ايماقتار • 22 شىلدە، 2021

باسشىسىنان كەك الماق بولعان ازامات پوليتسياعا جالعان حابارلاما بەرگەن

128 رەت كورسەتىلدى

اتىراۋدا باسشىسىنان كەك الماق بولىپ، پوليتسياعا جارىلعىش زات تۋرالى جالعان حابارلاما بەرگەن اقتاۋلىق ۇستالدى، دەپ حابارلادى Polisia.kz.

بەلگىسىز ەر ادام 17 شىلدە كۇنى پوليتسياعا قوڭىراۋ شالىپ، قۇرىلىسى اياقتالماعان زاۋىتتاردىڭ بىرىندە جارىلعىش زات قويىلعانىن ايتقان. وقيعا ورنىن پوليتسيا قىزمەتكەرلەرى دەرەۋ قورشاۋعا الىپ، جارىلعىش زاتتى زالالسىزداندىراتىن ماماندار مەن قىزمەتتىك يتتەر ارقىلى تەكسەرۋگە كىرىسكەن. الايدا نىسان اۋماعىنان ەشقانداي جارىلعىش زات تابىلماعان.

اتىراۋ وبلىسى پوليتسيا دەپارتامەنتى ەكسترەميزمگە قارسى ءىس-قيمىل باسقارماسى قىزمەتكەرلەرى جەدەل-ىزدەستىرۋ جۇمىستارى كەزىندە قوڭىراۋ شالعان 38 جاستاعى ەر ادامنىڭ جالعان حابارلاما بەرگەنىن انىقتادى. بەلگىلى بولعانداي، كۇدىكتى سوڭعى ءتورت جىل بويى قالا اۋماعىندا قىزمەت اتقارىپ جۇرگەن اقتاۋ قالاسىنىڭ تۇرعىنى بولىپ شىقتى. ەر ادام بۇرىن سوتتى بولعان. ول ءوزىن جۇمىستان بوساتقان باسشىسىنان ءوش الماق بولىپ، جالعان حابارلاما بەرگەنىن ايتىپ اقتالعان. قازىرگى ۋاقىتتا وعان قاتىستى قر قك 273-بابى بويىنشا سوتقا دەيىنگى تەرگەپ-تەكسەرۋ امالدارى جۇرگىزىلۋدە. كۇدىكتى ۋاقىتشا ۇستاۋ يزولياتورىنا قاماۋعا الىنعان.

«جىل باسىنان تەرروريزم اكتىسى تۋرالى جالعان حابارلاما بەرۋ بويىنشا ەكى دەرەك تىركەلگەن. قر قك 273-بابىندا كوزدەلگەن رەتتە تەرروريزم اكتiسi تۋرالى كورiنەۋ جالعان حابارلاما تاراتقان تۇلعاعا بەس مىڭ ايلىق ەسەپتىك كورسەتكىش مولشەرىندە ايىپپۇل سالۋعا، نە سول مولشەردە تۇزەۋ جۇمىستارىنا، نە بەس جىلعا دەيىنگى مەرزىمدە باس بوستاندىعىن شەكتەۋگە، نە سول مەرزىمگە باس بوستاندىعىنان ايىرۋعا جازالاناتىنىن ەسكەرتەمىز»، دەدى اتىراۋ وبلىسى پوليتسيا دەپارتامەنتى باستىعى قامزا ۇمبەتقاليەۆ.

سوڭعى جاڭالىقتار

وتكەن تاۋلىكتە 187 ادام ىندەت جۇقتىردى

كوروناۆيرۋس • بۇگىن، 10:40

دوللار ارزاندادى

قارجى • كەشە

ۇقساس جاڭالىقتار