وبلىستىق سايلاۋ كوميسسياسىنىڭ توراعاسى ەرقارا ايماعامبەتوۆتىڭ بارلىق ۇيىمداستىرۋ ماسەلەلەرى جەرگىلىكتى اكىمدىكتەرمەن بىرلەسىپ شەشىلگەنىن ايتتى.
سايلاۋشىلار ءتىزىمىن ناقتىلاۋ جالعاسۋدا. 22 شىلدەدەن باستاپ بيۋللەتەندەردى داۋىس بەرۋ ورىندارىنا جەتكىزۋ باستالادى.سايلاۋ سانيتارلىق-ەپيدەميولوگيالىق تالاپتاردى ساقتاي وتىرىپ وتەدى.
«باستى شارتتاردىڭ ءبىرى – سايلاۋ كوميسسيالارىنىڭ مۇشەلەرىن كۆي-گە قارسى ۆاكتسيناتسيالاۋ. بۇگىنگى كۇنى ۆاكتسيناتسيالاۋعا جاتاتىنداردىڭ 72%-ى تولىق ەگىلدى. قالعاندارى ۆاكتسينانىڭ ءبىرىنشى كومپونەنتىن الدى. سايلاۋ ۋچاسكەلەرىندە بولاتىن باقىلاۋشىلار مەن سەنىم بىلدىرۋشىلەر ءۇش كۇننەن كەشىكتىرمەي الىنعان پتر تەستىنىڭ تەرىس ناتيجەسىن ۇسىنۋى كەرەك», دەدى وبلىستىڭ باس سانيتارلىق دارىگەرى يۋري زالىگين.
سايلاۋ ۋچاسكەلەرىندە Ashyq جۇيەسىن پايدالانۋ مۇمكىندىگى قاراستىرىلۋدا. سونىمەن قاتار, بارلىق سايلاۋ ۋچاسكەلەرى انتيسەپتيكتەر, ءبىر رەت قولدانىلاتىن ماسكالار مەن قولعاپتار سياقتى جەكە قورعانىس قۇرالدارىمەن قامتاماسىز ەتىلەدى. ۋچاسكە كىرەبەرىسىندە دەنە قىزۋىن ولشەپ, الەۋمەتتىك قاشىقتىقتى ساقتاۋ مىندەتتى. تاۋەكەلدى ازايتۋ ءۇشىن داۋىس بەرۋ ستەندتەرى الدىڭعى پەردەلەرسىز بولادى.
قاراعاندى وبلىسىنىڭ اكىمى سانيتارلىق-ەپيدەميولوگيالىق تالاپتاردى تولىق قامتاماسىز ەتۋدى, ۋچاسكەلەردىڭ ماتەريالدىق-تەحنيكالىق جابدىقتالۋىن جانە مۇمكىندىگى شەكتەۋلى ادامدارعا جاعداي جاساۋدى قايتا تەكسەرۋدى تاپسىردى.
«اۋىل اكىمدەرىنىڭ العاشقى تىكەلەي سايلاۋىنا بىرنەشە كۇن قالدى. ءبىزدىڭ ورتاق جۇمىسىمىز – ولاردىڭ اشىقتىعىن, ايقىندىعى مەن زاڭدىلىعىن قامتاماسىز ەتۋ. ءار داۋىس ماڭىزدى. اۋىل تۇرعىندارى كەلىپ, ءوز تاڭداۋىن جاساپ, وزدەرىنىڭ كونستيتۋتسيالىق سايلاۋ قۇقىعىن ىسكە اسىرا الۋى قاجەت», دەپ اتاپ ءوتتى وبلىس اكىمى.
