وبلىستىق ەكولوگيا دەپارتامەنتى ءباسپاسوز قىزمەتىنەن ءمالىم ەتكەندەي, «قازاقستان عارىش ساپارى ۇق» اق-نىڭ تۇسىرىلىمدەرى ناتيجەسىندە اتىراۋ وبلىسىندا 130 قوقىس ءۇيىندىسى انىقتالىپ وتىر. ونىڭ 128-ءى اتىراۋ قالاسىندا بولسا, ەكەۋى ماحامبەت اۋدانىنىڭ اۋماعىندا ورنالاسقان.
«عارىشتىق مونيتورينگ ناتيجەلەرىمەن انىقتالعان قوقىس قالدىقتارىنىڭ ورنىن جويۋ ءۇشىن ارنايى كەستە جاساقتالدى. اتالعان كەستەگە سايكەس ستيحيالىق قوقىس ۇيىندىلەرىن جويۋعا 1 اي مەرزىم بەلگىلەندى», دەپ حابارلادى دەپارتامەنتتىڭ ءباسپاسوز قىزمەتى.
دەپارتامەنت ماماندارى قالالىق اكىمدىك, پوليتسيا وكىلدەرىمەن بىرگە تۇرمىستىق قالدىقتاردى تاستاعان تۇلعالاردى انىقتاۋ ماقساتىندا رەيدتىك ءىس-شارا ۇيىمداستىردى. ءىس-شارا كەزىندە اتىراۋ قالاسىنىڭ جۇمىسكەر شاعىن اۋدانىندا انىقتالعان ستيحيالىق قوقىس ورىندارىنا باقىلاۋ جۇرگىزىلىپ, سول اۋماقتىڭ تۇرعىندارىمەن كەزدەسۋ وتكىزدى.
