تاۋەلسىزدىكتىڭ 30 جىلدىعىن مەرەكەلەۋگە بايلانىستى وتكەن ونلاين بريفينگتە نۇر-سۇلتان قالاسى ىشكى ساياسات باسقارماسىنىڭ باسشىسى داۋرەن بابامۇراتوۆ بۇگىنگە دەيىن حالىقارالىق, رەسپۋبليكالىق, قالالىق جانە اۋداندىق دەڭگەيدە 300-دەن استام ءتۇرلى ءىس-شارا ۇيىمداستىرىلعانىن اتاپ ءوتتى. وتىز جىلدىقتى مەرەكەلەۋگە قاتىستى ءارتۇرلى فورماتتاعى تاعى 800-دەن استام شارا وتكىزىلمەك. ونىڭ 700-دەن استامى قالالىق جانە اۋداندىق دەڭگەيدە بولسا, 80-ءى حالىقارالىق جانە رەسپۋبليكالىق دەڭگەيدە ۇيىمداستىرىلماق.
«جاستار اراسىندا سپورتتى ناسيحاتتاۋ, وسكەلەڭ ۇرپاقتى سالاۋاتتى ءومىر سالتىنا تاربيەلەۋ ماقساتىندا قالا اكىمدىگى تاۋەلسىزدىكتىڭ 30 جىلدىعىن مەرەكەلەۋ اياسىندا بىرقاتار رەسپۋبليكالىق جانە قالالىق سپورتتىق ءىس-شارالار وتكىزدى. سونداي-اق قالا تۇرعىندارىن بۇقارالىق سپورتقا تارتۋ ءۇشىن سپورت نىساندارى دا اشىلدى. اتاپ ايتقاندا, بوكس ورتالىعى, كوركەم گيمناستيكا ورتالىعى جانە جەكپە-جەك زالى قازىر جۇرتشىلىقتىڭ ءجيى باراتىن مەكەنىنە اينالدى. قالانىڭ شەتكى ەلدى مەكەندەرى دە نازاردان تىس قالعان جوق. ءوندىرىس, كوكتال سىندى الاپتاردا دەنە شىنىقتىرۋ-ساۋىقتىرۋ كەشەندەرى, جاۋىنگەرلىك ونەر ورتالىقتارى اشىلدى», دەيدى د.بابامۇراتوۆ.
ەل تاۋەلسىزدىگىنىڭ 30 جىلدىعىنا وراي وتكىزىلەتىن شارالارعا ەلوردانىڭ بارلىق مادەنيەت مەكەمەسى جۇمىلماق. مەرەكە بارىسىندا وفلاين جانە ونلاين رەجىمدە ارنايى تاقىرىپتاعى كونتسەرتتىك باعدارلامالار, سپەكتاكلدەر, قويىلىمدار, شىعارماشىلىق كەشتەر, كورمەلەر, ەكسكۋرسيالار وتكىزىلەدى.
بۇگىنگە دەيىن قالادا تاۋەلسىزدىكتىڭ 30 جىلدىعىنا وراي 30 قايىرىمدى ءىس وتكىزىلەتىنى حابارلانعان ەدى. جالپى, مۇنداي شارالار جىل سايىن قولعا الىنادى. بىراق وتىز جىلدىقتىڭ اۋراسى ەرەكشە. وسىعان وراي ۇيىمداستىرىلاتىن مەرەكەلىك شارالاردىڭ اۋقىمى دا بولەك. مەيرامدا مەرەكەلىك كوڭىل كۇيدى كوتەرۋ ماقساتىندا كونتسەرتتىك باعدارلامالار عانا ەمەس, ەلدىڭ ەسىندە قالارلىق قايىرىمدىلىق اكتسيالارى, قامكوڭىل جاندارعا قولۇشىن بەرۋ, الەۋمەتتىك كومەك جاساۋ, اسار وتكىزۋ سەكىلدى شارالار دا قامتىلماق.
