكەسەر كەزدەسۋىندە فينليانديالىق ونني پەللينەننەن ويدا-جوقتا ۇتىلىپ قالدى. سول كەزدەگى ەرەجەگە ساي ونىڭ جەڭىس تۇعىرىنا كوتەرىلۋگە ءالى دە مۇمكىندىگى بار ەدى. بىراق جوعارىداعى ساتسىزدىككە كۇيىنگەنى سونشالىق، ول ودان ءارى بەلدەسۋدى قۇپ كورمەدى. كارل كيىم-كەشەگىن جيدى دا، مالمەگە ءبىر-اق تارتتى.

الەكساندر كارەلين 1988 جىلى سەۋلدە العاش رەت توپ جاردى. كورەيا تۇبەگىندە 21 جاستاعى كسرو الىبىنىڭ تەگەۋىرىنىنە ەشكىم تويتارىس بەرە المادى. ول 1992 جىلى بارسەلونا جانە 1996 جىلى اتالانتادا دا قارسىلاس شاق كەلتىرمەدى. وسى باسەكەلەر باراسىندا جەر جاھاننىڭ بىردە-ءبىر الىبى الەكساندردىڭ «ارتقى بەلبەۋىنەن» قۇتىلا العان جوق. ءتورت دۇركىن وليمپيادا چەمپيونى اتانۋدى كوزدەگەن «ورىس ايۋى» 2000 جىلى سيدنەيدەگى ويىنداردا دا ونەر كورسەتتى. باستاپقى باسەكەلەردە بولگاريالىق سەرگەي مۋرەيكو، ماجارستاندىق ميحاي دەاك-باردوش جانە ۋكراينالىق گەورگي سالادزەگە سان سوقتىرىپ، جارتىلاي فينالدا بەلارۋسسيالىق دميتري دەبەلكودان باسىم ءتۇستى. فينالدا كارەلين امەريكالىق رۋلون گاردنەرمەن ايقاستى. نەگىزگى ۋاقىت تەڭ اياقتالدى. ال بەلدەسۋ بارىسىندا رەسەيلىك الىپتىڭ ساۋساقتارى اجىراپ كەتىپ، اقش بالۋانىنىڭ اسىعى الشىسىنان ءتۇستى. ءسويتىپ، جاسىل قۇرلىقتا 33 جاستاعى الەكساندر كۇمىس مەدالدى قاناعات تۇتتى.

ەركىن كۇرەستەن ءۇش دۇركىن وليمپيادا چەمپيونى اتانعان مارقاسقالاردىڭ سانى ەكەۋ. العاشقىسى – الەكساندر مەدۆەد. حح عاسىردىڭ الپىسىنشى جانە جەتپىسىنشى جىلدارىندا كسرو نامىسىن قورعاعان بەلارۋسسيالىق بالۋان توكيو، مەحيكو جانە ميۋنحەندەگى ويىنداردا الدىنا جان سالمادى. العاشقى جارىستىڭ شەشۋشى باسەكەسىندە تۇركيالىق احمەت ايكتى جەڭىگەن ول سوڭعى ەكەۋىندە بولگاريالىق وسمان دۋراليەۆتەن باسىم ءتۇستى. مەدۆەد اۋىر جانە اسا اۋىر سالماقتاردا اتوي سالدى. الەكساندر ءوزىنىڭ سوڭعى وليمپياداسىن 35 جاسىندا ۇتتى.

ەكىنشى دارابوز – رەسەيلىك بۋۆايسار سايتيەۆ. 1975 جىلى داعىستاننىڭ حاساۆيۋرت قالاسىندا دۇنيەگە كەلگەن چەشەن جىگىتى ءتورت بىردەي وليمپيا ويىندارىنا قاتىسىپ، ۇشەۋىندە دارا شىقتى. تارقاتىپ ايتساق، 1996 جىلى اتلانتادا التىن تۇعىرعا كوتەرىلسە، 2000 جىلى سيدنەيدە توعىزىنشى ورىنعا تابان تىرەدى. بىراق بۇل جاعداي قاپ تاۋى قىرانىنىڭ ساعىن سىندىرا العان جوق. سيدنەيدەگى ساتسىزدىزدىگىنەن ۇلكەن ساباق العان ول 2004 جىلى افينى جانە 2008 جىلى بەيجىڭدەگى جارىستارعا كەرەمەت دايارلىقپەن كەلدى. ناتيجەسىندە وسى باسەكەلەردىڭ ەكەۋىندە دە بۋۆايساردىڭ باق جۇلدىزى جارقىراي جاندى. 74 كيلو سالماق دارەجەسىندە بەلدەسكەن چەشەن ۇلتىنىڭ ءور مىنەزدى ۇلى ەجەلگى ەللادا ەلىندەگى جارىستىڭ فينالىندا قازاقستاندىق گەننادي لاليەۆتى ۇتقانىن كۇرەس سۇيەر قاۋىم ۇمىتا قويعان جوق.

