كوروناۆيرۋس • 21 شىلدە، 2021

اسكەري مەديتسينا قىزمەتكەرلەرى اۋداندارعا جىبەرىلۋى مۇمكىن

34 رەت كورسەتىلدى

قازاقستاندا كوروناۆيرۋسپەن كۇرەسۋگە ازاماتتىق ۇيىمدارمەن قاتار ارميا دا اتسالىسادى. بۇل تۋرالى قر قورعانىس مينيسترلىگىنىڭ رەسمي سايتى حابارلادى، دەپ جازادى Egemen.kz

قازىرگى ۋاقىتتا قازاقستاننىڭ قارۋلى كۇشتەرىندە COVID-19-بەن كۇرەسۋ جانە ىندەتتىڭ جەكە قۇرام اراسىندا تارالماۋىن بولدىرماۋ ءۇشىن بارلىق جاعداي جاسالىپ جاتىر. اسكەري بولىمدەر مەن مەكەمەلەرگە قاجەتتى قورعانىس قۇرالدارى جانە مەديتسينالىق م ۇلىكتەر بەرىلىپ، ەپيدەمياعا قارسى جانە سانيتارلىق-پروفيلاكتيكالىق ءىس-شارالار وتكىزىلۋدە. ماماندار جەكە قۇرامنىڭ دەنساۋلىعىنا ۇنەمى مونيتورينگ جۇرگىزەدى.

جەكە قۇرامنىڭ 99%-ى كوروناۆيرۋسقا قارسى ۆاكتسينانىڭ ءبىرىنشى دوزاسىن، 92%-عا جۋىعى ەكىنشى دوزاسىن الدى.

سونىمەن بىرگە اسكەري دارىگەرلەر ازاماتتىق ۇيىمداردا قىزمەت اتقاراتىن ارىپتەستەرىنە كومەككە كەلۋگە ءازىر. اعىمداعى جىلدىڭ ءساۋىر ايىنان باستاپ الماتى مەن نۇر-سۇلتاندا اسكەري گوسپيتالدار ازىرلەندى. ەلورداداعى باس اسكەري كلينيكالىق گوسپيتالى شىلدە ايىنان باستاپ كوروناۆيرۋسپەن سىرقاتتانعانداردى ەمدەۋدى باستادى.

– الماتى، تالدىقورعان جانە ۇشارالداعى ءۇش اسكەري-ەمدەۋ مەكەمە ازاماتتاردى قابىلداۋعا ءازىر. جاعدايى اۋىر ناۋقاستار ءۇشىن جانساقتاۋ بولىمشەلەرى دايىن. ولار وكپەنى جاساندى جەلدەتۋ اپپاراتتارىمەن، پۋلسوكسيمەترلەرمەن، وتتەگى كونتسەنتراتورلارىمەن جانە باسقا دا جابدىقتارمەن جابدىقتالعان، – دەپ حابارلادى قر قك باس اسكەري-مەديتسينالىق باسقارماسى سانيتارلىق-ەپيدەميولوگيالىق قاداعالاۋ باسقارماسىنىڭ باستىعى پولكوۆنيك البەك ماناباەۆ.

سانيتارلىق-ەپيدەميولوگيالىق ورتالىقتىڭ ەكى فيليالى –  «استانا» مەن «باتىستا» مامانداردىڭ سانى ارتىپ، قۇرامىنا ەپيدەميولوگ، ۆيرۋسولوگ، باكتەريولوگ پەن زەرتحاناشىلار ەنگىزىلدى.

اياگوز، تالدىقورعان،  سارىوزەك جانە سەمەيدىڭ اسكەري گوسپيتالدارىندا قوسىمشا ءتورت ينفەكتسيالىق يزولياتور جۇمىس ىستەيدى.

نۇر-سۇلتان مەن الماتىدا ەكى ستاتسيونارلىق پتر-زەرتحانا، سونداي-اق اقتاۋ مەن سەمەيدە پتر-تەستىلەۋدى وتكىزۋ مۇمكىندىگى بار ءموبيلدى زەرتحانالىق كەشەن جۇمىس ىستەيدى.

شالعايدا ورنالاسقان اۋدانداردىڭ تۇرعىندارىنا كومەك رەتىندە دارىگەرلىك-مەيىرگەرلىك بريگادالار مەن قارۋلى كۇشتەردىڭ سانيتارلىق-ەپيدەميولوگيالىق قىزمەتىنىڭ ماماندارى قىسقا مەرزىمدە جىبەرىلۋى مۇمكىن.

سوڭعى جاڭالىقتار

اقسۋدا قارتتار ءۇيى ورتەندى

ايماقتار • بۇگىن، 09:57

ۇقساس جاڭالىقتار