وسكەمەندە قازاقستان سپورتشىلارىنىڭ وليمپيا ويىندارىنا دايىندىعى جونىندە ماسەلە قوزعالدى. وتىرىس بارىسىندا قازاقستان قۇراماسىن پسيحولوگ, ماسساجيست جانە جاتتىقتىرۋشىلارمەن تولىقتىرۋ قاجەت دەپ ۇيعارىلدى.
وسكەمەندە قازاقستان سپورتشىلارىنىڭ وليمپيا ويىندارىنا دايىندىعى جونىندە ماسەلە قوزعالدى. وتىرىس بارىسىندا قازاقستان قۇراماسىن پسيحولوگ, ماسساجيست جانە جاتتىقتىرۋشىلارمەن تولىقتىرۋ قاجەت دەپ ۇيعارىلدى.
سپورتشىلاردىڭ جارىس الدىنداعى پسيحيكالىق جاي-كۇيى ولاردىڭ قاشىقتىقتى باعىندىرۋلارى مەن جەڭىسكە دەگەن قۇلشىنىستارىنا ىقپال ەتەدى. ماسەلەن, ەلىمىزدىڭ بالۋاندارى بەلدەسۋگە شىققاندا قوبالجۋ سىندى پسيحيكالىق قىسىمدارمەن وزدەرى كۇرەسۋلەرىنە تۋرا كەلەدى. سونداي-اق, سپورتتىق قۇرال-جابدىقتاردى سپورتشىلاردىڭ وزدەرى مەن جاتتىقتىرۋشىلار تەكسەرەدى. ال شەتەلدىك سپورتشىلاردىڭ جارىس الدىنداعى پسيحيكالىق, تەحنيكالىق ءارى فيزيكالىق دايىندىعىن جوعارى دەڭگەيدە قامتاماسىز ەتىپ وتىراتىن كاسىپقوي ماماندار توبى بار.
ەلىمىزدىڭ سپورت باسقارماسى قازاقستان قۇراماسىنىڭ تەحنيكالىق دايىندىعىن قاداعالايتىن ماماندار سانى وليمپيا ويىندارىنا باراتىن سپورتشىلار سانىنا تىكەلەي قاتىستى ەكەنىن مالىمدەدى. وكىنىشكە قاراي, حوككەيدەن قازاقستان ۇلتتىق قۇراماسى سوچيدەگى ويىندارعا جولداما الا المادى. وسىعان بايلانىستى ۇلتتىق قۇراما جاتتىقتىرۋشىلارىنىڭ ءبىر بولىگى ايتۋلى جارىسقا قاتىسپايتىن بولدى.
سوچيدەگى قىسقى وليمپيادانىڭ باستالۋىنا 29 كۇن قالدى. ەلىمىزدەگى ءبىراز سپورتشى ءوز ليتسەنزيالارىن دالەلدەپ قويدى. ەندى قازاقستاننىڭ سپورت شەنەۋنىكتەرى ۇلتتىق قۇرامانى ازىرلەۋ بارىسىندا پسيحولوگتار, ماسساجيستەر مەن قوسىمشا جاتتىقتىرۋشىلارعا ورىن قاراستىرادى.
«دەلەگاتسيامىز شاعىن. ەگەر سوچيدەگى وليمپيا ويىندارىنا ەلىمىزدەن 40-50 ادام باراتىن بولسا, وندا ونىڭ 20-سىن جاتتىقتىرۋشىلار مەن ماسساجيستەر قۇرايتىن بولادى. دەمەك, بىزگە تاعى ادام جيناۋ كەرەك», – دەدى شىعىس قازاقستان وبلىسى سپورت باسقارماسىنىڭ باسشىسى ءابىل دوڭباەۆ.
وڭداسىن ەلۋباي,
«ەگەمەن قازاقستان».