عالامدىق دودادا ءۇش رەت توپ جارعان بالۋاندار اراسىنان يۆار يۋحانسسون سىندى ەرەك تۇلعانى ەرەكشە اتاپ وتۋگە بولادى. شۆەتسيانىڭ نوررچەپينگ قالاسىنىڭ تۋماسى وتكەن عاسىردىڭ العاشقى جارتىسىندا تالاي بايراقتى باسەكەدە مول ولجاعا كەنەلدى. تارقاتىپ ايتساق، العاش رەت ول 1928 جىلى امستەردامدا باق سىنادى. بىراق قادامى ءساتتى بولمادى. ەسەسىنە 1932 جىلى يۆاردىڭ اسىعى الشىسىنان ءتۇستى. العاشىندا ول ەركىن كۇرەس شەبەرلەرىنىڭ سايىسىندا 79 كيلو سالماق دارەجەسىندە سىنعا ءتۇسىپ، قارسى كەلگەندەرىن الىپ تا، شالىپ تا جىقتى. ناتيجەسىندە التىن مەدالدى مويىندا جارقىراتتى. جارىس اياقتالعاننان سوڭ ول ماراپاتتاۋ راسىمىنە كەلمەدى. سەبەبى، كەلەسى كۇنى ول گرەك-ريم كۇرەسىنەن وتەتىن جارىستا بەلدەسۋدى قۇپ كوردى. بۇل باسەكەدە يۋحانسسون 72 كيلو سالماقتا كۇش سىناستى. تاڭعا دەيىن بەس-التى كيلو ارتىق سالماقتان ارىلعان شۆەتسيالىق سپورتشى كۇرەستىڭ بۇل تۇرىندە دە قارسىلاس شاق كەلتىرمەدى. وسىلايشا، سكانديناۆيانىڭ سايىپقىرانى ءبىر وليمپيادادا ەكى التىن الىپ، ءوز جانكۇيەرلەرىن قۋانىش پەن شاتتىققا بولەدى. 1936 جىلى بەرليندە يۆار يۋحانسسون گرەك-ريم كۇرەسى شەبەرلەرىمەن سايىسقا ءتۇسىپ، باس جۇلدەنى قانجىعاسىنا بايلادى.

دزيۋدوشىلار اراسىنان جوعارىداعىداي قۇرمەتكە بولەنگەن جالعىز عانا بالۋان بار. ول – تاداحيرو نومۋرا. 1974 جىلى جاپونيانىڭ نارا پرەفەكتۋراسىنا قاراستى كوريو دەپ اتالاتىن شاعىن عانا قالاشىقتا جارىق دۇنيە ەسىگىن اشقان بولاشاق جارقىن جۇلدىز 1996-2004 جىلدار ارالىعىندا الاۋى تۇتانعان وليمپيا ويىندارى بارىسىندا قارسى كەلگەندەردى قوعاداي جاپىردى. اتلانتانىڭ فينالىندا يتاليالىق دجيرولاما دجوۆيناتستسونى اياعىن كوكتەن كەلتىرسە، سيدنەيدە كورەيالىق چون بۋ گەننىڭ سىلىكپەسىن شىعاردى. ال افينىدا ول گرۋزيالىق نەستور حەرگيانيدىڭ وسال تۇسىن وڭاي تاپتى.   

ءۇش دۇركىن وليمپيادا چەمپيونى اتاعىن جەڭىپ العان تۇڭعىش بوكسشى لاسلو پاپپ ەكەنىن جانكۇيەرلەر جاقسى بىلەدى. ورتا سالماقتا جۇدىرىقتاسقان ول 1948 جىلى لوندوندا بارلىق قارسىلاسىن بەت قاراتپاي ۇتىپ، التىن تۇعىردان قول بۇلعادى. 1952 جىلى حەلسينكي جانە 1956 جىلى مەلبۋرندە دە ماجارستاننىڭ ماقتانىشىنا تەڭ كەلەر ەشكىم تابىلمادى.

