«وتانداستار قورى» ءوز جۇمىسىن 2018 جىلى باستادى. قور قۇرىلعانعا دەيىن اۋقىمدى ءىس-شارالاردى دۇنيەجۇزىلىك قازاقتار قاۋىمداستىعى اتقارعان.
«بۇگىندە قوعام 4 باعىتتا جۇمىس اتقارادى. ءبىرىنشى, شەتەل قازاقتارىنىڭ ۇلتتىق بىرەگەيلىگىن ساقتاۋ ماقساتىندا مادەني-گۋمانيتارلىق جوبالار ۇيىمداستىرۋ. ەكىنشى, ەلىمىزگە كوشىپ كەلگەن قانداستارىمىزعا قوعامعا بەيىمدەلۋىنە جاردەم ەتۋ. ءۇشىنشى, شەتەلدەگى قازاقتاردىڭ الەۋمەتتىك احۋالى مەن وتانداستارىمىزبەن جۇمىس جاساۋدىڭ حالىقارالىق وزىق تاجىريبەسىن زەرتتەۋ. ءتورتىنشى, شەتەلدەگى قازاق جاستارىمەن بايلانىس ورناتۋ, ولاردى قازاقستانعا تارتۋ», دەپ ءتۇسىندىرىپ ءوتتى ماعاۋيا سارباسوۆ ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا.
ماعاۋيا سارباسوۆتىڭ ايتۋىنشا, كەلەسى جىلى دۇنيەجۇزى قازاقتارى قاۋىمداستىعىنىڭ 30 جىلدىق مەرەيتويى وتكىزىلمەك. ونىڭ اياسىندا ۇلكەن قۇرىلتاي وتكىزۋ جوسپارلانىپ وتىر.
ءارتۇرلى دەرەكتەر بويىنشا, قازىرگى كەزدە شەت ەلدەردە 5-7 ملن قازاق تۇرادى. ولاردىڭ ناقتى سانىن ايقىنداۋ ءۇشىن زەرتتەۋ جۇمىستارى جۇرگىزىلىپ جاتىر.
سونىمەن قاتار بۇگىنگى كۇنى ۇكىمەتتىڭ قاۋلىسى بويىنشا «شەتەلدەگى ەتنيكالىق قازاقتاردى قولداۋ جونىندەگى 2018-2022 جىلدارعا ارنالعان ءىس-شارالار جوسپارى» قابىلداندى.
«2018 جىلى «وتانداستار» قورى قۇرىلعان ساتتەن باستاپ, شەتەلدەگى قازاقتاردى بىرىكتىرەتىن ۇلتتىق مادەني ورتالىقتاردى تۇگەندەۋ جۇمىستارىنا بەلسەنە كىرىستى. ول جۇمىسقا سىرتقى ىستەر مينيسترلىگى مەن ەلشىلىكتەرى دە ۇلەس قوستى. سونىڭ ناتيجەسىندە الەمدە 250-گە جۋىق قازاق مادەني ورتالىقتارى بار ەكەنى, ونىڭ 150-ءى بەلسەندى جۇمىس ىستەيتىنى انىقتالدى. بۇگىندە ولاردىڭ بارلىعىمەن بايلانىس ورناتىلىپ, 71 ورتالىقپەن ءوزارا ىنتىماقتاستىق تۋرالى مەموراندۋمعا قول قويىلدى», دەدى م. سارباسوۆ.
