سولتۇستىك قازاقستان وبلىسىنىڭ وڭىرلىك كوممۋنيكاتسيالار قىزمەتىندە جەرگىلىكتى اكىمدەردى سايلاۋ دايىندىعى جونىندە ايتىلدى.
سقو سايلاۋ كوميسسياسىنىڭ توراعاسى تىلەگەن قاسكيننىڭ مالىمدەۋىنشە, 61 اكىمنىڭ وكىلەتتىك مەرزىمىنىڭ اياقتالۋىنا وراي جانە 10 اكىمنىڭ ءوز وكىلەتتىگىن مەرزىمىنەن بۇرىن تاپسىرۋىنا بايلانىستى سايلاۋ وتەدى.
سايلاۋعا 14 اۋماقتىق جانە 174 ۋچاسكەلىك سايلاۋ كوميسسياسى جۇمىلدىرىلعان, 994 ادام جۇمىس ىستەپ جاتىر.
«اۋداندىق دەڭگەيدەگى قالا اكىمى مەن اۋىلدىق اكىمدەردى سايلاۋعا 218 ەلدى مەكەننىڭ تۇرعىندارى قاتىسادى. ەڭ شالعاي ورنالاسقان اۋىلدىق وكرۋگ ع.مۇسىرەپوۆ اتىنداعى اۋداندا ورنالاسقان. قىرىمبەت اۋىلدىق وكرۋگى مەن اۋدان ورتالىعى نوۆويشيمكانىڭ اراسى - 170 كم. 54 ەلدى مەكەندە سايلاۋ ۋچاسكەسى جوق. سول سەبەپتى بۇل اۋىلداردىڭ تۇرعىندارى سايلاۋ ۋچاسكەلەرىنە ارنايى كولىكپەن جەتكىزىلەدى», دەيدى تىلەگەن قاسكين.
4 شىلدە كۇنى جەرگىلىكتى اتقارۋشى ورگاندار ناقتىلانعان سايلاۋشىلاردىڭ ءتىزىمىن سايلاۋ ۋچاسكەلەرىنە بەردى. سقو-دا 60 471 ادام داۋىس بەرمەك. ەڭ كوپ سايلاۋشى مامليۋتكا قالاسىندا, مۇندا 5 366 ادام داۋىس بەرەدى. ال اۋىلدىق وكرۋگتەردىڭ ىشىندە ەڭ كوپ سايلاۋشى ع.مۇسىرەپوۆ اتىنداعى اۋداننىڭ نەجينكا اۋىلدىق وكرۋگىندە, مۇندا 1941 ادام سايلاۋعا قاتىسادى. ەڭ از سايلاۋشى – 137 ادام تيميريازەۆ اۋدانى دزەرجينسكي اۋىلدىق وكرۋگىندە داۋىس بەرەدى. 18 جاسقا تولعان 280 ادام العاش رەت سايلاۋعا قاتىسادى.
«تۇرعىندار سايلاۋ ۋچاسكەلەرىنە كەلىپ, سايلاۋشىلاردىڭ تىزىمىمەن تانىسا الادى, وزدەرىنىڭ مالىمەتتەرىن تەكسەرىپ, ەنبەي قالعان جاعدايدا تىزىمگە قوستىرا الادى. مۇمكىندىگى شەكتەۋلى جاندارعا دا سايلاۋ ۋچاسكەلەرىندە بارلىق قاجەتتى جاعدايلار جاسالادى. پاندۋستار قويىلعان, تاكتيلدى اقپارات بار. ارنايى بۇرىش قۇرىلىپ, ارنايى باعدارلاماسى بار كومپيۋتەر ورناتىلدى, لۋپالار قويىلدى. جالپى مۇمكىندىگى شەكتەۋلى جانداردىڭ سانى – 396. 138 ادام مۇگەدەكتەر ارباسىنا تاڭىلعان بولسا, 152 ادام ناشار كورەدى جانە 106 ادامنىڭ قۇلاعى كەمىس», دەيدى سقو سايلاۋ كوميسسياسىنىڭ توراعاسى تىلەگەن قاسكين.