اراعا شيرەك عاسىرعا جۋىق ۋاقىت سالىپ لاسلو پاپتىڭ كورسەتكىشىن تەوفيلو ستيۆەنسون قايتالادى. اسا اۋىر سالماقتا ايقاسقان كۋبانىڭ قارا قابىلانى 1972 جىلى ميۋنحەندە وليمپيا ويىندارىنىڭ جەڭىمپازى اتانىپ قانا قويماي، ەڭ ۇزدىك بوكسشىعا تيەسىلى ۆەل باركەر كۋبوگىن دا ولجالادى. 1976 جىلى مونرەال جانە 1980 جىلى ماسكەۋدە دە ونىڭ مەرەيى ۇستەم بولدى. ءداپ سول ستيۆەنسوننىڭ ءتورت دۇركىن وليمپيادا چەمپيونى اتانۋىنا تاماشا مۇمكىندىگى بولعان-دى. 1984 جىلى لوس-اندجەلەستەگى ءدۇبىرلى دودا قارساڭىندا ول تاماشا بابىندا بولدى. بوستاندىق ارالىنىڭ وكىلى ءوزى قاتىسقان جارىستاردىڭ بارلىعىن تەگىستەي ۇتتى. الايدا سوتسياليستىك باعىتتاعى مەملەكەتتەردىڭ ايتۋلى جارىسقا بويكوت جاريالاۋىنا بايلانىستى تەوفيلونىڭ اقش-قا جولى تۇسپەدى.

تابانى كۇرەكتەي 15 جىل بويى 91 كيلو سالماق دارەجەسىنىڭ تىزگىنىن ەشكىمگە ۇستاتپاعان فەليكس ساۆون دا ءدال سونداي جاعدايدى باسىنان كەشتى. تەوفيلو ستيۆەنسوننىڭ ءىزباسارى سانالعان كۋبالىق بوكسشىنىڭ الەم چەمپيونى دەگەن اتاعى بولا تۇرا 1988 جىلى سەۋل وليمپياداسىنا بارا العان جوق. سەبەبى، سول باياعى بويكوت. ەسەسىنە 1992 جىلى بارسەلونا، 1996 جىلى اتلانتا جانە 2000 جىلى سيدنەيدەگى سايىستاردا ساۆوننىڭ سويقان سوققىلارىنا ەشكىم شىداس بەرە العان جوق.

جەكپە-جەك تۇرلەرىنە اۋىر اتلەتيكانى دا قوسۋعا بولادى. باتپان تەمىرمەن بەتپە-بەت شىعاتىن جىگىتتەر اراسىندا وليمپيادانىڭ ءۇش دۇركىن چەمپيونى اتانۋ باقىتى ءتورت ساڭلاققا بۇيىردى. العاش رەت بۇل بەلەستى تۇركيانىڭ تارلانبوزى نايم سۋلەيمانوعلى باعىندىردى. باستاپقى كەزەڭدەردە ول بولگاريانىڭ نامىسىن قورعادى. كەيىننەن انادولى ەلىنە اتتاندى. نايم 1988-1996 جىلدار ارالىعىندا سەۋل، بارسەلونا جانە اتلانتادا اتوي سالدى.

پيرروس ديماس پەن كاحي كاحياشۆيلي 1992-2000 جىلدار ارالىعىندا تورتكۇل دۇنيەنىڭ تەڭدەسسىزدەرى ەكەنىن تۇبەگەيلى مويىنداتتى. جالپى بۇل قوس  سپورتشىنىڭ تاعدىرى ءبىر-بىرىنە ۇقساس. ماسەلەن، ديماس البانيادا تۋعانىمەن ۋاقىت وزا تاريحي وتانى – ەجەلگى ەللادا ەلىنە قونىس اۋداردى. ول ءوزىنىڭ بارلىق تابىسىنا گرەكيانىڭ تۋى استىندا ونەر كورسەتكەن جىلدارى قول جەتكىزدى. ال كاحياشۆيلي گرۋزيادا دۇنيەگە كەلدى. ول العاشقى التىنىنا تمد قۇراماسى ساپىندا جۇرگەن كەزىندە قول جەتكىزدى. ودان كەيىن كاحي دا گرەكيانىڭ ازاماتتىعىن الىپ، حالىقارالىق ارەنالاردى اتالمىش مەملەكەتتىڭ سپورتتىق داڭقىن ارتتىردى.  

