تاياۋدا جامان تۇماۋمەن كۇرەسىپ جاتقان مەديتسينا ورتالىقتارىنا ءباسپاسوز تۋرى ۇيىمداستىرىلدى. ارينە, بارلىق ساقتىق شاراسى ساقتالدى. باس كوتەرۋگە مۇرشاسى بولماسا دا, اق حالاتتى ابزال جاندار ستاتيستيكالىق دەرەكتەردىڭ انشەيىن ويدان شىعارىلماعانىن, ادام جانىن تىتىركەنتەتىن دەرەكتەردىڭ بارلىعى شىندىق ەكەنىن اشىنا وتىرىپ ايتىپ بەردى. ەندى سول دەرەكتەردى كەلتىرە كەتەلىك. وتكەن جىلعى سايكەس مەرزىممەن سالىستىرعاندا, وبلىستا ىندەت ءۇش ەسە وسكەن. اسىرەسە 18 جاسقا دەيىنگى بالالارعا, جۇكتى ايەلدەرگە, سوزىلمالى سىرقاتى بار ادامدارعا ەشكىمدى اياۋدى بىلمەيتىن قاۋىپ-قاتەر ءتوندىرىپ تۇر. سەبەپ بىرەۋ-اق, ازىرشە ولار ءۇشىن ۆاكتسينالاۋ جوق. تىعىرىقتان شىعار جالعىز جولدى مامانداردىڭ نۇسقاپ كورسەتۋىنە قاراعاندا, تۇرعىنداردىڭ بۇل ساناتىن تەك ۇجىمدىق يممۋنيتەتپەن قورعاۋعا بولادى. بىراق بۇل تاراپتا دا ولقىلىقتىڭ ورىن الىپ وتىرعانىن اشىنا ايتۋعا ءتيىستىمىز. ماسەلەن, وبلىس ورتالىعىنداعى ۆاكتسينا الۋعا جاتاتىن 780 مىڭنان اسا ادامنىڭ بۇگىندە نەبارى 140 مىڭعا جۋىعى عانا ەكپە العان. يممۋنيتەتتى قورعانىستىڭ قانات جايماۋى دا سول سەبەپتى. وسىدان بارىپ ىندەتتىڭ بوي بەرمەي تۇرعانىن بايقاۋعا بولادى. كەرىسىنشە ءورشي تۇسكەن. ايتالىق وتكەن جىلدىڭ التى ايىندا وبلىس بويىنشا 143 بالا ەمدەلسە, بيىلدىڭ باسىنان بەرى ەكى مىڭنان اسا كامەلەتكە تولماعان بالا دەرت شەڭگەلىنە ىلىككەن.
ىندەتپەن الىسىپ جاتقان مەديتسينا قىزمەتكەرلەرىنىڭ ايتۋىنا قاراعاندا, سىرقاتتاردىڭ 70 پايىزعا جۋىعى اۋىر جاعدايدا تۇسەدى ەكەن. بۇل ارادا بالالاردىڭ جايى الاڭداتپاي قويمايدى. سونداي-اق جۇكتى ايەلدەردىڭ دەرتكە شالدىعۋى دا ازايماي وتىر. تەك سوڭعى اپتادا عانا ىندەت جۇقتىرعاندار سانى ەكى ەسە كوبەيىپتى. ورنى تولماس قايعى – ادام ءولىمى دە جيىلەگەن.
ناقتى كورىنىس وسىلاي بولا تۇرا, ادامداردىڭ ءبىراز بولىگى ۆاكتسيناعا ءالى دە كۇماندانا قارايتىنىن جاسىرۋعا بولماس. ونىڭ ۇستىنە كارانتين تالاپتارىن ساقتاي بەرمەيدى. ءباز-باياعىداي جۇزدەپ ادام جينالاتىن توي-تومالاق, اس, جانازا, قۇدالىق وتكىزىلىپ جاتىر.
– قازىر ۆاكتسينا وتە ماڭىزدى. ەلدى امان الىپ قالاتىن جالعىز قادام – وسى, – دەيدى وبلىستىق اۋرۋحانانىڭ باس دارىگەرى نۇرلان جاروۆ.
اۋرۋ كوبەيگەن سايىن جەدەل جاردەم دارىگەرلەرىنە تۇسەتىن سالماق تا اۋىرلاعان. ءباسپاسوز تۋرى بارىسىندا وبلىستىق جەدەل جاردەم ستانساسىنىڭ باس دارىگەرى الەكساندر ۆىسوتسكي ۇجىمىنىڭ قانشالىقتى قاجىرلى قىزمەت ەتىپ وتىرعانىن تاراتىپ ايتىپ بەردى. وتكەن جىلعى سايكەس مەرزىممەن سالىستىرعاندا, اۋرۋحانالارعا جاتقىزىلعاندار سانى 54 پايىزعا وسكەن. ونىڭ ىشىندە اسا اۋىر حالدەگى سىرقاتتاردىڭ سانى ەكى ەسە كوپ ەكەن. ماۋسىم ايىندا عانا كوۆيد جۇقتىردى دەگەن كۇدىكپەن
3 800 ادام اۋرۋحانالارعا جەتكىزىلىپتى. تاۋلىگىنە مىڭداعان شاقىرۋ تۇسەدى. وبلىس ورتالىعىنىڭ وزىندە عانا 400-گە جۋىق تۇرعىن جەدەل جاردەم قىزمەتىنە جۇگىنەدى.
قازىر 68 مەديتسينالىق جەدەل جاردەم بريگاداسى جانتالاسا جۇمىس ىستەپ جاتىر. وتكەن جىلى جۇكتەمەنىڭ كوبەيۋىنە بايلانىستى قوسىمشا رەانيموبيلدەر ساتىلىپ الىنىپتى. تالاپ تا وسكەن. جەدەل جاردەم كولىگىن تەكسەرۋگە, سىرقاتتاردى اۋرۋحاناعا جاتقىزۋعا, ودان كەيىن دەزينفەكتسيالاۋعا ءبىر ساعاتقا جۋىق ۋاقىت كەتەدى ەكەن. وپەراتورلاردىڭ ءوتىنىش بىلدىرگەن تۇرعىندارمەن سويلەسۋ ءتارتىبى دە وزگەرگەن. اۋرۋدىڭ بەلگىلەرى مەن ناۋقاستىڭ جاعدايى, ادامدار كوپ جينالعان ءىس-شارالارعا قاتىسقان-قاتىسپاعاندىعى, جول ساپارعا شىققان-شىقپاعاندىعىن انىقتاۋ ءۇشىن سۇراقتار قويادى.
ىندەت ءورشي باستاعاننان-اق ءار كۇن سايىن دەنساۋلىق ساقتاۋ باسقارماسى, جەرگىلىكتى اتقارۋشى ورگان وكىلدەرى رەسمي پاراقشالاردا بۇگىنگى ورىن الىپ وتىرعان جايدى اينا-قاتەسىز كورسەتەتىن, ءبىر قاراعاندا, بارىنشا قورقىنىشتى كورسەتكىشتەرمەن بولىسەدى. العاشقى بەتتە دۇرلىگىپ قالعانىمەن, قازىر ەتى ۇيرەنىپ كەتكەن كوپشىلىك ماسەلەگە جەتكىلىكتى ءمان بەرمەي وتىر.
اقمولا وبلىسى
