استراحان وبلىسى گۋبەرناتورىنىڭ ءباسپاسوز قىزمەتىنىڭ مالىمەتىنە سۇيەنسەك, رەسەي جەرىن 15 جىلعا جۋىق مەكەندەگەن كۇي اناسىنىڭ 160 جىلدىق مەرەيتويى دۇبىرلەتىپ اتاپ وتىلمەك. سول سەبەپتەن ارنايى ءىس-شارالار جوسپارى جاساقتالىپتى. سونىڭ ءبىرى – دينا نۇرپەيىسوۆانىڭ ءومىرى مەن ونەرى جايلى جاڭا كىتاپتىڭ تانىستىرىلىمى.
– ۇلى كۇيشىنىڭ مۇراسىن ناسيحاتتاعان بىرەگەي شاكىرتى 1922-1937 جىلدارى استراحان وبلىسىنىڭ بىرنەشە ەلدى مەكەنىندە تۇرعان. ونىڭ ىشىندە قازىرگى ۆولودار اۋدانىنىڭ كوزلوۆ اۋىلى دا بار. دينا اجەمىز 1934 جىلى مارفين اۋىلىندا وتكەن كوركەمونەرپازدار بايقاۋىندا ءبىرىنشى جۇلدەنى يەلەنگەن. ونى ايعاقتايتىن قۇرمەت گراموتاسى ساقتالعان, – دەيدى ولكەتانۋشى اسىلبەك سيتاليەۆ.
ونىڭ ايتۋىنشا, استراحان وبلىستىق مەملەكەتتىك ارحيۆىنەن دينا نۇرپەيىسوۆانىڭ وتباسى مۇشەلەرىنىڭ, ءتىپتى سيىر مەن قويدىڭ ءتىزىمى كورسەتىلگەن قۇجات تابىلىپتى. بۇل – مارفين اۋدانىنداعى كوزلوۆ اۋىلدىق كەڭەسىنىڭ ارحيۆتىك انىقتاماسى. سونداي-اق استراحاندىقتار شىعارعان «ەستەلىك كىتابىندا» ۇلى حاجەن مەن نەمەرەسى قوجاحمەتتىڭ 1941 جىلى ەكىنشى دۇنيەجۇزىلىك سوعىستا حابارسىز كەتكەنى, ال جاۋىنگەرلىك وردەندەر مەن مەدالدارعا يە بولعان ۇلكەن ۇلى جۇرىنبايدىڭ 1946 جىلى ومىردەن وتكەنى تۋرالى جازىلعان.
اتىراۋ وبلىسى
