قازاقستان • 19 شىلدە، 2021

الەۋمەتتىك جەلىلەردە جالعان قۇجات جاسايتىن 46 جارناما انىقتالدى

122 رەت كورسەتىلدى

عالامتورداعى الەۋمەتتىك جەلىلەردە جالعان انىقتامالار، كۋالىكتەر مەن باسقا دا قۇجاتتاردى جاساۋ تۋرالى 46 جارناما انىقتالعان. بۇل تۋرالى ىشكى ىستەر مينيسترلىگىنىڭ بريفينگىندە ايتىلدى، دەپ حابارلايدى Egemen.kz.

«پوليتسيانىڭ بارلىق بولىمىندە ارنايى مونيتورينگتىك توپتار قۇرىلدى، ولار ينتەرنەت جەلىسىندە، الەۋمەتتىك جەلىلەردە جانە مەسسەندجەرلەردە، جەرگىلىكتى پابليكتەر مەن جارنامالىق سايتتاردا ورنالاستىرىلاتىن جالعان قۇجاتتاردى ساتۋ جونىندەگى حابارلاندىرۋلاردى انىقتاپ، پىسىقتايدى. پوليتسيا وسىنداي مازمۇندى 46 جارنامانى انىقتادى، وندا جالعان ۆاكتسيناتسيا تولقۇجاتتارى، سونداي-اق وڭ نەمەسە تەرىس تەست ناتيجەلەرى بار تالداۋ نىساندارى بەلگىلى اقشاعا ۇسىنىلعان»، دەدى بريفينگ مودەراتورى شۇعىلا تۇرلىبەك.

ونىڭ ايتۋىنشا، بۇل رەسۋرستاردا رەسەيدە، ۋكراينادا، ءۇندىستاندا جانە اقش-تا مەديتسينالىق انىقتامالار مەن ۆاكتسيناتسيا سەرتيفيكاتتارىن ساتۋ تۋرالى حابارلاندىرۋلار تاراتىلعان.

«انىقتالعان حابارلاندىرۋلاردا ءىىم كيبەرقىلمىسپەن كۇرەس ورتالىعىنىڭ ماماندارى الدىن الا تولەم الۋعا باعىتتالعان الاياقتىق سحەمالارىن قاداعالايدى. ۆاكتسيناتسيالاۋدىڭ 1-ءشى كەزەڭىنەن وتكەندىگى تۋرالى راستاۋ ءۇشىن الاياقتار مەملەكەتتىك ورگانداردىڭ رەسمي رەسۋرستارىنا جاتپايتىن بوگدە پوشتا جاشىكتەرىنەن حابارلاما جىبەرەدى. سودان كەيىن ولار 2 كەزەڭ ءۇشىن الدىن الا تولەمدى تالاپ ەتىپ، قۇجات قۇنىن الىپ العان سوڭ جوعالادى. بىرقاتار جاريالانىمدى تالداۋ الاياقتاردىڭ شەتەلدىك بانكتەردىڭ كارتالارىن قولدانعانىن انىقتادى، ال ساتۋشىلار ۇنەمى وزگەرىپ تۇراتىن ۆيرتۋالدى تەلەفون نومىرلەرىن ءجيى قولدانادى. الدانعان ادامدار قۇقىق قورعاۋ ورگاندارىنا جۇگىنبەيدى، ويتكەنى ولار جالعان قۇجاتتاردى ساتىپ الۋ ارقىلى زاڭدى بۇزۋعا تىرىستى»، دەپ ءتۇسىندىردى شۇعىلا تۇرلىبەك.

انىقتالعان شەتەلدىك رەسۋرستار قازاقستاندىق پايدالانۋشىلاردىڭ قولجەتىمدىلىگىن بۇعاتتاۋ ءۇشىن ۋاكىلەتتى ورگانعا جىبەرىلگەن.

سوڭعى جاڭالىقتار

الماتىدا تروللەيبۋس ورتەندى

وقيعا • 24 ماۋسىم، 2022

تۇركپا-نىڭ اتاۋى وزگەرەدى

پارلامەنت • 24 ماۋسىم، 2022

ۇقساس جاڭالىقتار