ايماقتار • 23 شىلدە، 2021

15 جاستاعى ءجاسوسپىرىم دوسىن سۋدان قۇتقاردى

207 رەت كورسەتىلدى

باتىس قازاقستان وبلىسى اقجايىق اۋدانىنا قاراستى قاراۋىلتوبە اۋىلىندا تۇراتىن اسىلان وراحاەۆ جايىق وزەنىنە سۋعا كەتىپ بارا جاتقان دوسى شىڭعىستى قۇتقارىپ قالىپتى. وقيعانى كەزدەيسوق كورىپ قالعان اۋىل تۇرعىنى بولماسا، ءجاسوسپىرىمنىڭ بۇل ەرلىگىن ەشكىم بىلمەس ەدى، دەپ حابارلايدى Egemen.kz.

وقيعا 19 شىلدە كۇنى كەشكى ساعات 19.00 شاماسىندا بولعان.

«كەشكى ساعات 6-نىڭ شاماسى ەدى. بالامنىڭ دوستارى شىڭعىس پەن جانتۋعان كەلىپ، اسىلاندى سۋعا شومىلۋعا ەرتىپ كەتتى. ادەتتەگىدەي تەرەڭگە بارماۋىن ەسكەرتىپ، جىبەردىم. سول كۇنى كەشتە ۇيگە كەلگەندە بالام كوپ سويلەمەي، تۇيىق وتىردى. بىراق ەشتەڭە ايتقان جوق. بولعان جاعدايدى اتا-انالاردىڭ whatsapp توبىنداعى اۋديوجازبادان ەرتەڭىنە ءبىر-اق ءبىلدىم»، دەيدى اسىلاننىڭ اناسى بارشاگۇل.

جايىق وزەنىندەگى دراماعا تولى وقيعاعا سول ماڭدا سەرۋەندەپ جۇرگەن اۋىل تۇرعىنى دينارا شامۇراتقىزى كەزدەيسوق كۋا بولعان.

«قىزىم اقمارجان ەكەۋمىز جايىقتا شومىلىپ جۇرگەنبىز. اۋىل جاقتان ءۇش بالا كەلىپ، بىزدەن الىسىراق جەردە ولار دا سۋعا تۇسە باستادى. اسىلان مەن جانتۋعان – توعىزىنشى سىنىپ بىتىرگەن، ال شىڭعىس – ءبىر سىنىپ تومەن وقيتىن بالا. ءبىر كەزدە ءبىر بالانىڭ كومەك سۇراعان داۋسى شىقتى. باسىندا بالالار ويناپ جۇرگەن شىعار دەپ ءمان بەرمەدىك. داۋىس تاعى شىققاندا قاراساق، شىڭعىس وزەننىڭ ورتاسىندا سۋعا باتىپ-شىعىپ ءجۇر ەكەن. سول كەزدە اسىلان ءجۇزىپ بارىپ، شىڭعىستى قۇتقارۋعا تالپىندى. ەكەۋى سۋ ورتاسىندا بىرەسە سۋعا باتىپ كەتەدى، بىرەسە سۋ بەتىنە شىعىپ، ارپالىسىپ جاتىر. بىرنەشە مينۋتتان كەيىن اسىلان شىڭعىستى ارەڭ دەگەندە سۋ جاعاسىنا الىپ شىقتى. سۋ جۇتىپ، السىرەپ قالعان شىڭعىس ءوز-وزىنە كەلگەن سوڭ ۇشەۋى اۋىلعا بەتتەدى. اسىلاننىڭ باتىرلىعىنا وسىلاي كۋا بولدىم»، دەيدى دينارا.

ءۇش دوس وقىس وقيعادان قاتتى شوشىپ قالسا كەرەك. وزەن جاعاسىنان اۋىلعا دەيىن ءۇنسىز كەلىپتى. «تەرەڭگە بارماڭدار!» دەگەن ۇلكەندەردىڭ ەسكەرتپەسىن بۇزعانىن ەشكىم بىلمەۋى ءۇشىن بولعان جايتتى قۇپيا قالدىرعان ەكەن. بىراق كەزدەيسوق كۋاگەردىڭ سەبەبىمەن اسىلاننىڭ ەرلىگى جاريا بولدى.

«بالامدى اجالدان قۇتقارعان اسىلانعا ونىڭ اتا-اناسىنا العىسىم شەكسىز. دەنى ساۋ بولىپ، امان ءوسسىن! اسىلاننىڭ بولاشاقتا ەلىنە ادال قىزمەت ەتەتىن ازامات بولاتىنىنا سەنىمدىمىن!»، دەيدى شىڭعىس ماناربەك ۇلىنىڭ اناسى م.كومەشوۆا.

ء«بىز اسىلان وقيتىن مەكتەپتەن، اۋىلدىق وكرۋگ اكىمدىگىنەن ءتيىستى قاعازداردى سۇراتىپ جاتىرمىز. باتىر بوزبالا دەپارتامەنتتىڭ العىس حاتىمەن ماراپاتتالادى»، دەيدى باتىس قازاقستان وبلىستىق توتەنشە جاعدايلار دەپارتامەنتىنىڭ قوعاممەن بايلانىس قىزمەتكەرى انەل مۇقانوۆا.

باتىس قازاقستان وبلىسىنىڭ سۋ ايدىندارىندا جىل باسىنان بەرى 22 ادام سۋعا كەتىپ قايتىس بولعان، ونىڭ 8-ءى – كامەلەتكە تولماعاندار.

سوڭعى جاڭالىقتار

دوللار قىمباتتادى

قارجى • بۇگىن، 15:52

ۇقساس جاڭالىقتار