اقش-تى سوڭعى جارتى, ءتىپتى, ءبىر عاسىردا بولماعان سۋىق قىسپاعىنا الىپ تۇر. ايازدى اۋا رايى جاۋعان قالىڭ قار مەن قار ارالاس جاڭبىرعا ۇلاسىپ, جەر-كوكتى كوكتايعاققا اينالدىرۋدا. مونتانا, سولتۇستىك جانە وڭتۇستىك داكوتا, ميننەسوتا, ايوۆا, ۆيسكونسين, ميچيگان جانە نەبراسكا شتاتتارىندا تەمپەراتۋرا نورمادان 20 گرادۋسقا دەيىن تومەندەپ كەتكەن.
شاراينا
اقش-تى سوڭعى جارتى, ءتىپتى, ءبىر عاسىردا بولماعان سۋىق قىسپاعىنا الىپ تۇر. ايازدى اۋا رايى جاۋعان قالىڭ قار مەن قار ارالاس جاڭبىرعا ۇلاسىپ, جەر-كوكتى كوكتايعاققا اينالدىرۋدا. مونتانا, سولتۇستىك جانە وڭتۇستىك داكوتا, ميننەسوتا, ايوۆا, ۆيسكونسين, ميچيگان جانە نەبراسكا شتاتتارىندا تەمپەراتۋرا نورمادان 20 گرادۋسقا دەيىن تومەندەپ كەتكەن.
كەيبىر قالالاردا سىناپ باعاناسى مينۋس 40 گرادۋستى كورسەتىپ تۇر. نيۋ-يورك شتاتىندا توتەنشە جاعداي جاريالانىپ, بيلىك تۇرعىنداردى اسا ءبىر قاجەتتىلىك تۋىنداماسا, ۇيدەن شىقپاۋدى ۇسىنعان. اۋا رايىنىڭ كۇردەلىلىگىنە بايلانىستى, كۇنى بۇگىنگە دەيىن ءۇسىپ ولگەندەر سانى 30-عا جۋىقتايدى. اۋەجايلاردا مىڭداعان رەيستەر شەگەرىلىپ وتىر. اقش-تىڭ اۋە كومپانيالارى مەن جولاۋشىلار 1-6 قاڭتار ارالىعىندا شامامەن 1,5 ميلليارد دوللارعا جۋىق سوماعا زارداپ شەككەن.
قوسىمشا اسكەريلەر كىرگىزەدى
اقش وڭتۇستىك كورەياعا قوسىمشا اسكەري كونتينگەنت كىرگىزەتىنى تۋرالى حابارلادى. پەنتاگونداعىلاردىڭ ايتۋلارىنشا, كورەيا رەسپۋبليكاسىنا 800 اسكەري قىزمەتكەر, سونداي-اق, بروندى تەحنيكالار مەن تانكتەر جەتكىزىلەتىن بولادى. اقش-تىڭ قورعانىس مينيسترلىگى بۇل جوسپارىن الداعى اقپان ايىندا جۇزەگە اسىرماق.
اسكەري كونتينگەنت سولتۇستىك كورەيامەن شەكاراداعى بازالارعا ورنالاستىرىلاتىن كورىنەدى. پەنتاگونداعىلاردىڭ تۇسىندىرۋلەرىنشە, اقش-تىڭ وڭتۇستىك كورەياداعى اسكەري كونتينگەنتىن كەڭەيتۋ بۇرىننان جوسپاردا تۇرسا كەرەك. ال 1 قاڭتار كۇنى كحدر باسشىسى كين چەن ىن اقش تا ءوزىن قاۋىپسىزبىن دەپ ەسەپتەمەۋى كەرەكتىگىن اتاپ كورسەتىپ, بۇگىندە دۇنيەجۇزى الەمدىك سوعىس پەن يادرولىق قاتەر الدىندا تۇرعانىن ەسكەرتكەن ەدى. قازىرگى كەزدە وڭتۇستىك كورەيا اۋماعىندا 28 500 امەريكالىق اسكەري قىزمەتشى ورنالاستىرىلعان.
قىسقا قايىرىپ ايتقاندا:
* وتكەن جىلدىڭ سوڭىندا قاتتى سوققىعا جىعىلعان «ۋكراينسكايا پراۆدا» باسىلىمىنىڭ ءجۋرناليسى تاتيانا چورنوۆيل شابۋىلدى ۋكراينا پرەزيدەنتى ۆيكتور يانۋكوۆيچ ۇيىمداستىردى دەپ ەسەپتەيدى.