ايتپاقشى, دارىندى جاستار دا نازاردان تىس قالمايدى. ولاردىڭ تالانتىن ۇشتاۋ, قولداۋ ماقساتىندا «تاۋەلسىزدىك ۇرپاقتارى» اتتى 30 گرانت بەرىلگەلى وتىر. ەلوردا ينفو سايتىنىڭ حابارلاۋىنشا, جاستار «عىلىم», «مادەنيەت», «بيزنەس», «اقپاراتتىق تەحنولوگيالار», «مەديا» باعىتتارى بويىنشا ءوز جوبالارى مەن جاڭا يدەيالارىن ۇسىنىپ, باق سىناي الادى. «تاۋەلسىزدىك ۇرپاقتارى» گرانتتارى دارىندى ءارى قابىلەتتى جاستاردى مەملەكەتتىك قولداۋ ماقساتىندا جىل سايىن بەرىلەدى. ۇمىتكەرلەردىڭ كونكۋرستىق وتىنىمدەرىن قابىلداۋ 20 قىركۇيەككە دەيىن جالعاسادى. بۇل – تالانتتى جاستارعا ۇلكەن مۇمكىندىك», دەيدى جاستار جانە وتباسى ىستەرى كوميتەتىنىڭ توراعاسى شاحماردان بايمانوۆ ورتالىق كوممۋنيكاتسيالار قىزمەتىندە وتكەن بريفينگتە.
سونىمەن تاۋەلسىزدىكتىڭ 30 جىلدىعىنا ارنالعان شارالار كوپ. البەتتە, پاندەمياعا بايلانىستى جوسپارعا وزگەرىستەر ەنگىزىلىپ, فورماتى تۇزەتىلۋى مۇمكىن دەيدى ۇيىمداستىرۋشىلار. دەگەنمەن دە باستى شارالار وتكىزىلەدى. «جىل سوڭىنا دەيىن قالادا ەل ەگەمەندىگىنىڭ 30 جىلدىعىنا ارنالعان جۇزدەگەن سپورتتىق, مادەني, عىلىمي-تانىمدىق, قايىرىمدىلىق ءىس-شاراسىن وتكىزۋ جوسپاردا بار. بۇل جاعدايدا سانيتارلىق نورمالار مەن شەكتەۋ شارالارى قاتاڭ ساقتالادى», دەيدى د.بابامۇراتوۆ.
باسقارما باسشىسى, سونداي-اق ماۋسىم-شىلدە ايلارىندا نۇر-سۇلتاندا مەملەكەتتىك رامىزدەر كۇنى, مەديتسينا قىزمەتكەرلەرى كۇنى, قازاقستان پوليتسياسى كۇنى جانە ەلوردا كۇنى سياقتى مەرەكەلەرگە ارنالعان 200-دەن استام ءتۇرلى ءىس-شارا وتكەنىنە دە توقتالدى. «بيىل ەلوردا كۇنىن مەرەكەلەۋ الەۋمەتتىك جوبالارعا ارنالدى جانە تەك الەۋمەتتىك سيپاتتا بولدى. وسىلايشا, حالىقتىڭ الەۋمەتتىك وسال توپتارى اراسىندا كەزەكتە تۇرعاندارعا پاتەر كىلتى تاپسىرىلدى, قۇرىلىسى ۇزاققا سوزىلعان 20 ءۇي اياقتالدى, ءوندىرىس جانە كوكتال ەلدى مەكەندەرىندە ءىرى دەنە شىنىقتىرۋ-ساۋىقتىرۋ كەشەندەرى پايدالانۋعا بەرىلدى. سونىمەن قاتار كورۋ قابىلەتى بۇزىلعان بالالارعا ارنالعان مامانداندىرىلعان بالاباقشا اشىلدى, 50-دەن استام اۋلانىڭ, 10-عا جۋىق قوعامدىق كەڭىستىكتىڭ قۇرىلىسى اياقتالدى», دەدى ول.
بۇدان بولەك, ەلوردادا قازاق حالقىنىڭ بەلگىلى تۇلعالارى — دينا نۇرپەيىسوۆاعا, قانىش ساتپاەۆقا, ءاليحان بوكەيحانعا, احمەت بايتۇرسىن ۇلىنا جانە مىرجاقىپ دۋلات ۇلىنا ەسكەرتكىشتەر ورناتىلدى. سونداي-اق تاۋەلسىزدىك مەرەيتويىنا وراي نۇر-سۇلتاندا «قۇتقارۋشىلار ساياباعى» اشىلدى.
