سوڭعى مالىمەتتى سارالاساق, شىلدە ايىنىڭ باسىنان بەرى وڭىردە 1 920 ىندەتكە شالدىعۋ وقيعاسى تىركەلگەن. ماۋسىم ايىنداعى كورسەتكىشپەن سالىستىرعاندا ايتارلىقتاي كوپ. ماسەلەن, ماۋسىمدا وڭىردە 1 449 وقيعا ورىن العان بولاتىن. سوڭعى ۋاقىتتا كارانتين تالاپتارى بارىنشا قاتايتىلعانىمەن, ىندەتتىڭ ازايماي تۇرعانىن اڭعارۋعا بولادى. ونىڭ ەڭ باستى سەبەبى, حالىقتىڭ ءوز دەنساۋلىعىن وزدەرى ويلاپ, ساقتىق شارالارىن ساقتامايتىنىندا دەپ ايتۋىمىزعا تولىق بولادى. العاشقى بەتتە ءبىرشاما ايىلىن جيعانىمەن, سوڭعى ايلاردا كوپشىلىك جينالاتىن ارقيلى شارالار وتكىزۋ جيىلەپ كەتتى. ارا-تۇرا ۇستالىپ, ايىپپۇل تولەگەنىمەن, ات باسىن ىركەتىن ءتۇرى كورىنبەيدى. ۇلتىمىزدىڭ دارقاندىعى دا, بۇرىنعى سالت-ءداستۇرىن تولىق ساقتاي الماسا ۇيات سانايتىنى دا كەسىرىن تيگىزىپ تۇر.
شىلدە ايىنىڭ باسىنان بەرى كوكشەتاۋ قالاسىندا – 526, بۋراباي اۋدانىندا – 221, بۇلاندىدا – 153, تسەلينوگرادتا – 95 ادامنىڭ ىندەت جۇقتىرعانى زەرتحانادا تەكسەرىلىپ, راستالعان. كەيىنگى ءبىر تاۋلىكتە 175 ادام ىندەت جۇقتىرعان, ولاردىڭ 159-ىندا ىندەت بەلگىلەرى انىق بايقالعان. سوڭعى اپتادا ىندەت جۇقتىرۋ دەڭگەيى 2,9 ەسەگە دەيىن كوبەيدى.
بۇگىندە ىندەتكە شالدىعۋشىلارعا ازىرلەنگەن توسەكتىك ورىنداردىڭ 49 پايىزى پايدالانىلۋدا. جانساقتاۋ بولىمىندە 82 ناۋقاس جاتسا, ولاردىڭ بەسەۋىنىڭ جاعدايى اسا اۋىر. وسى جولى ىندەتكە شالدىعۋشىلار اراسىندا جۇكتى ايەلدەردىڭ سانى كوبەيگەن. 76 جۇكتى ايەل كوروناۆيرۋس جۇقتىرسا, ولاردىڭ 42-ءسى وبلىس ستاتسيونارلارىندا ەم قابىلداۋدا.
– بۇگىندە ەمحانالارعا بارىپ, دەنساۋلىعىنا شاعىمدانۋشىلار سانى كوبەيە ءتۇستى. بۇرىن 60 جاستان اسقاندار كوبىرەك اۋىرسا, قازىر ىندەتكە جاستار كوپتەپ شالدىعۋدا. شىلدەنىڭ ورتاسىنا دەيىن اۋىرعانداردىڭ 12 پايىزى – بالالار, ونىڭ ىشىندە 1 جاسقا دەيىنگىلەر – 2,1 پايىز, 2-6 جاس ارالىعىنداعىلار – 2,9 پايىز, 7-14 جاس شاماسىنداعىلار – 4,8 پايىز, 15-17 جاستاعىلار – 2,1 پايىز. وتكەن جىلعى 6 ايلىق ستاتيستيكاعا ۇڭىلسەك, جارتى جىلدا 1 246 جاعداي زەرتحانالىق جولمەن انىقتالىپ, ولاردىڭ 143-ءى بالالار بولعانىن انىقتاۋعا بولادى. بيىل 16 577 ىندەت جۇقتىرۋشى ايقىندالسا, ونىڭ 1 818-ءى – 14 جاسقا دەيىنگى بالالار. سالىستىرىپ قاراساڭىزدار, جاعداي وتە اۋىر, – دەيدى وبلىستىڭ باس سانيتارلىق دارىگەرى ايناگۇل مۋسينا.
ۆاكتسينالاۋ وبلىستا اقپان ايىنان باستاپ كەزەڭ-كەزەڭمەن جۇرگىزىلىپ كەلەدى. بۇگىندە وبلىس تۇرعىندارى ءوز ەرىكتەرى بويىنشا 4 ءتۇرلى ەكپەنىڭ ىشىنەن قالاعانىن سالدىرا الادى. ۆاكتسينالاردىڭ العاشقى كومپونەنتىمەن وبلىستا 190 867 ادام قامتىلسا, ەكىنشى بولىگىن 97 370-ءى عانا الىپ ۇلگەرگەن. جالپى, وبلىس تۇرعىندارىنىڭ 46,4 پايىزىنىڭ ۆاكتسينا قابىلداۋعا مۇمكىندىگى بار ەكەن. كوروناۆيرۋسقا قارسى ەكپە الۋدىڭ ناتيجەسىندە مەديتسينا جانە پوليتسيا قىزمەتكەرلەرى اراسىندا ىندەتكە شالدىعۋ 6 ەسە تومەندەگەن. بۇگىندە وبلىستا مەديتسينا قىزمەتكەرلەرىنىڭ – 93, پەداگوگتەردىڭ – 69, پوليتسەيلەردىڭ 100 پايىزى ەكپە سالدىرعان. مامانداردىڭ ايتۋىنا قاراعاندا, وبلىس تۇرعىندارىنىڭ 60 پايىزى ەكپە ەكتىرگەندە ۇجىمدىق يممۋنيتەت قالىپتاسپاق.
اقمولا وبلىسى
