اتىراۋ قالالىق پوليتسيا باسقارماسىنىڭ تەرگەۋشىسى, پوليتسيا اعا لەيتەنانتى نۇربولات ەرسۇلتاننىڭ مالىمەتىنشە, جەرگىلىكتى ازاماتشا بىرنەشە ادامدى الداپ كەلگەن.
«الدىمەن بىلتىرعى تامىزدا تانىسىنا اتىراۋ قالاسىنداعى «نۇرسايا» شاعىن اۋدانىنان 3 بولمەلى پاتەر الىپ بەرۋگە ۋادە ەتىپ, 800 مىڭ تەڭگە اقشاسىن يەمدەنگەن. كەيىن قاراشادا تاعى ءبىر ازاماتشامەن تانىسىپ, وعان دا 4 بولمەلى پاتەر الىپ بەرەمىن دەپ 495 مىڭ تەڭگەسىن العان. بۇدان سوڭ بيىلعى قاڭتاردا «WhatsApp» جەلىسىندەگى جەر تەلىمىنىڭ جارناماسى ارقىلى جەرگىلىكتى ازاماتپەن تانىسقان. سول ازاماتتان «سامال» شاعىن اۋدانىنان جەر تەلىمىن الۋعا كومەكتەسۋ ءۇشىن 750 000 تەڭگە سۇراعان», دەيدى نۇربولات ەرسۇلتان.
ونىڭ ايتۋىنشا, الاياق ايەلگە قاتىستى قر قىلمىستىق كودەكسىنىڭ 190-بابىنىڭ 3-بولىگى, 4-تارماعىمەن تەرگەۋ امالدارى جۇرگىزىلىپ, ءىس سوتقا جولداندى. سوت شەشىمىمەن الاياق ايەلگە 3 جىل 1 ايعا باس بوستاندىعىنان ايىرۋ جازاسى تاعايىندالدى. سوتتالۋشى جابىرلەنۋشىلەرگە كەلتىرىلگەن زالالدى وتەپ بەرۋى ءتيىس.
