قالىپتاسقان جاعدايعا بايلانىستى ۇلتتىق قۇراما قوس چارتەرلىك رەيسپەن جىبەرىلمەك. العاشقىسى بۇگىن كەشكە جولعا شىعادى. ونىڭ ىشىندە بوكس, دزيۋدو, كاراتە, ۇستەل تەننيسى, جەڭىل اتلەتيكا جانە اتۋ سپورتتارىنىڭ وكىلدەرى مەن وتاندىق سپورت سالاسىنىڭ ماماندارى بار. ايتا كەتەيىك, ەلسيار قاناعاتوۆ باستاعان دەلەگاتسيا بىرنەشە كۇن بۇرىن جاپونياعا جەتىپ, سپورتشىلار مەن دەلەگاتسيانى تىركەدى. ۇيىمداستىرۋ جاعىن باقىلادى. ەل دەلەگاتسياسىنىڭ شەف-دە-ميسسيونى قاۋىپسىزدىك شارالارى قاتاڭ ەكەنىن العا تارتادى.
ايتا كەتەيىك, ۇلتتىق قۇرامانىڭ قالعان بولىگى 27-ءشى شىلدەدە ۇشادى دەپ جوسپارلانىپ وتىر.
«سپورتشىلارىمىزدى كۇتىپ الىپ, وليمپيادا قالاشىعىنا ورنالاستىرۋعا دايىنبىز. جاڭا تالاپتارعا سايكەس سپورتشىلارىمىز 14 كۇن بويى كارانتيندىك اۋماقتا بولدى. مەديتسينا ماماندارى ءجىتى باقىلادى. بۇنىڭ بارلىعى دايىندىقتىڭ سوڭعى كەزەڭىنە اسەر ەتپەيدى دەگەن ۇمىتتەمىز. توكيودا ولارعا بارىنشا جايلى جاعداي جاسالعان. جاتاتىن جەرلەرىن, تاماقتاناتىن ورىندارى جانە جاتتىعۋ جاسايتىن زالدارىن تەكسەردىك. دەڭگەيى الدىڭعى وليمپيادالاردان اسىپ تۇسپەسە, كەم ەمەس», دەيدى قازاقستان دەلەگاتسياسىنىڭ شەف-دە-ميسسيونى ەلسيار قاناعاتوۆ.
