Nur Otan پارتياسىنان اۋىلدىق وكرۋگ اكىمىنە كانديداتتىققا تىركەلگەن نۇربولات جالعاس 2013 جىلدان بەرى مۇعالجار اۋدانى قايىڭدى اۋىلدىق وكرۋگىندە باس مامان بولىپ جۇمىس ىستەيدى. جاسى 30-دا. ۋنيۆەرسيتەتتى تۋريزم ماماندىعىمەن بىتىرگەن بويى تۋعان جەرىندە ەڭبەك ەتىپ كەلەدى. وتباسىلى, ەكى بالاسى بار.
ول ەلمەن ەتەنە ارالاسىپ جۇرگەندىكتەن دە اۋىل تۇرعىندارىنىڭ تۇرمىستاعى قيىندىقتارىن جاقسى بىلەتىنىن, سول ءۇشىن سايلاۋالدى باعدارلاماسىنا التىندىداعى امبۋلاتورياعا كۇردەلى جوندەۋ جۇرگىزىپ, مەكتەپ قۇرىلىسىن اياقتاۋدى, التىندى مەن قايىڭدى ەلدى مەكەندەرىندەگى ەلەكتر جەلىلەرىن الماستىرىپ, «ەمبى – التىندى» اۆتوكولىك جولىنا ورتاشا جوندەۋ جۇرگىزۋدى ەنگىزگەن. مۇعالجار اۋدانىنىڭ قايىڭدى اۋىلى وبلىس ورتالىعىنان 270 شاقىرىمدا ورنالاسقان. وكرۋگكە التىندى جانە قايىڭدى اۋىلدارى كىرەدى.
قايىڭدى اۋىلىنىڭ تۇرعىندارى ءماجىلىس دەپۋتاتى ءزۇلفيا سۇلەيمەنوۆاعا ۇزىندىعى 56 شاقىرىم بولاتىن «التىندى – ەمبى» تاسجولىن جوندەۋگە ىقپال ەتۋىن سۇرادى. تۇرعىنداردىڭ ايتۋىنشا, اۋىلىشىلىك جولدى ابدەن توزدىرعان – AltynEx Company جشس-ءنىڭ اۋىر جۇك كولىكتەرى. جاز بويى جولدا كوتەرىلگەن شاڭ كولىك جۇرگىزۋشىلەرىنە جولدى كورۋدى قيىنداتىپ, تەرەڭ وي-شۇقىرلارى جەڭىل كولىكتىڭ قوزعالىسىنا ابدەن قيىندىق كەلتىرگەن.
ءزۇلفيا سۇلەيمەنوۆا قايىڭدى اۋىلى تۇرعىندارىنىڭ تالابىن التىندىدا AltynEx Company جشس مەكەمەسى عيماراتىندا وتكەن كەزدەسۋدە كومپانيا باسشىلىعىنا جەتكىزدى. ءماجىلىس دەپۋتاتى اۋىلىشىلىك قاتىناس جولىن رەتكە كەلتىرىپ, ورتاشا جوندەۋ جۇمىستارىن جۇرگىزۋدى كومپانيا باسشىلىعىنا تاپسىرىپ, وسى ماسەلەنى ۇنەمى قاداعالاپ وتىراتىنىن جەتكىزدى.
ايتا كەتۋ كەرەك, 14 شىلدەدەن باستاپ اۋداندىق ماڭىزى بار قالالاردىڭ, اۋىلدار مەن كەنتتەردىڭ جانە اۋىلدىق وكرۋگ اكىمدەرىن سايلاۋدىڭ ۇگىت-ناسيحات ناۋقانى باستالدى. اقتوبە وبلىسىندا اۋىلدىق وكرۋگتەر اكىمدىگىنە 107 كانديدات تىركەلسە, ونىڭ 17-ءسى – ايەلدەر. 65 كانديدات التى ساياسي پارتيادان, 42 ادام ءوزىن ءوزى ۇسىنۋ جولىمەن تىركەلدى. پارتيالىق ءتىزىم بويىنشا Nur Otan پارتياسىنان – 28, «اۋىل» پارتياسىنان – 16, «اق جول» پارتياسىنان – 9, اDAL پارتياسىنان – 5, قازاقستان حالىق پارتياسىنان – 5, جالپىۇلتتىق سوتسيال-دەموكراتيالىق پارتياسىنان – 2 كانديدات اكىم بولۋعا ۇمىتكەر.
وبلىستىق سايلاۋ كوميسسياسىنىڭ مالىمەتىنە قاراعاندا, سايلاۋ الدىندا ءبىر وكرۋگكە ورتاشا باسەكەلەستىك 3 ادامنان كەلەدى. كانديداتتاردىڭ ەڭ جاسى 27-دە, ەڭ ۇلكەنى – 62 جاستا.
اقتوبە وبلىسى