* لاتۆيا ۇكىمەتىن العاش رەت ايەل باسقاراتىن بولدى. ەل پرەزيدەنتى اندريس بەرزينش لايمدوتا ستراۋيۋمانىڭ كانديداتۋراسىن ماقۇلداپ, وعان جاڭا ۇكىمەت جاساقتاۋدى تاپسىردى. ل.ستراۋيۋما بۇعان دەيىن جەر ءىسى ءمينيسترى قىزمەتىن اتقارعان.
* كانادادا پروپان مەن شيكى مۇناي اكەتىپ بارا جاتقان جۇك پويىزى رەلستەن شىعىپ كەتتى. وقيعا كانادانىڭ شىعىسىنداعى نيۋ-برانسۋيك پروۆينتسياسىندا بۇرناعى كۇنى كەشكىسىن ورىن العان. زارداپ شەككەندەر تۋرالى اقپارات جوق.
* وتكەن جىلدىڭ 25 جەلتوقسانىندا انتاركتيداداعى مۇزعا كەپتەلىپ قالعان «اكادەميك شوكالسكي» كەمەسى بۇگىندە ءوز كۇشىمەن سولتۇستىككە جىلجىپ بارادى. كەمەنىڭ قۇرساۋدان شىعۋىنا اۋا رايىنداعى وزگەرىستەردەن مۇزدىڭ جارىلۋى سەبەپ بولعان سەكىلدى.
ۇندىستانعا كەلگەن اۆيانوسەتس
«ۆيكراماديتيا» اۆيانوسەتسى (بۇرىنعى «كەڭەس وداعى فلوتىنىڭ ادميرالى گورشكوۆ») كەشە ءۇندىستاننىڭ كارناتاكا شتاتىنداعى اسكەري-تەڭىز كۇشتەرىنىڭ بازاسىنا كەلىپ جەتتى. ەندى كورابل وسى تەڭىز بازاسىندا ورىن تەبەتىن بولادى. الداعى اقپان ايىندا اتالعان اۆيانوسەتس مۋمبايعا سالتاناتتى كەزدەسۋگە اتتاندىرىلادى دەپ كۇتىلۋدە.
ءۇندىستاننىڭ جاڭا اۆيانوسەتسىن ساپقا قويۋ ءۇشىن شامامەن 4 اي جۇمسالادى دەلىنىپ وتىر. «ۆيكراماديتيا» ۇندىستانعا بىلتىرعى جىلدىڭ 26 قاراشاسىندا باعىت السا, ونى ءۇندى فلوتىنا سالتاناتتى بەرۋ ءراسىمى 16 قاراشادا وتكەن ەدى. اتالعان اۆيانوسەتستى ۇندىستانعا بەرۋ تۋرالى كەلىسىمشارتقا 2004 جىلى قول قويىلعان ەكەن. ونىڭ قۇنى اۋەلگىدە 1,5 ميلليارد دوللارعا باعالانسا, جۇرگىزىلگەن جۇمىستاردان كەيىنگى سوماسى 2,3 ميلليارد دوللارعا دەيىن ءوسىپ كەتكەن. ءۇندىستان تاراپىنىڭ جوسپارىنشا, «ۆيكراماديتيا» ەل فلوتىندا 30 جىل ساپتا تۇراتىن بولادى.
الەۋمەتتىك الاياقتىق انىقتالدى
اقش-تىڭ قۇقىق قورعاۋ ورگاندارى ساقتاندىرۋمەن جانە الەۋمەتتىك تولەمدەرمەن بايلانىستى جاسالعان اسا ءىرى الاياقتىق ارەكەتتەردى انىقتادى. الاياقتىققا قاتىسى بار دەگەن ايىپپەن بۇرناعى كۇنى نيۋ-يوركتە 106 ادام, ونىڭ ىشىندە 80 بۇرىنعى پوليتسەي مەن ءورت ءسوندىرۋشى قاماۋعا الىندى.
