ورتالىق ساياباقتا ورناتىلعان شاحمات فيگۋراسىنىڭ بيىكتىگى - 3 م, سالماعى - 4 توننا. ساۋلەتتى ءمۇسىندى «شىمكەنت – قازاقستاننىڭ شاحمات استاناسى» اتانۋىنا وراي «Black Rock Business» جشس-ءى وكىلى باۋىرجان مىرزاتاەۆ شىمكەنت قالاسىنا سىي رەتىندە تارتۋ ەتتى.
سونداي-اق بۇگىن شىمكەنتتە شاحماتتان جاسوسپىرىمدەر اراسىندا قر چەمپيوناتى باستاۋ الدى.
سايىستىڭ اشىلۋ سالتاناتىنا قازاقستان شاحمات فەدەراتسياسىنىڭ ۆيتسە-پرەزيدەنتى الەكساندر بابەنكو, «Black Rock Business» جشس-ءى ديرەكتورىنىڭ ورىنباسارى باۋىرجان مىرزاتاەۆ, قازاقستان شاحمات فەدەراتسياسىنىڭ ديرەكتورىنىڭ ورىنباسارى انۋار يسماگامبەتوۆ جانە «Visit Shymkent» ورتالىعىنىڭ باسشىسى ءايدارالى رامانوۆ ارنايى قاتىستى.
سپورتتىق سايىستىڭ باستى ماقساتى – حالىقارالىق شاحمات ارەناسىندا قازاقستاننىڭ وڭ ءيميدجىن قالىپتاسىرا وتىرىپ, شىمكەنتتى زياتكەرلىك شاھارعا اينالدىرۋ.
«شىمكەنت – قازاقستاننىڭ شاحمات استاناسى» اتانۋ ساتىندە قالامىزدا ونى ايعاقتايتىن ارنايى ەسكەركىشتىڭ بولۋى ماڭىزدى. جەرگىلىكتى تۇرعىندار مەن شاحمات جانكۇيەرلەرى ءۇشىن ورتالىق ساياباق نەگىزگى ورىنعا اينالىپ ۇلگەرگەن. سوندىقتان شاحمات فيگۋراسىنا وسى ورىن تاڭدالىپ الىنعان.
شاحمات الەمدەگى كەڭ تارالعان ويىنداردىڭ ءبىرى سانالادى. شاحمات ادامنىڭ ەستە ساقتاۋ قابىلەتىن جاقسارتىپ, قيىن سۇراقتاردى شەشىپ, كۇردەلى يدەيالاردى ويلاپ تابۋعا سەپتىگى مول. شاحمات ويىنىنان شىمكەنت قالاسىندا دا جەڭىستى ءداستۇر بار. كوپتەگەن حالىقارالىق دودالاردا ءانۇرانىمىزدى شىرقاتا بىلگەن العاشقى گروسسمەيستەرلەر رينات جۇماباەۆ, گ ۇلىسحان ناحباەۆا جانە جانسايا ابدىمالىك, گۇلميرا داۋلەتوۆا شىمكەنت قالاسىنىڭ تۋماسى. سونداي-اق قازاقستاندا تۇڭعىش رەت شىمكەنت مەكتەپتەرىندە شاحمات ويىنى ەنگىزىلدى. وڭىرلەردە شاحماتتى كوپشىلىككە اينالدىرۋ – بۇكىل ەلدىڭ شاحماتشىلارىنىڭ شىعارماشىلىق بايلانىسىن نىعايتۋعا مۇمكىندىك بەرەدى.
شاحماتتان جاسوسپىرىمدەر اراسىنداعى قازاقستان چەمپيوناتىنىڭ شىمكەنتتە ۇيىمداستىرىلۋىنا باستاماشى بولعان - «Visit Shymkent» ورتالىعى.
ايتا كەتەيىك, ماۋسىم ايىندا «قازاقستان شاحمات فەدەراتسياسى» قوعامدىق بىرلەستىگى مەن «Visit Shymkent» ورتالىعى ارنايى ىنتىماقتاستىق مەموراندۋمىنا قول قويعان بولاتىن.