وليمپ شىڭىن ءۇش مارتە باعىندىرعان ءتورتىنشى زىلتەمىرشى حاليل مۋتلۋ. ول دا نايم سۋلەيمانوعلى سەكىلدى بولگاريانىڭ تۋماسى. بىراق ەرتەرەكتە اتا-اناسىمەن بىرگە تاريحى وتانىنا ورالدى. 1992 جىلى حاليل بارسەلونادا باق سىنادى. بىراق بەسىنشى ورىندا قالىپ قويدى. بۇل ساتسىزدىك 19 جاستاعى دارىندى جىگىتتىڭ جىگەرىن جاسىتا العان جوق. جاتپاي-تۇرماي دايارلانعان مۋتلۋ ودان كەيىن قاتارىنان ءۇش بىردەي وليمپيادادا الدىنا جان سالماي، تۇركيانىڭ ماقتان تۇتار ازاماتىنا اينالدى.

مىنە، جەكپە-جەك تۇرلەرى بويىنشا ءۇش رەتتەن وليمپيادا چەمپيونى اتانعان تەڭدەسسىز تۇلعالار وسىلار. ولاردىڭ ارقايسىنىڭ ەسىمى الەمدىك سپورت تاريحىندا التىن ارىپتەرمەن جازۋلى. دەسەك تە توكيوداعى دودادا جوعارىداعى ناتيجەلەردىڭ جاڭارۋى مۇمكىن. ويتكەنى، كۇن شىعىس ەلىنە اتانعان سپورتشىلار اراسىندا داڭقى جەر جارعان ميحاين لوپەس بار. جاپونياداعى جارىس بارىسىندا كۇللى الەم جانكۇيەرلەرىنىڭ نازارى وسى بالۋانعا اۋاتىنى داۋسىز. ال سول ساڭلاق جايىندا ءبىز نە بىلەمىز؟  

ميحاين لوپەس 1982 جىلدىڭ 20 تامىزىندا كۋبانىڭ پينار-دەل-ريو قالاسىندا دۇنيەگە كەلدى. بويى – 195 سانتيمەتر، سالماعى 130 كيلو. العاش رەت ول 2004 جىلى افينى وليمپياداسىندا كوپشىلىك نازارىنا ىلىكتى. ەجەلگى ەللادا ەلىندە قارا قابىلان شيرەك فينالعا دەيىن جەتىپ، سول مەجەدە رەسەيلىك حاسان باروەۆتان جەڭىلدى. ارادا ءتورت جىل وتكەننەن سوڭ بەيجىڭدە ءدال سول باروەۆتان باسىم ءتۇسىپ، العاش رەت وليمپيا ويىندارىنىڭ جەڭىمپازى اتاندى. 2012 جىلى لوندون جانە 2016 جىلى ريو-دە-جانەيرودا دا ءدال سول كورسەتكىشىن قايتالاپ، الەمدەگى ەڭ اتاقتى بالۋانداردىڭ ساناتىنا ەركىن قوسىلدى. ايتۋلى جارىستاردىڭ فينالىندا ول ەستونيالىق حەيكي نابي مەن تۇركيالىق رىزا كاياالپتى قاپى قالدىردى.

لوپەس

جوعارىداعى تابىسىنان بولەك، لوپەستىڭ بەس دۇركىن الەم چەمپيونى، سول جارىستىڭ ءۇش دۇركىن كۇمىس جۇلدەگەرى، بەس دۇركىن پانامەريكا ويىندارىنىڭ جەڭىمپازى جانە توعىز دۇركىن پانامەريكا چەمپيونى دەگەن اتاقتارى تاعى بار. كەزىندە ونىڭ بايراقتى باسەكەلەردەگى باستى قارسىلاسى حاسان باروەۆ بولسا، سوڭعى جىلدارداعى جارىستاردىڭ شەشۋشى تۇسىندا رىزا كاياالپپەن جولى ءجيى قيىسۋدا. رەسمي جارىستاردا ولار التى رەت كۇش سىناستى. تۇركيانىڭ تارلانبوزى لوپەستى 2011 جانە 2015 جىلدارداعى دۇنيەجۇزىلىك دودانىڭ فينالىندا ۇتسا، قالعان التى ايقاستا بوستاندىق ارالى وكىلىنىڭ اسىعى الشىسىنان ءتۇستى.

