بالۋاننىڭ بەيىتىن ەرتەرەكتە كورگەنبىز. جولساپاردا جۇرگەن كەزىمىزدە جامپوزدىڭ جامباسى تيگەن جەر تۋرالى ەستىگەن سوڭ ادەيىلەپ ات باسىن بۇرعانبىز. ول كەزدە مەموريالدىق كەشەن ورناتىلماعان, زيراتى تويعان قوزىداي تومپيىپ قانا جاتقان تۇسى ەدى. جەرگىلىكتى باسىلىمداردا بالۋاننىڭ باعاسىنا جەتەيىكشى دەپ جان ايقايىن جازدىق.
كەيىن 2005 جىلى مەموريال-كەشەن تۇرعىزىلدى. باتىرلىقتىڭ باعاسىن بىلەتىن جۇرتتىڭ قۋانىشىندا شەك بولعان جوق. ارقانىڭ ارىستانىنىڭ ءوزى بولماسا دا رۋحى تۋعان ەلىمەن تابىسىپ, اق تۇيەنىڭ قارنى جارىلعان ايتۋلى وقيعا بولدى. 14 جاسىنان باستاپ بوزكىلەمدە بەلدەسكەندە جاۋرىنى جەرگە ءتيىپ كورمەگەن, كەيىن ەل اڭىزعا اينالدىرعان نەشە قيلى كۇش ونەرىن كورسەتكەن, شۋ اساۋدىڭ قۇلاعىندا ويناعان, ەت جۇرەگى ەلجىرەي سۇيگەن سارىارقاسىن سازدى اۋەنىمەن تەربەتكەن بالۋان شولاقتى الاش بالاسىندا ەستىپ-بىلمەگەن ادام جوق شىعار. تاياۋدا تاعى دا بەيىت باسىنا جول ءتۇستى. اسىلىندا ءبىز وزگەنى قايدام, ۋادەگە جومارت حالىقپىز عوي. ون بەس جىل بۇرىن مەموريالدىق كەشەن ورناتىلعاندا, بەرىلگەن سەرتتى سوزدە شەك جوق ەدى. تاريحي ورىننىڭ بۇتىندىگىنە جاۋاپتى ادامدار بالاداي باپتاپ كۇتەمىز دەسكەن. اۋىلدان نەبارى بەس شاقىرىمداي جەردەگى ەسكەرتكىش كەشەنگە باراتىن تاقتايداي جول سالىنادى دەپ قۇداي ءسوزى – ۋادەلەرىن بەرگەن. ءبىرى دە ورىندالماپتى. جالپاق جۇرتتى تال بويىنداعى تاماشا قاسيەتتەرىمەن ءتانتى ەتكەن جارىقتىقتىڭ كەشەنى جانى اشىماستىقتان توزىپ كەتكەن.
– وسى بەس شاقىرىم جولدى كولىكپەن ءجۇرىپ وتكەندە بەلىڭ ۇزىلە جازدايدى, – دەيدى بالۋاننىڭ نەمەرەسى شايدوللا شولاقوۆ, – كەشەن دە توزىپ كەتتى. كەلىمدى-كەتىمدى كىسىلەردەن ۇيات.
وبلىستىق ەسكەرتكىشتەردى قورعاۋ ورتالىعىنىڭ باسشىلارى بالۋاننىڭ ەسكەرتكىش كەشەنى قورعالۋعا ءتيىستى نىسانداردىڭ تىزىمىنە ەنگىزىلمەي قالعاندىعىن ايتىپ وتىر. الداعى ۋاقىتتا ارنايى كوميسسيانىڭ نازارىنا ۇسىنباق. اۋداندا دا اۋىز تولتىرىپ ايتاتىن ءىس جوق.
– بيىل جوبالىق-سمەتالىق قۇجاتتارىن جاسايمىز, – دەيدى اۋدان اكىمىنىڭ ورىنباسارى وراز سماعۇلوۆ, – قانشا قاراجات قاجەت ەكەندىگى سول كەزدە بەلگىلى بولادى. ازىرگە قول قىسقا.
ءدۇيىم ەل رۋحاني جاڭعىرىپ, كەمەلدەنىپ جاتقاندا, بالۋان شولاقتاي بابامىزدىڭ كەشەنىن كەلىستىرىپ, كۇتىپ ۇستاي الماعانىمىز كورگەن جاننان ۇيات ءتىپتى!..
اقمولا وبلىسى,
بۇلاندى اۋدانى
