سونىمەن قاتار ەكى ەلدىڭ مادەنيەت سالاسىنا جاۋاپتى ءمينيستردىڭ جۇزدەسۋىنە قازاقستاننىڭ بەلارۋس رەسپۋبليكاسىنداعى توتەنشە جانە وكىلەتتى ەلشىسى, تمد جارعىلىق ورگاندارى جانىنداعى تۇراقتى وكىل قىزمەتىن قوسا اتقارۋشى اسقار بەيسەنباەۆ پەن «قازاقكونتسەرت» مەملەكەتتىك كونتسەرت ۇيىمىنىڭ ديرەكتورى جەڭىس سەيدۋللا ۇلى قاتىستى. اقتوتى رايىمقۇلوۆا بۇگىندە ەكى ەل اراسىنداعى تاتۋ كورشىلىك قارىم-قاتىناس تۇراقتى دامىپ, مادەني-گۋمانيتارلىق بايلانىس ەكى حالىق اراسىن بايلانىستىرۋشى كوپىرگە اينالىپ كەلە جاتقانىن اتاپ ءوتتى.
«ىنتىماقتاستىق اياسىندا بىرقاتار اۋقىمدى مادەني جوبا جۇزەگە اسىپ جاتىر. ماسەلەن, ەلىمىزدىڭ وكىلدەرى «بەلارۋس كىتاپتارى» حالىقارالىق جارمەڭكەسىنە, «ۆيتەبسكىدەگى سلاۆيان بازارى» حالىقارالىق ونەر فەستيۆالىنە, ء«لىستاپاد» حالىقارالىق كينوفەستيۆالى سىندى مامانداندىرىلعان مادەني ءىس-شارالارعا تۇراقتى تۇردە قاتىسادى. بەلارۋس حالقىنىڭ مادەني مۇراسىن ەلىمىزدە تانىتۋ شەڭبەرىندە بەلارۋس پەن قازاقستاننىڭ مەملەكەتتىك مۇراعاتتارى مەن مۇراجايلارى اراسىندا ارىپتەستىك ورناتىلدى. سونىمەن قاتار ادەبيەت پەن ونەر, كينەماتوگرافيا قايراتكەرلەرى اراسىندا سەرىكتەستىك جاندانىپ كەلەدى.
وسى ورايدا بيىل 17 مامىر مەن 24 ماۋسىم ارالىعىندا بەلارۋس رەسپۋبليكاسىندا رەجيسسەر بەكبولات شەكەروۆتىڭ «1941 جىلدىڭ جازى» اتتى كوركەم ءفيلمنىڭ ءتۇسىرىلىمى وتكەنىن اتاپ وتكىم كەلەدى. بۇل ۇلى جەڭىستىڭ 75 جىلدىعىنا جانە ەكىنشى دۇنيەجۇزىلىك سوعىسقا قاتىسۋشى, عالىم, جازۋشى جانە قوعام قايراتكەرى ءادي ءشارىپوۆتىڭ جاۋىنگەرلىك جولى جايلى تاريحي تۋىندى.
جىل سايىن ۆيتەبسكىدە وتەتىن «سلاۆيان بازارى» حالىقارالىق ونەر فەستيۆالى تمد كولەمىندە عانا ەمەس, قۇرلىق ارالىق دەڭگەيدە تانىلعان جوباعا اينالىپ ۇلگەردى. ءبىزدىڭ ونەرپازدار ۇزاق جىلدان بەرى «سلاۆيان بازارىنا» تۇراقتى قاتىسىپ, جۇلدەگەرلەر قاتارىنان كورىنىپ ءجۇر. وسى رەتتە تانىمال ءانشى ديماش قۇدايبەرگەن ونەر جولىندا وسى فەستيۆالگە قاتىسىپ, ونەر كورسەتكەنىن ايتا الامىز. ال بيىل قازاقستان اتىنان ەسترادا ورىنداۋشىلارى بايقاۋىندا قازاق ۇلتتىق ونەر ۋنيۆەرسيتەتىنىڭ 3-كۋرس ستۋدەنتى رۋحيا بايدۇكەنوۆا باق سىنايدى. ال ءحىح حالىقارالىق بالالار مۋزىكالىق بايقاۋىنا «بوزتورعاي-2019» حالىقارالىق بالالار شىعارماشىلىعى بايقاۋىنىڭ جەڭىمپازى 10 جاستاعى امينا اسگاتوۆا قاتىسادى. ءسوز اراسىندا ايتقان ديماش قۇدايبەرگەن بيىل حالىقارالىق بايقاۋدىڭ قازىلار القاسىنىڭ مۇشەسى», دەدى مينيستر.
