ءال-فارابي اتىنداعى قازۇۋ باسقارما توراعاسى – رەكتورى جانسەيىت تۇيمەباەۆ بۇل رۋحاني مۇرانىڭ ەرەكشە قۇندىلىعىنا توقتالىپ, «باقىتجان الىشەر ۇلى بۇگىن بىزگە ۇلكەن ميسسيامەن كەلىپ, اتا-باباسىنان قالعان جانە ءوزىنىڭ زەرتتەۋشىلىك قابىلەتىمەن ءومىر بويى جيناعان ادەبيەت, ءدىن, تاريح, ءتىل, گەوگرافيا سالالارىن قامتىعان جيناقتاردى ءال-فارابي اتىنداعى قازاق ۇلتتىق ۋنيۆەرسيتەتى كىتاپحاناسىنا ارنايى تاپسىرىپ وتىر.
وتە سيرەك كەزدەسەتىن جادىگەرلەر اراب, پارسى, شاعاتاي تىلدەرىندە جازىلعان, كونە عاسىرلاردان بۇگىنگى ءداۋىر ارالىعىن قامتيدى. بۇل ەڭبەكتەردىڭ اراسىندا ورتالىق ازيا عانا ەمەس, ەرتە كەزدەردە دۇنيە جۇزىندە جارىق كورگەن قۇندى كىتاپتاردىڭ ۇلگىلەرى بار.ءبىز بۇل رۋحاني قازىنانى كىتاپحانامىزعا قابىلداپ قانا قويماي, شىعىستانۋشى, لينگۆيست, تاريحشى عالىمدارىمىزدان جۇمىس توبىن قۇرىپ, ارنايى ساراپتاما جاساپ, ولاردى سۇرىپتاپ, تاقىرىپتىق باعىتتارىنا بايلانىستى سالالارعا ءبولىپ, ناقتى زەرتتەۋلەر جۇرگىزەتىن بولامىز. بۇل كىتاپتاردى زەردەلەۋ بارىسىندا ولاردىڭ مازمۇنىن جەكە-جەكە تالداپ, استارىنا ءۇڭىلىپ, رۋحاني, عىلىمي قۇندىلىعىنا ناقتى باعاسىن بەرەتىن بولامىز», دەدى.
ۋنيۆەرسيەت باسشىسى باقىتجان الىشەر ۇلىنا ءال-فارابي كىتاپحاناسىنا تاپسىرعان قۇندى كىتاپتارى ءۇشىن وقۋ ورنى ۇجىمىنىڭ اتىنان العىس ايتىپ, ەل ىشىندە, جەكە وتباسىلىق قوردا جاتقان بابالار مۇراسىن كىتاپحانا, مۇراجايلارعا تاپسىرۋدىڭ ىزگى داستۇرگە اينالدىرۋدى قۇپ الاتىنىن جەتكىزدى. بۇل كەيىنگى جاس ۇرپاقتىڭ ۇلتتىق تانىم-تۇسىنىگى مەن وي-ساناسىن دامىتۋعا وڭ ىقپالىن تيگىزەتىنىن اتاپ ءوتتى.
باقىتجان الىشەر ۇلىنىڭ سوزىنە سۇيەنسەك, ۋنيۆەرسيتەتكە تاپسىرىلعان 246 كىتاپ اتاسى دۇيسەنبەك قابىلانباي ۇلى اقساقالدىڭ جيناعان مۇرالارى ەكەن.
دۇيسەنبەك قابىلانباي ۇلى جيناعان كىتاپتار بۇدان دا كوپ بولۋى مۇمكىن. ويتكەنى كەيبىر كىتاپتار وزگە ادامدارعا, تۋىستارعا سىيعا بەرىلىپ كەتكەن كورىنەدى.
ۋنيۆەرسيەت كىتاپحاناسىنا تاپسىرىلعان كىتاپتاردىڭ ىشىندە 1324 جىلى مىسىر باسپاسىنان شىققان قۇران كارىمنەن باستاپ پاكىستان, ءۇندىستان, تۇركيا, قازان باسپالارىندا باسىلعان ادەبي, تاريحي, ءدىني كىتاپتار بار.
«ەگەمەن-اقپارات»
