وليمپيادا قالاشىعى ءبىر جىل بۇرىن سالىنعان, بىراق ءالى كۇنگە دەيىن بوس تۇر. ويىندار اياقتالعاننان كەيىن اۋىل توكيوداعى كادىمگى تۇرعىن اۋدانىنا اينالادى. ونىڭ بارلىق ۇيىندە 3880 بولمە بار. ءار بولمەدە ەكى-سەگىز سپورتشى تۇرا الادى.
«COVID-19 پاندەمياسىنا بايلانىستى قاتاڭ تالاپتار مەن ەرەجەلەردى قوسپاعاندا, جاپوندىق وليمپيادا قالاشىعى بۇرىنعى وليمپيادا ويىندارىنداعى سياقتى. مۇندا وتە جاقسى جاعداي جاسالعان. تاماقتانۋ پۋنكتى, دەمالىس ورنى, فيتنەس ورتالىعى جانە ەمحانا بار. سونداي-اق سپورت نىساندارىندا سپورتشىلاردىڭ جاتتىعۋ كەستەسى جاسالدى.
قازىرگى ۋاقىتتا بارلىق 95 سپورتشى مەن دەلەگاتسيانىڭ باسقا مۇشەلەرى تىركەلگەن. ولار وليمپيادا قالاشىعىنا ورنالسۋعا جانە وليمپيادا ويىندارىنا قاتىسۋعا قۇقىلى. ءبىز ولاردى اسىعا كۇتەمىز», دەدى توكيودان قر ۇوك سپورت ديرەكتسياسىنىڭ ديرەكتورى ەلسيار قاناعاتوۆ.
جاپوندىقتار ەكولوگيالىق ماسەلەلەرگە ەرەكشە نازار اۋدارعان. وليمپيادا قالاشىعىنداعى زاتتاردىڭ كوپشىلىگى قايتا وڭدەلگەن ماتەريالداردان جاسالعان نەمەسە ولاردى قايتا وڭدەۋگە بولادى. مىسالى, كەرەۋەتتەر كارتوننان جانە ماتراتستار پلاستيكتەن جاسالعان.
سپورتشىلار Toyota كومپانياسى قۇراستىرعان e-Palette اۆتونومدى كولىكتەرىمەن تاسىمالدانادى. ول قالاشىق, جاتتىعۋ جانە جارىس الاڭدارى اراسىندا ءار 20 مينۋت سايىن ءجۇرۋى كەرەك. بۇل سپورتشىلاردىڭ قاۋىپسىزدىگى ءۇشىن جاسالعان. باسقا ەل سپورتشىلارىمەن مينيمالدى بايلانىس قانا بولسا, توكيو تۇرعىندارىمەن مۇلدەم بايلانىس بولمايدى.
باستاپقىدا اسحانا 4300 ادامدى قابىلدايدى دەپ بولجانعان, بىراق كەيىن كوروناۆيرۋس سالدارىنان 3000-عا دەيىن ازايدى. جەلدەتۋ جۇيەسى زالداعى اۋانى ءار 15-20 مينۋت سايىن تولىعىمەن تازارتادى.
كۇن سايىن مازىردە سپورتتىق تاماقتانۋ نورمالارىنا سايكەس كەلەتىن جاپون تاعامدارى مەن ونىمدەرى بولادى.
سپورتشىلار ترەناجەرلار اراسىندا ءمولدىر قالقالار ورناتىلعان فيتنەس ورتالىعىن قولدانا الادى.
وليمپيادا قالاشىعىنىڭ ءوز كلينيكاسى دا بار. وندا سپورتشىلار ۇنەمى پتر تەست وتكىزىپ وتىرادى.
وڭ ناتيجە كورسەتكەن سپورتشىلاردى كارانتيندىك قوناق ۇيگە اۋىستىرادى. ەمدەۋدى قاجەت ەتسە, اۋرۋحاناعا جاتقىزادى. ءار سپورتشى كۇندەلىكتى تەست تاپسىرۋى قاجەت. دەمەك ۇيىمداستىرۋشىلار كۇنىنە 80 000 تەستى تەكسەرۋى كەرەك بولادى.
ەستەرىڭىزگە سالا كەتەيىك, قازاقستان وليمپيادا دەلەگاتسياسى جاپونياعا 16 شىلدەدە ۇشادى.