وسىدان كەيىن قازاقستان رەسپۋبليكاسىنىڭ مادەنيەت جانە سپورت ءمينيسترى ەكى مەملەكەتتىڭ مادەنيەت كۇندەرىن وتكىزۋ مادەني-گۋمانيتارلىق سالاداعى ىنتىماقتاستىقتى نىعايتۋدا ماڭىزدى قادام ەكەنىن جەتكىزدى.
«2018 جىلى بەلارۋس رەسپۋبليكاسىندا قازاقستاننىڭ مادەنيەت كۇندەرى ۇيىمداستىرىلدى. بيىل 30 قىركۇيەكتەن باستاپ 3 قازانعا دەيىن ەلىمىزدە بەلارۋس رەسپۋبليكاسىنىڭ مادەنيەت كۇندەرىن وتكىزۋدى جوسپارلاپ وتىرمىز. مادەنيەت كۇندەرى اياسىندا بەلارۋس رەسپۋبليكاسىنىڭ ۇزدىك شىعارماشىلىق ۇجىمدارى ونەر كورسەتەدى. وسى مادەنيەت كۇندەرى اياسىندا بەلارۋس كينوسىنىڭ كۇندەرىن وتكىزۋ جوسپاردا بار», دەدى.
سونداي-اق اقتوتى رايىمقۇلوۆا قازاقستان مەن بەلارۋس مەملەكەتىنىڭ شىعارماشىلىق ۇيىمدارى اراسىندا تۇراقتى تۇردە تاجىريبە الماسۋ جۇزەگە اسىپ جاتقانى قۋانتاتىنىن ايتتى.
ء«بىزدىڭ «قازاقكونتسەرت» مەملەكەتتىك كونتسەرت ۇيىمى بەلارۋس مەملەكەتتىك فيلارمونياسىمەن مەموراندۋمعا قول قويۋ ماسەلەسىن تالقىلاۋعا دايىن. ءوز كەزەگىندە بەلارۋس رەسپۋبليكاسىنىڭ جەكە ورىنداۋشىلارى مەن شىعارماشىلىق ۇجىمدارىن 2022 جىلى وتەتىن «وپەراليا» حالىقارالىق فەستيۆالى, بيبىگۇل تولەگەنوۆانىڭ حالىقارالىق ۆوكاليستەر بايقاۋى (2023 جىلى), مۋزىكا اسپاپتارىندا ورىنداۋشىلاردىڭ حالىقارالىق تەلەۆيزيالىق بالالار بايقاۋى (بيىل قازان ايىنىڭ سوڭى – قاراشا ايىنىڭ باسى) سىندى ءىس-شارالارعا قاتىسۋعا شاقىرامىز. سونىمەن قاتار ەكىجاقتى قارىم-قاتىناستى ودان ءارى دامىتۋ ماقساتىندا ونەر ۇجىمدارىنىڭ گاسترولىن وتكىزۋدى ۇسىنامىز», دەي كەلە, ەكى تاراپتىڭ وسى ءىس-شارالارعا قاتىسۋى ءوزارا ءىس-قيمىلعا جاڭا سەرپىن بەرەتىنىنە, مادەنيەت پەن ونەر سالاسىندا بايلانىس ورناتۋعا جانە تاجىريبە الماسۋعا ىقپال ەتەتىنىنە سەنىمدى ەكەنىن ايتتى.
ءوز كەزەگىندە اناتولي ماركەۆيچ ەكى مەملەكەت اراسىنداعى مادەني-گۋمانيتارلىق بايلانىستى بەلارۋس تارابى جانداندىرۋعا نيەتتى ەكەنىن ايتتى.
«ەكى ەلدىڭ ونەر, ادەبيەت, سپورت جانە وزگە سالاداعى قايراتكەرلەرىنىڭ بايلانىسى ۇزاق جىلدان بەرى جالعاسىپ كەلەدى. سىزدەردىڭ وسى كەزدەسۋ بارىسىندا ايتقان ۇسىنىستارىڭىزدى قاراستىرىپ, پاندەمياعا قاراماستان ارىپتەستىكتىڭ ءورىسىن كەڭەيتۋگە دايىن ەكەنىمىزدى جەتكىزەمىن», دەپ ايتتى بەلارۋس رەسپۋبليكاسىنىڭ مادەنيەت ءمينيسترى.