تەرگەۋ دەرەكتەرىنە سۇيەنسەك, قىلمىستىق ارەكەتتەرگە قاتىسقاندار قىزمەتتىك مىندەتتەرىن اتقارۋ كەزىندە ءتۇرلى جۇيكە اۋرۋلارىنا ۇشىراپتى-مىس. ناتيجەسىندە ەڭبەككە جارامسىز دەپ تانىلىپ, الەۋمەتتىك تولەمدەر الىپ كەلگەن. تولەمدەر سوماسى جىلىنا 30-50 مىڭ دوللار ارالىعىن قۇراعان. ونىڭ ۇستىنە قىلمىستىق جۇيەگە قاتىسۋشىلار ادەتتەگىدەي تۇرمىس كەشۋلەرىن جالعاستىرا بەرگەن. ماسەلەن, بىرەۋى تىكۇشاق باسقارسا, ەكىنشىسى تۇراقتى تۇردە لاس-ۆەگاستا كازينو ويناعان. قىلمىستىق توپتان كەلگەن جالپى شىعىن 400 ميلليون دوللاردى قۇراعان.
ساقتىق قاتاڭداتىلىپ وتىر
رەسەيدىڭ كەيبىر اۋەجايلارىندا ۇشاق بورتىنا جەكە گيگيەنا كەرەك-جاراعى مەن ءدارى-دارمەكتى قوسا العاندا, سۇيىقتىقتىڭ بارلىق ءتۇرىن الىپ كىرۋگە تىيىم سالىندى. مۇنداي اۋەجايلاردىڭ اراسىندا ماسكەۋدىڭ «ۆنۋكوۆو» جانە «شەرەمەتەۆو» اۋەجايلارى دا بار.
«روساۆياتسياداعىلاردىڭ» سوزدەرىنە قاراعاندا, مۇنداي تىيىم سالۋلار ءبىرىنشى كەزەكتە سوچيدە وتەتىن قىسقى وليمپيا ويىندارىنا بايلانىستى قابىلدانىپ وتىر. سوچيدەگى قىسقى ويىندار 7-23 اقپان ارالىعىندا وتەدى. 2012 جىلدىڭ تامىزىندا رەسەي پرەزيدەنتى ۆلاديمير پۋتين وليمپيادا كەزىندە قاۋىپسىزدىكتى قامتاماسىز ەتۋدىڭ كۇشەيتىلگەن شارالارى تۋرالى زاڭعا قول قويعان بولاتىن. بۇدان بولەك, وليمپيادا ۋاقىتىندا رەسەيدىڭ مەملەكەتتىك دۋماسى وليمپياداعا قاتىسۋشىلارعا ارنالعان جولاقتارمەن جۇرگەن جۇرگىزۋشىلەرگە جاڭا ايىپپۇلدار ەنگىزگەن ەدى.
رەسەيلىكتى ەلىنە ەنگىزبەدى
سەنەگال باسشىلىعى رەسەيدىڭ ۇستالعان «ولەگ نايدەنوۆ» تراۋلەرىنىڭ كاپيتانىن مەديتسينالىق تەكسەرۋدەن ءوتۋ ءۇشىن جاعالاۋعا شىعۋعا رۇقسات بەرمەي قويدى. مۇنى «روسرىبولوۆستۆو» حابارلادى. سەنەگال بيلىگى اۋەلدە كەمە كاپيتانى ۆاديم مانتوروۆقا كلينيكادا تەكسەرىلۋ ءۇشىن جاعالاۋعا شىعۋعا رۇقسات بەرۋگە ۋادە ەتكەن ەكەن.
مانتوروۆتى ەرتىپ ءجۇرۋ ءۇشىن داكار پورتىنا «روسرىبولوۆستۆونىڭ» سەنەگالداعى وكىلى الەكساندر بيريۋكوۆ كەلگەنىمەن, كاپيتاننىڭ پورتقا وتۋىنە رۇقسات قاعازى بەرىلمەگەن. ال كەمە كاپيتانىنىڭ بۇيرەگى اۋىرسا كەرەك. سونداي-اق, «روسرىبولوۆستۆو» كەمەنى اسكەريلەر تۇتقىنداعان كەزدە زارداپ شەككەن باسقا دا ەكيپاج مۇشەلەرى ءۇشىن رۇقسات قاعازىن بەرۋدى سۇراعان بولاتىن. سەنەگال تاراپى اۋەلدە بەرگەن ۋادەلەرىن ورىنداماي, تايقىپ شىعىپ وتىر. تراۋلەر سەنەگال سۋلارىندا زاڭسىز بالىق اۋلادى دەپ تۇتقىندالعان ەدى.
ينتەرنەت ماتەريالدارى نەگىزىندە ازىرلەندى.