بوتساندىق ارالىندا ەڭبەكتەگەن بالادان، ەڭكەيگەن قارتقا دەيىن ميحايندى ءپىر تۇتادى. بارشا جۇرت ونى ەرەكشە قۇرمەتتەپ، ايرىقشا قاستەرلەيدى. قازىرگى كەزدە لوپەستىڭ سۋرەت كۋباداعى ءاربىر كەڭسە مەن ءاربىر شاڭىراقتىڭ تورىندە ءىلۋلى تۇر. ءبىر عانا مىسال، وليمپيا ويىندارىنىڭ ءدۇبىرى ەستىلگەن سايىن «اشىلۋ سالتاناتىندا مەملەكەتتىك تۋدى ۇستاپ شىعۋدى كىمگە سەنىپ تابىستاساق ەكەن؟» دەگەن ماسەلە تۋىنداعان كەزدە ءتۇرلى دەڭگەيدەگى باسشىلار مەن باپكەرلەردەن باستاپ، سپورتشىلاردىڭ بارلىعى دا ءبىراۋىزدان لوپەستىڭ ەسىمىن اتاۋدا. وسى جايتتان-اق ءوز ەلىندە ايتۋلى سپورتشىنىڭ بەدەلى قانشالىقتى زور ەكەنىن اڭعارۋعا بولادى. داڭقى جەر جارعان بالۋان كۋبانىڭ تۋىن 2008 جىلى بەيجىڭ، 2012 جىلى لوندون جانە 2016 جىلى ريو-دە-جانەيرو وليمپيادالارىنىڭ اشىلۋ سالتاناتىندا ۇستاپ شىقتى.

تاياۋ كۇندەرى الاۋى تۇتاناتىن وليمپيا ويىندارىندا گرەك-ريم كۇرەسىنەن كۇش سىناساتىن 16 الىپتىڭ اراسىنان لوپەستىڭ باستى قارسىلاسى رەتىندە نەگىزىنەن تۇركيالىق رىزا كاياالپ پەن رەسەيلىك سەرگەي سەمەنوۆتىڭ ەسىمى اتالۋدا. وسى ەكەۋىنىڭ بىرەۋى كۋبالىق قابىلاندى تۇعىردان تايدىرۋى مۇمكىن دەگەن اڭگىمەلەر ايتىلۋدا. ءيا، بۇل اڭگىمەلەر نەگىزسىز ەمەس. سەبەبى، وزگە بالۋاندارعا قاراعاندا، وازىرگى كەزدە كاياالپ پەن سەمەنوۆتىڭ قارقىنى كۇشتى. 31 جاستاعى انادولى ەلىنىڭ الىبى بۇعان دەيىن لوپەستى ءبىر ەمەس، بىرنەشە رەت جەڭگەنىن جوعارىدا ايتتىق. رىزا لوندون وليمپياداسىندا قولا السا، ريو-دە-جانەيرودا كۇمىسپەن كۇپتەلدى. الەم چەمپيوناتتارىندا 4 التىن، 2 كۇمىس جانە 2 قولانى ەنشىلەدى. ەۋروپا بىرىنشىلىگىندە توعىز رەت توپ جاردى. الەم كۋبوگىن يەلەنىپ، ەۋروپا ويىندارىن ۇتتى.

25 جاستاعى سەرگەي سەمەنوۆ رەسەيدىڭ تۋلا قالاسىنىڭ تۋماسى. ريو وليمپياداسىندا ول قولا مەدالدى قورجىنعا سالسا، 2018 جىلى بۋداپەشتە الەم چەمپيونى اتاندى. الەم كۋبوگىنىڭ جەڭىمپازى جانە ەۋروپا ويىندارىنىڭ كۇمىس جۇلدەگەرى دەگەن اتاعى دا بار. سەرگەيدىڭ باسقا دا كوپتەگەن اسا ءىرى حالىقارالىق جارىستاردا مول ولجاعا كەنەلگەنىن جانكۇيەرلەر جاقسى بىلەدى.

