پاندەميا باستالعالى بەرى وبلىستا 27 819 ادام كوروناۆيرۋسقا شالدىققان بولسا, بيىلعى شىلدە ايىنىڭ باسىنان بەرى COVID-19-دى 2 836 باتىسقازاقستاندىق جۇقتىرعانى انىقتالدى. بىلتىردان بەرى وسى دەرتتەن 458 ادام كوز جۇمدى. اسىرەسە سوڭعى اپتادا وتكەن اپتامەن سالىستىرعاندا اۋرۋشاڭدىق دەڭگەيى 13%-عا وسكەنى بايقالعان. اۋىرعاندار ورال قالاسىندا, بايتەرەك, ءبورلى اۋدانىندا كوپ.
كارانتيندىك تالاپتارعا بايلانىستى رەسەيمەن اراداعى مەملەكەتتىك شەكارادان وتۋشىلەر قاتاڭ باقىلاۋعا الىنعان. 1 شىلدەدەن باستاپ وبلىس اۋماعىنداعى شەكارا بەكەتتەرىنەن بارلىعى 19 375 ادام وتسە, سونىڭ ىشىندە 2 جولاۋشىدان, 8 جۇرگىزۋشىدەن كوروناۆيرۋس انىقتالىپ, وقشاۋلانعان. اي باسىنان بەرى وڭىردە 34 503 مارتە پتر زەرتتەۋى جاسالىپتى.
سوڭعى اپتا ىشىندە مونيتورينگ توپتارى ەلدى مەكەندەردە 285 رەيد جۇرگىزىپ, 1 166 نىساندى تەكسەرگەن. سونىڭ 24-ىندە كارانتين ءتارتىبى بۇزىلعانى انىقتالىپ, 29 حاتتاما بويىنشا كىنالىلەرگە 2 771 150 تەڭگە ايىپپۇل سالىنعان.
قازىر وڭىردە بارلىعى 602 نىسان Ashyq قوسىمشاسى بويىنشا قىزمەت كورسەتەدى. سوڭعى اپتادا «قىزىل» مارتەبەسى بار – 5, «سارى» مارتەبەسى بار 8 ادام انىقتالىپ, جەكە تۇلعالارعا 306 285 تەڭگە كولەمىندە ايىپپۇل سالىنعان.
ەلدەگى جانە وڭىردەگى كۇردەلى ەپيدەميالىق احۋالدى كورىپ وتىرعان تۇرعىندار الدىن الا ەكپە الۋدىڭ پايداسىن تۇسىنە باستاعان سىڭايلى. ۆاكتسينالاۋ وبلىستا 1 اقپاندا باستالعان, قازىر وڭىردە 66 ەكپە بەكەتى جۇمىس ىستەپ تۇر. وبلىسقا ۆاكتسينانىڭ 320 050 دوزاسى كەلىپ تۇسكەن, ونىڭ باسىم بولىگى رەسەيلىك سپۋتنيك V بولسا, 7 مىڭ دوزا QazVaس, 50 مىڭ دوزا Hayat Vax جانە قىتايدا وندىرىلگەن 16 مىڭ دوزا CoronaVac ۆاكتسيناسى بار.
«جالپى, وبلىس كولەمىندە ۆاكتسينانىڭ ءبىرىنشى كومپونەنتىمەن 147 610 ادام ەگىلدى. ەكپەنىڭ قوس كومپونەنتىن العان باتىسقازاقستاندىقتاردىڭ سانى – 80 970 ادام. ماۋسىم ايى باستالعالى حالىقتىڭ ۆاكتسينا الۋ ىنتاسى ارتتى. تۇرعىندارعا ىڭعايلى بولۋ ءۇشىن ەمحانالارداعى ەگۋ پۋنكتتەرى ساعات 23.00-گە دەيىن جۇمىس ىستەپ تۇر. ايتا كەتەيىك, 12 شىلدە كۇنى وبلىس اۋماعىندا 5 179 ادام ەكپە الدى, بۇل ازىرگە رەكوردتىق كورسەتكىش», دەيدى باتىس قازاقستان وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ارمان قاليبەكوۆ.
باتىس قازاقستان وبلىسى