جوعارىدا ەسىمدەرى اتالعان قوس مارقاسقادان بولەك، گرۋزيالىق ياكوب كادجايا (2019 جىلعى الەم چەمپيوناتىنىڭ قولا جۇلدەگەرى، ەۋروپا ويىندارىنىڭ جەڭىمپازى)، كورەيالىق كيم مينسوك (2018 جىلعى الەم چەمپيوناتىنىڭ قولا جۇلدەگەرى)، چيليلىك ياسماني اكوستا (2017 جىلعى الەم چەمپيوناتىنىڭ قولا جۇلدەگەرى) جانە وزبەكستاندىق مۋمينجون ابدۋللاەۆتىڭ (2018 جىلعى ازيا ويىندارىنىڭ جەڭىمپازى) الەۋەتى جوعارى باعالانۋدا.

مىنە، توكيوداعى ويىنداردىڭ باستى فاۆوريتتەرى وسى بالۋاندار. ەگەر ميحاين لوپەس وسى الىپتاردىڭ بارلىعىنان باسىم تۇسسە، ءوز ەسىمىن ول جەكپە-جەك تۇرلەرى بويىنشا ءتورت دۇركىن وليمپيادا چەمپيونى اتانعان جەر بەتىندەگى تۇڭعىش جانە ازىرگە جالعىز بالۋان رەتىندە سپورتتىق شەجىرەگە التىن ارىپتەرمەن جازىپ كەتەرى انىق.

سوڭعى جاڭالىقتار

مارافون نەسىمەن ماڭىزدى؟

الەم • 26 قىركۇيەك، 2021

تاعدىرى تەمىردەي شىڭداعان قايراتكەر

قازاقستان • 26 قىركۇيەك، 2021

شەكتەۋدە شيرىققان شاعىن بيزنەس

بيزنەس • 26 قىركۇيەك، 2021

پياندج وزەنىندەگى ەرلىك

تاريح • 26 قىركۇيەك، 2021

ەڭبەكپەن ەسەيگەن ەر

قازاقستان • 26 قىركۇيەك، 2021

بەيتانىس ساعىنىش

الەم • 26 قىركۇيەك، 2021

Astana Open ءتۋرنيرى اياقتالدى

سپورت • 26 قىركۇيەك، 2021

شەكاراشىلار ەليتالىق اسكەر بولسا...

قازاقستان • 26 قىركۇيەك، 2021

ۇلىبريتانيادا تانىستىرىلادى

وقيعا • 26 قىركۇيەك، 2021

وبلىس ورتالىعىنىڭ دەنى اۋىز سۋسىز وتىر

ايماقتار • 26 قىركۇيەك، 2021

مۇراعاتتاردىڭ ءحالى مۇشكىل

قوعام • 26 قىركۇيەك، 2021

نۇر-سۇلتان اۋەجايىندا ءتۇتىن شىقتى

ەلوردا • 26 قىركۇيەك، 2021

جالعىزدىق ارالى

كينو • 26 قىركۇيەك، 2021

تەننيس: Astana Open ءتۋرنيرى اياقتالدى

سپورت • 26 قىركۇيەك، 2021

ەلوردادا قار جاۋادى

قازاقستان • 26 قىركۇيەك، 2021

بالالار الاڭىنداعى تج: بالا ەسىن جيدى

ايماقتار • 26 قىركۇيەك، 2021

قاراعاندى-بالقاش تاس جولى جوندەلۋدە

ايماقتار • 26 قىركۇيەك، 2021

الماتىدا كىتاپ فەستيۆالى ءوتىپ جاتىر

ايماقتار • 26 قىركۇيەك، 2021

ماسكەۋدە جەتى جۇلدە الدىق

سپورت • 26 قىركۇيەك، 2021

ەلوردادا Astana Marathon-2021 ءوتىپ جاتىر

ەلوردا • 26 قىركۇيەك، 2021

بۇگىن ماشينا جاساۋ كۇنى

قازاقستان • 26 قىركۇيەك، 2021

قىزىلوردا وبلىسى «جاسىل» ايماققا ءوتتى

كوروناۆيرۋس • 26 قىركۇيەك، 2021

قانشا قازاقستاندىق ۆاكتسينا سالدىردى؟

كوروناۆيرۋس • 26 قىركۇيەك، 2021

قازاقستاندا ەڭبەك كۇنى اتاپ وتىلەدى

قازاقستان • 26 قىركۇيەك، 2021

سقو-دا جۇك كولىگى جىلۋ قۇبىرىنا سوعىلدى

ايماقتار • 25 قىركۇيەك، 2021

ۇقساس جاڭالىقتار